Nuup mittarfia nunanut tamalaanut angallassinermut atorneqaqqissinnaalersoq

Nuup mittarfianit nunanut tamalaanut angalasoqaqqissinnaalerpoq. Angallassisoqarsinnaanissamut akuersissut Trafikstyrelsenimit qaammatit marluk missaanni atorunnaarallartinneqareersorlu nunanut tamalaanut angallassisoqaqqissinnaalerpoq..

Trafikstyrelsen tusagassiorfinnut taama nalunaaruteqarpoq.

Nuummi mittarfiup atorneqarsinnaanissaanut akuersissut Trafikstyrelsenip mittarfiup isumannaassusaanik misissuereerluni qanittukkut atorunnaarsikkallarpaa.

Mittarfiup isumannaallisaanikkut suli naammassinnissinnaannginnera pissutigalugu nunanut tamalaanut timmisartuussinerit septembarimi unitsinneqarallarput.

Matut parnaarneqarsimanngitsut, akuersissuteqanngitsullu mittarfiup ilaanut iserfigeqqusaanngitsumut isersinnaanngornerat ilaatigut ajornartorsiutaasoq Greenland Airportsip KNR-imut allakkatigut siusinnerusukkut akissutigaa.

Akuersissuteqalernissaq arlaleriarluni suliniutigineqartoq

Nuummi mittarfimmi isumannaallisaanerup amigaateqarnera pissutaalluni mittarfik Trafikstyrelsenimit septembarimi aamma matuneqarallarpoq.

Trafikstyrelsenip mittarfimmi naammassisassat piffissami aggersumi akuersissuteqarfigisussaavai, Atlantiku qulaallugu timmisartuussineq siulleq novembarip ulluisa 28-anni pisussatut pilersaarutigineqarluni.

Mittarfimmi qatserisartoqarnikkut upalungaarsimaneq, mittarfiullu allagartalersugaanera ilaatigut akuerineqaqqaartussaallutik.

Mittarfiup illorsua Trafikstyrelsenimit ukioq manna juunimi akuerineqareersoq, nittartakkap MobilityWatchip allaaseraa.

Misissuiartortussalli mittarfimmik kingorna misissuiartormata mittarfik nunanut tamalaanut angallassinermut atorneqarsinnaajunnaarallartinneqarpoq.

Mittarfiullu nunanut tamalaanut angallassinermut maanna atorneqarsinnaalernera Greenland Airportsip pisortaata Jens Lauridsenip Greenland Airportsip Facebook-ikkut quppernerani nuannaarutigaa.

Suliap ingerlarnga ilungersunarsimasoq ilikkagaqarfiusimasorli taassuma oqaatigaa.

- Mittarfiup naammassineqarnissaa maanna aallutarisinnaalerparput, timmisartullu mittarfiat naammassisinnaalerlugu, mittarfik pisortatigoortumik novembarip ulluisa 28-anni ammarsinnaanngorlugu, Jens Lauridsen allappoq.

Ilaasussat mittarfimmillu atuisartut mittarfiup akuersissutaata atorunnaarsinneqarallarneranit eqqorneqarmata Jens Lauridsenip taassuma saniatigut ajuusaarutigaa.