Takornarialerinermi kalaallit piginnittussaanerannut piumasaqaat: Ineriartornissamut kigaallisaaneq

Nunatsinni takornariaqarneq nunatsinni innuttaasunut iluanaarutaanerussaaq.

Takornariaqarnermut inatsit Inatsisartunit suliarineqartup tamanna siunertaraa. Inatsilli nutaamik piumasaqaatitaqassaaq, taannalu takornariaqarnermi niuernermi allannguisinnaavoq.

Inatsit akuerineqassappat januaarip aallaqqaataani 2025-mit atuutilissaaq, takornarialerinermillu suliffeqarfimmi kalaallit minnerpaamik 51 procentimik piginnittuusussanngortinneqassapput.

Suliffeqarfiilli 2027-mi januaarip aallaqqaataata tungaanut inatsit nutaamut naleqqussarsinnaassapput.

Nunatsinneersut takornarialerinermi sulffeqarfinnut sulinissamik- piginneqataanerulernissamillu periarfissinneqarmata Sulisitsisut naalakkersuisunut nersualaarinnippoq.

Suliffeqarfiilli 51 procentii kalaallinik piginnittussaatinneqalerneri nunatta karsianut isaatitsisuusussaareertumut naalliinerusoq, Sulisitsisut pisortaa, Christian Keldsen oqarpoq.

- Takornariaqarnerup ineriartornera imaatsillugu 51 procentit ingasappallaarput, taanna oqarpoq nangillunilu:

- Nunat tamalaanut sullissinitta aallartilluannginnerani matusineruvoq.

Takornariaqarneq ineriartussappat aningaasaliissutit amerlasuut pisariaqarput. Ullumikkullu aningaasaliissutit nunat allaninngaanneersorpassuupput.

Nunat allamiulli takornarialerinermi suliffiup 49 procent qaangerlugu piginnittuunngikkunik suli aningaasaliisarsinnaapput.

Nunatsinnukarneq nunatsinnillu aallarneq millionilippassuarnik akeqarpoq. Takornarialerisullu takornarissat tikisinniarlugit inniminniisarfiit atortagaat assiganik akeqarput. Piumasaqaataalertussarlu peqqutigalugu aningaasaliinerit annertuut ajornarlissasut , Sulisitsisut pisortaa isumaqarpoq.

- Takornarissat nammineq takkutiinnariaanngillat. Takornarissat aggertinnissai suliassaavoq, tassanilu angalatitsiviit aqqutaapput.Angalatitsiviit aningaasaliiffissat tulleraat. Umiatsiarsinissaq, hotelisinissaq qajarsinissarluunniit naammanngilaq, taanna oqarpoq.

Isornartorsiuisut: Suliffeqarfiit nunat allaneersut aningaasanik ilisimasamillu nunatsinnut tunniussipput

Kalaallit takornarialerinermi suliffeqarfiit 66 procentii kalaallinit piginnittuusussaanerat inatsimmi siunnersuummi siuliani siunnersuutigineqarnikuuvoq.

Kalaallit piginnittuusussaanerannut inatsit siunnersuut Sulisitsisut Grønlandsbankenillu isornartorsioreeraallu kalaallit piginnittuusussaanerannut inatsimmut siunnersuut 51 procentimut appartinneqarpoq.

Piumasaqaalli hotelinut neriniartarfinnullu atuutinngilaq, taakkua piginnittuusussanut piumasaqaatitaqanngillat. Taakkua sumiiffimmi innuttaassusilinnut sullissinerat peqqutaatillugu inatsimmi siunnersuummi taamaaginnartinneqarput.

Nunat allamiut takornarialerinermi suliffeqarfiutai nunatsinnut akileraaruteqartartut, kalaallinillu sulisitsisartut sinneqartoorutitillu nunatsinnut aningaasaliissutigisaraat, Christian Keldsen erseqqissaavoq.

- Takornarialerinermi suliffeqarfiit nalunngisagut nunatsinneersunik suleqateqarput sumiiffiusunilu ineriartortitsisarlutik.

Kikkut piginnittuussanersut killilersuinatik, suliffeqarfinnut sumiiffiusumi sulilersitsinissamik periarfissiisut iluaqusersorneqassasut, Sulisitsisut kaammattuivoq.

Sulisut takornarialerisutut allagartaqarnissaannik ajornannginnerulersitsilluni pikkorissaatitsineq suliffeqarfinnulluunniit akileraarutit annikillisilaarnissai assersuutaasinnaapput.

Akissat: Kina mittarfinnut akiliissava?

Suliffeqarfiit takornarialerisuni kalaallit minnerpaamik 51 procentimik piginnittussaasuutinneqarnissaat Grønlandsbankennittaaq isumaqatiginngilaat.

Nunat tamalaat kalaallit piginnittuunerusussaanerat aporfigalugu peertariaqalersinnaasut, banki tusarniaatitsisoqarnerani allappoq.

- Takornariaqarnerup ineriartorneranut ajortumik kinguneqartitsisinnaavoq, taamaalillunilu aningaasaliisut sulisullu annaaneqarsinnaapput, banki allappoq.

Aningaasaliissutit peqatigalugit ilisimasat annaaneqarsinnaasut, Aningaasaqarnermut Siunnersuisoqatigiit siulittaasuat, Torben M. Andersen KNR-imut septemberimi allappoq:

- Nunanit allanit aningaasaliissutit tassaannaanngillat aningaasat. Suliffeqarfiimmi sukumiisunik ilisimasaqarluakkajuttarput, taakkulu aallartisarniarnermi pisariaqarluinnarsinnaapput.

Suliffeqarfinni takornarialerisuni kalaallit piginnittussaasussaanerannik piumasaqaat Aningaasaqarnermut Siunnersuisoqatigiivisa nalunaarusiaminni akerlilerpaat.

Nuummi, Ilulissani Qaqortumilu mittarfittaassat ilutigalugit nunatsinni takornariaqarnerup ineriartornissaa eqqaavaat.

Mittarfissualiornernullu milliardilippassuarnik atorniarnikuuneq, takornarianit isaatitsinermit akilerneqarsinnaasoq ilanngullugu.

- Aningaasaqarnerup isikkuanut pingaarutilerujuuvoq. Tamannali aningaasaliisussanut allanut kigaallaataasinnaavoq, Aningaasaqarnermut Siunnersuisoqatigiit taama allapput.

Takornariaqarnermut inatsit siunnersuutigineqartoq oktoberip pingajuanni oqaluuserineqarmat Siumumit, Inuit Ataqatigiinnit, Demokraatinit Atassummillu taperserneqarpoq.

Inatsit siunnersuutigineqartoq novembarip 15-iani oqaluuserineqaqqissaaq.