Atuisut Nuummi mittarfissuassap illorsua pillugu: Naammasseqqaarsimasariaqaraluarpaat
Sanaartortut, nassatanik aallertarfik ajortoq, isumannaallisaanermi akimmiffeqarneq, atortut ajortut. Tassa Nuummi mittarfissuassap illorsuata ukioq manna juunimi ammarneraniilli akimmiffiit ilaat tamakkuupput.
Timmisartorsuulli Nuummi mittarfissuassamut mittalernissaanut qaammatit pingasuinnanngorput, mittarfissuassallu illorsua angalasunut pilersaarutit malillugit taamanikkussamut piariivinneqartussaavoq. Mittarfissuassalli illorsua atuisunit qanoq igineqarpa? Tamanna paasiniarugu atuisunik illorsuarmi tassani oqaloqateqarpugut.
Thomas Broberg, Nuuk. Taanna siusinnerusukkut angalanermini kufferteersersimasoq kuffertiminik apeqqutiginnikkiartortoq oqaloqatigaarput.
Aatsaavissuaq mittarfissuassap illorsuaniippit??
- Naamik siullerpaamiiunngilaq. Nammineq aallariartorlungalungalu tikittumik aallernikuuvunga.
Mittarfissuassap illorsua qanoq igaajuk?
- Ajorpoq, pitsaanerusinnaavoq. Assersuutigalugu akunnerit marluk sioqqullugit tunniussiartoreersimanissaq utaqqinertaqaqaaq. Oqarnittuut ajorpoq. Suliat assigiinngitsut piareerluarnikuunngitsut aaqqeqqaartariaqaraluarput ammannginnerani.
- Maanga tikittussamik aallerlunga anartarfeqarfiit qamani atorneqarsinnaanngitsut. Pisattanut tigooraaviit portuallaartut. Arlaannik peqataraanni pisattat iluaniittut aseroriaannaat. Uagut nammineq isumagisussaagatsigit, tamanna toqqissisimanarpallaarani iluanngilaq.
Mittarfissuassap illorsua suliluunniit piariivinngitsoq ammarpoq. Tamanna qanoq isumaqarfigaajuk?
- Naammasseqaarsimasariaqaraluarpaat tamaat ingerlanissaanut ammarniarunikku.
Peter Oluf Meyer, Nuuk, Taassuma panini aallariartuuppaa.
Aatsaavissuaq mittarfissuassap illorsuaniippit?
- Naamik, tikittunik tamaanga aallerlungalungalu aallariartuussisareerpunga.
Mittarfissuassap illorsua qanoq igaajuk?
- Alutornaqaaq, piariivippallu alutornarseqqeriaannassagunarpoq. Illorsuaq nutaarsuuvoq angillunilu. Piariivippat tamaani sullissineq taamaanikkussamut qanoq ikkumaarnersoq pissanganarpoq.
- Sulimi naammassisassaqaaluttoq nalunanngilaq. Piffissaliussamik qaangiinermi taama pisoqakkajuppoq. Iluatsissaqqaarpoq.
Mittarfissuassap illorsua suliluunniit piariivinngitsoq ammarpoq. Tamanna qanoq isumaqarfigaajuk?
- Taama siusitsigisumik ammaanissamik aalajangertoqarsimatillugu taamaattoqakkajuppoq, tamaanili sooq suli taama naammassisassaqaalutsigisoq naluara. Sulili sanaartorfiuvoq. Mittarfik atortullu allarpassuit atorneqarput. Taamaammat tamaani akimmiffeqarnera tupaallaatiginngilara. Nammineq sanaartornermiippunga, sanaartornerullu silarsuaani taamaattunik akimmeqakkajuppoq.
Karen Motzfeldt, Nuuk. Taanna uini aallariartuullugu mittarfissuassap illorsuaniippoq.
Aatsaavissuaq mittarfissuassap illorsuaniippit?
- Naamik, nammineq aallariartorlunga tamaaniittareernikuuvunga.
Mittarfissuassap illorsua qanoq igaajuk?
- Suli naammassisassaqaaluttoq malunnarpoq, taamaattoqartormi tusagassiutit aamma allaaseraat.
- Juulimi aallariartorlunga nassatannik tunniussiuninni kuffertima oqimaalutaavimmut iligakku tattuulluni uppinnera maluginianngitsuunngilara. Sulisut taamaalillutik kuffertit oqimaalutaavimmiit kivillugit nassatat ingerlaarfissaannut annermut nuuttariaqartarmatigit nersunarput.
Mittarfissuassap illorsua suliluunniit piariivinngitsoq ammarpoq. Tamanna qanoq isumaqarfigaajuk?
- Mittarfimmi sulisuunnginnamami naluara sooq suli piariivinngitsoq ammarnissaanik aalajangersimanersut. Soorli taama aalajangersimanersut eqqarsarnanngitsuunngilaq. Tamanna akissutissarserusunnarpoq. Imaasinnaavoq piffissaliussanik malitassaqartariaqarsimasut. Asuki, kisianni eqqumiippoq.
Marie Steffensen Abelsen, Nanortalik. Taanna Sisimiuniit kujammut angerlartilluni tamaanga aqqusaartunut ilaavoq.
Aatsaavissuaq mittarfissuassap illorsuaniippit?
- Naamik, aappaassaa maani akimmippunga.
Mittarfissuassap illorsua qanoq igaajuk?
- Eqqissisimanerulersimavoq, immaqa anginerulersimagami. Inuppassuaqarunnaarluni, taava ajunngilaq.
Mittarfissuassap illorsua suliluunniit piariivinngitsoq ammarpoq. Tamanna qanoq isumaqarfigaajuk?
- Asukiaq, immaqa uanga nammineq misiginngilara. Kisianni soorunami nuanniissooq taamatut nalaataqarluni. Immaqa pitsaanerusimassagaluarpoq piareerpat ammarsimasuuppat. Aamma malunnarpoq, tassami maangarluni suli piariivinneqanngitsoq eqqarsarnalaarpoq.
KNR-ip Greenland Airports sapaatip akunnerani kingullermi apersorniarsarigaluarpaa. Naalli saaffiginnissutit arlaqaraluartut tamanna suli periarfissaanngilaq. KNR-ip sulinerup qanoq ingerlanera, sooq taama equngasoortigisimanersoq mittarfiullu qaqugu timmisartorfigineqarsinnaalernissaa naatsorsuutigineraat paaserusukkaluarpaa.
