Naalakkersuisut mittarfiup kinguaattoorneri isornartorsioraat

Nuummi mittarfimmi nutaami sanaartornermi unammillernartut aaqqiiviginiarnerisa kinguaattoorneri amigaataanerilu naammaginanngilluinnarput.

Naalakkersuisut tusagassiuutinut nalunaarummi oqarput.

Politikerit unammillernartut sorlerpiaat naammagisimaanngikkaat immikkut oqaatigineqanngilaq, toqqagassarpassuuppulli.

Trafikstyrelsip nunanut tamalaanut timmisartuussisoqartalernissaanut Nuummi mittarfimmi nutaami isumannaassuseq sapaatip akunnerata siuliani kingullertut akuerinngilaa.

Trafikstyrelsip nakkutilliinerata kinguneranik mittarfiup nunanut tamalaanut timmisartuussisalernissaa aappassaa kinguartinneqarpoq. Timmisartumik nunanut allanut aallartoqarneranit qaammatip ataatsip missaa qaangiuppoq.

Timmisartup mittarfianik asfalterineq illutaanilu kuuttoqarnera

Mittarfimmi sanaartukkami sialummik isaasoqartoq KNR-ip sapaatit akunnerisa marluk matuma siorna saqqummiuppaa.

Ukioq manna siusinnerusukkut oqaatigineqartutulli sanaartornermut tunngatillugu iluarsaassat pissutigalugit siallernerani mittarfiup illutaani sumiiffinni arlalinni imermik isaasoqarpoq.

Taamaammat mittarfiup terminaliata illutaata iigartai arlallit amigaataapput, sanaartornermilli misissuinermi ukioq manna siusinnerusukkut igalaat illullu saqqaata akornanni arlalinni ussiittoqartoq takutinneqarnikuuvoq.

Aamma atlantikoq qulaallugu timmisartut mittarfissaata, 2,2 kilometerinik takissuseqartup naammassiniarnera utaqqineqartoq, piareeriartortoq mittarfissalli novembarip 28-ani ammarnissaanut asfaltigassaqangaatsiartoq, Greenland Airportsip pisortaata, Jens R. Lauridsenip juunip aallartinnerani oqaatigaa.

Unammillartulli kinguaattoornerillu tamarmik naammaginanngitsut, ineqarnermut attaveqaasersuutinullu naalakkersuisup, Hans Peter Poulsenip (IA) oqaatigaa.

- Kinguaattooqattaarnerit isiginngitsuusaaginnarsinnaanngilagut taamaattumillu naatsorsuutigilluinnarparput Greenland Airportsip piffissaliussat killinganik avammut nalunaarutigisimasaminnik eqquutitsissasut.

Aqutsisut ataatsimeeqatigissagaat

Trafikstyrelse mittarfimmi nunanut tamalaanut timmisartuussisinnaalernissamut isumannaannissamut kukkunerit aaqqiivigineqarsimanersut takuniarlugit oktobarip aallartinnerani takkuteqqissaaq.

Tamatumali pinnginnerani naalakkersuisut "siulersuisut aqutsisullu suliniummi akisussaaffiinik ukkatarinninniartut " tusagassiuutinut nalunaarummi allassimavoq.

- Greenland Airportsip siulersuisuini siulittaasoq tullersortaasorlu sukkanerpaamik ataatsimeeqatiginissaat piumasaraarput. Pissutsit kipiluttunartut aaqqiiviginiarneqarnissaat naatsorsuutigaarput aaqqiinissallu erngertumik pinissaat naatsorsuutigalugu, Naalakkersuisut siulittaasuat Múte B. Egede (IA) oqarpoq.

Namminersorlutik Oqartussat aamma danskit naalagaaffiat Nuummi mittarfimmik nutaamik piginnittuupput.