Nuummiit nunanut tamalaanut timmisartuussisalernissat sapaatinik akunnernik marlunnik kinguartinneqaqqittut
Angallannermut aqutsisoqarfiup sapaatip akunnerata siuliani misissuilluni takusaaneratigut isumannaallisaanerup qaffasissusaa naammannginnera pissutigalugu mittarfimmiit nunanut tamalaanut timmisartuussinerit unitsinneqarallarput.
Mittarfik kingusinnerpaamik aqagu marlunngornermi nalinginnaasumik ingerlalersimanissaa nalunaarutigineqaraluarpoq.
Greenland Airportsilli Nuummiit nunanut allanut toqqaannartumik timmisartuussinerit sapaatip akunnerani 36-mi – tassa sapaatit akunneri marluk qaangiuppata – Angalannermut Aqutsisoqarfik nutaamik misissuiartoqqereerpat - aatsaat periarfissaalersinnaassasut maanna nalunaarutigaa.
- Ajoraluartumik tamanna ilimagineqaqqaartuniit kingusinnerulaarpoq. Tamatumunnga ilaatigut pissutaavoq, iluarsiinissat pisariaqartut ilaanni immikkut ilisimasallit, piffissaq sivisunerulaartoq atorlugu apuunniartussat, pisariaqartinneqarnerat, Greenland Airports tusagassiuutinut nalunaarummi allappoq.
- Tamatuma kingunerisaanik – maannakkorpiaq – Nuummiit assersuutigalugu Keflavik-imut (Island) imaluunniit Iqalunnut (Canada) Nuummiit toqqaannartumik nunanut tamalaanut timmisartuussisoqarsinnaajunnaarpoq. Nunap iluani timmisartuussinerit allanngunngillat, Greenland Airports allappoq.
Isumannaallisaanerup qaffasissusaa appasippallaartoq
Aqutsisoqarfiup sapaatip akunnerata siuliani misissuiartornerani Greenland Airportsip mittarfimmik ingerlatsisup isumannaallisaanera "nunanut allanut timmisartuussinernik aqutsisinnaanissaanut naammanngitsut" paasineqarmat nunat tamalaat akornanni timmisartuussinerit unitsinneqarallarput.
Greenland Airportsip "matut parnaaqqanngitsut taamaalillunilu susassaqanngitsut iserfigeqqusaanngitsunut isersinnaasut" pineqartut tusagassiuutinut nalunaarummi oqaatigaa.
- Kukkunerit iluarsinissaat aallullugu suliaraagut, taamaalilluta isumannaallisaaneq annertuumiiteqqilersinnaaniassagatsigu aammalu nunanut allanut timmisartuusseqqissinnaalerniassagatta. Sullitatsinnut ilaasunullu tamatuma akornusiinera ajuusaarutigisorujussuuarput, Greenland Airportsimi attaveqaqatigiinnermut pisortaq Mikkel Bjarnø Lund tusagassiuutinut ataasinngornermi nalunaarummi oqarpoq.
Kukkunerit aaqqiivigineqarsinnaata tungaanut nunanut tamalaanut timmisartuussinerit – Kangerlussuarmi Kulusummiluunniit mittarfiit isumannaallisaavigineqarluartut aqqutigalugit - pingaartumik Islandikkoortumik ingerlanneqarsinnaapput.
