Qaammatialunni isornartorsiuingaatsiartoqareersoq: Greenland Airportsip pisortaanera akissuteqarpoq

Nuummi mittarfissualiornerup Greenland Airportsip neriuutigisaatulli ingerlannginnera amerlanerpaat paasereersimassajunnarsivaat.

Mittarfissuartaarniarnerummi piviusunngortinniarnerata aqqutaani aporfeqaaluppoq, naalakkersuisullu siulittaasuat, Múte B. Egede (IA), pissutsinik kipiluttunarneraalluni sanaartornermilu inuiaqatigiit paatsungatinneqarnerat pillugu isornartorsiuivoq, tamannalu Jens Lauridsenip maanna akissuteqarfigaa.   

- Mittarfiup illorsuartaata suliarineqarnera kinguaattoorsimanerassanngikkukku eqqumiissaaq, taanna oqarpoq.

Mittarfiup illorsuartaa februaarimi ukioq manna piareeriissasoq pilersaarutaaqqaaraluarpoq, Greenland Airportsili aporfeqaalummat sanaartorneq kinguaattoorpoq.  

Aaqqitassat annersaat tassaasimavoq sulilu tassaalluni illorsuup nutaarluinnaap ussiinnera pissutigalugu erngup arlalitsigut isaasarnera.

Illorsuup silataata igalaallu akorngi ussiitsut Greenland Airports siornatigut oqaatigaa. Taamaammallu iikkat ilaat piiarneqarput. Assi © : Johansinnguaq Olsen/ KNR

- Illorsuup ussiinnera ajornartorsiutaanerpaavoq, taamaammallu iluani isugutattoqarmat allangortitserisariaqalerpugut, Jens Lauridsen nassuerpoq.  

- Aap, suliassaqarnerulernera piffissaajaataavoq, soorunalumi qinngarnarpoq, taanna oqarpoq.  

Taamaammallu illorsuaq maanna qaammatit arfineq-marluk qaangiunneranni suli piariinngilaq.

Qattat simernerillu qernertut

Mittarfiup illorsuartaa nuannersuinnarmik eqqartorneqanngitsoq Jens Lauridsenip nalungilluarpaa. Illorsuummi ussiinnera pissutigalugu qisuit isugutammik qernertunik simernillit qattallu erngup kuserfii takussaammata assilineqarlutik inoqatinut attaveqaqatigiittarfitsigut siammarterneqarput.   

Greenland Airportsillu mittarfik aatsaat piariivippat ammarsimasariaqaraluaraa angalasut arlallit KNR-ip septembarimi oqaloqatigisaat isummerput.   

Naallu illorsuup juunimi atulerneranili ilungersunartoqaalukkaluartoq aalajangerneq suli eqqortuusoq, Jens Lauridsen isumaqarpoq.

- Aporfippassuarnik aqqusaakatsinnik pinngitsoortitserusukkaluarnerput siulliullunga nassuerutigissavara, novembarilli 28-ata kingorna pinissaanniit maanna pillaquneruakka, taanna oqarpoq.

Isornartorsiutigineqartoq miserratiginngikkaa

Suut tamarmik piareereernissaannut piffissaq sivisujunnaarpoq, timmisartorsuarmi Nuummut novembarip 28-ni siullermeerluni mittussaassaaq. Múte B. Egede aamma Ineqarnermut Attaveqaasersuutinullu Naalakkersuisoq, Hans Peter Poulsen, sanaartornermik isornartorsiuillutik tusagassiorfinnut septembarip aallartisimalaarnerani nalunaaruteqarput.       

Taakku marluullutik mittarfiliornermi ´kinguaattooqattaarnerit naammaginngilluinnarpaat´, sanaartornerlu Múte B. Egedep naammaginanngilluinnarnerarpaa.

Taamalu isornartorsiorneqarneq pisortaanerup ima oqaaseqarfigaa:

- Naammaginninnginneq tusaqqaarakku nikalluallaqaanga, unami suliaq iluatsinniarlugu inupparujussuit sulingaatsiarput.

- Unali suliniuterujussuaq Kalaallit Nunaannut pingaartuummat taama aporfeqartiginerup pakatsissutaanera paasisinnaavara.

- Isornartorsiorneqarnerlu ilaanni inissaminiittarpoq, taanna oqarpoq.

Pisortaaneq sulinerup annersaanut akisussaasuunerarpoq sanaartornermilu aporfeqarsimanerujussuaq nassuerutigaa, mittarfissuartaassalli novembarip 28-ni pinissaa suli aalajangiusimavaa.