Nuummiit Amerikamut angalanissamut takorluugaq piviusunngungajalersoq
Kalaallit Amerikamukarnissaminnut takorluugaqartut qilanaarutissaqalerput. Nuummi New York Cityllu USA-mi illoqarfissuit ornigarneqarnerpaat ilaata akornanni toqqaannartumik aqqut ammassaaq.
Timmisartuutileqatigiiffiit United Airlines aamma Greenland Airports aqqut nutaaq pillugu tusagassiuutinut nalunaaruteqarput.
Greenland Airportsip nunarput Amerikap avannaanit angalanissamut – muminganillu nunatsinnit USA-mut angalanissamut periarfissanut atatillugu alloriangaatsiartoqartoq oqaatigaa.
- Newark-imut toqqaannartumik aqqutissat aamma angalasunut ornigassarpassuarnik nutaanik periarfissarpassuarnillu aammalu angalasunut, kulturikkut paarlaasseqatigiinnermut, ilinniarnernut niuernermullu Kalaallit Nunaannut periarfissanik, ammaasussaapput. Tamatuma Kalaallit Nunaata nunani tamalaani attaveqarfeqarnera nukittunerulersissavaa aammalu kalaallit nunarsuarmi nutaanik periarfissaqalersissallugit, Greenland Airportsimi pisortaaneq, Jens Lauridsen tusagassiuutinut nalunaarummi oqarpoq, nangillunilu:
- Tamanna Kalaallit Nunaata Amerikamut avannarlermut attaveqarneranik nukittorsaanermi pingaaruteqartorujussuarmik ineriartortitsinerpaasussaavoq
United Airlinesip ”angalasut Kalaallit Nunaanni issittumi misigisassarsiornissamut toqqaannartumik angalanissamut periarfissaqalersut” allappaa.
USA-mut akunnerit sisamaannaat
United Airlines USA-p Nuullu akornanni timmisartuutileqatigiiffinni kisiartaalluni angallassisuussaaq. Taamaalilluni akunnerni sisamani angalariarluni ”The Big Apple”, illorsuit portusuut, katersugaasiviit, Times Square-imi allagartarsuit takusarneqarsinnaapput, niuerniartoqarsinnaavoq taxinillu sungaartunik unitsitsisoqarsinnaalluni.
Mittarfimmit Newarkimit Nuummut timmisartukkut aqqut nutaaq 2025-mi juunip 14-iani ammassaaq, taamaalillunilu nunatta USA-llu akornanni toqqaannartumik aqqutini siulliussalluni. New Yorkip Nuullu akornanni timmisartukkut 2025-mi septembarip 24-at tikillugu angallassisoqartassaaq.
Nuummi nunat tamalaat akornanni mittarfik ilisimaneqartutut novembarip 28-ani ammassaaq, United Airlinesillu toqqaannartumik timmisartuussisalernissaanut USA angallaffigineqarsinnaatilissavaa. Ukiuuneranili angalasoqartarnissaanut pilersaaruteqartoqanngilaq, taamaammat USA-mut timmisartumik toqqaannartumik angalaniartut aasarnissaanut utaqqisariaqassapput.
New Yorkimut timmisartukkut aqqutaalersussaq Amerikami nunap immikkoortuinut allanut ass. Naalagaaffiinut allanut, Canadami illoqarfissuarnut imaluunniit Caribbiap qeqertaanut angalanissanut periarfissiissaaq. United Airlines Newarkimi Mittarfimmit sumiiffinnut allanut 89-inut angallassisarpoq.
