Nunanit tamalaanit Nuummut timmisartuussinissat unitsinneqartut

Angallannermut Aqutsisoqarfiup Nuummi mittarfimmut nutaamut nunanit tamalaanit Nuummullu timmisartuussinerit tamarmik ullumi aggustip 14-ianni unitsinneqarallarput.

Isumannaallisaanerup qaffasissusaata naammannginnera pissutaasoq, Angallannermut Aqutsisoqarfik nittartakkamini nutaarsiassiilluni allappoq.

Greenland Airportsip, mittarfimmik ingerlatsisup "nunanit allanit timmisartuussinerit pisariaqartumik isumagisinnaanngikkai" sapaatip akunnerani matumani nakkutilliinermi paasineqarmat unitsitsigallartoqartoq, Angallannermut Aqutsisoqarfik paasissutissiivoq.

 - Kalaallit Nunaanni inuinnaat silaannakkut angallanneranni isumannaallisaaneq nunat tamalaat akornanni malittarisassanik malinninnissaa oqartussatut qulakkeertussaavarput.

- Mittarfimmi nakkutilliinermi isertugaalluinnartoqarmat isumannaallisaanerit sorliit piffissami matumani amigaataanersut annikitsortalerlugit oqaatigisinnaanngilarput, Angallannermut Aqutsisoqarfimmi pisortap tullia, Christian Vesterager nalunaarummi oqarpoq.

Canadamut Islandimulluunniit timmisartuussisoqassanngitsoq

Aamma Air Greenlandip nunanut allanut allaniilli aallartussat tikittussallu ulluni tulliuttuni taamaatinneqarsimasunut nittartakkamini uppernarsarpaa. Iqalunnut pingasunngorpat aallartussat ilaatigut ilaapput.

Airg Greenlandip pisoq ajuusaarutigaa, Greenland Airportimiillu nalunaarut malillugu mittarfik marlunngornermi aggustip 20-anni naliginnaasumik ingerlaleqqissasoq oqaatigaa.

Iqalunnut silaannakkut angallannerup saniatigut Nuummiit Islandimut sapaatip akunneranut aamma angallassisoqartarpoq, taannalu inerteqquteqarallarnermik eqqugaassaaq.

Greenland Airportsip "pissutsit ilungersunarluinnartutut tigullugit" KNR-imut akissummi allappaa.

- Kukkunerit amigaataasullu nassaarineqartut akuersaarneqarsinnaanngillat, tassungalu akisussaaffik tamaat tiguarput. Kukkunerit aaqqiivigineqarnissaat iluarsinissaallu suliarilertorpagut, taamaalilluta Nuummiit nunanut allanut timmisartuussisinnaaleqqinnissatsinnut isumannaallisaanerup qaffasissusaa erngertumik aaqqissinnaalerniarlugu, Greenland Airportsimi attaveqaqatigiinnermut pisortaq, Mikkel Bjarnø Lund allappoq.

Akissummilu tassani assersuutigalugu "matut parnaaqqanngitsut taamaalillunilu akuersissuteqanngitsut iserfigeqqusaanngitsunut isernissaat periarfissaanerat" pineqartoq paasissutissiissutigalugu.

Greenland Airportsip ikukkunerit ullualuit ingerlaneranni iluarsiivigineqarnissaat naatsorsuutigaa.

Utaqqiisaasumilli nunanut allanut toqqaannartumik aqqutit - tassa imaappoq pingaartumik Islandimut - Kangerlussuarmi Kulusummilu mittarfiit nakkutilliilluartoqarfiusut kisimik periarfissaapput.

Nuummi mittarfimmi oqartussanit akuersissutinik aatsaat siullermeertumik unammillernartoqanngilaq. Terminalip nutaap pilersaarutaasumik ukioq manna juunip qiteqqunnerani ammarnissaa sapaatip akunneranik kinguartinneqarnikuuvoq. Tassanilu qatserisartunit nalunaarut pissutigineqarluni.

Attaveqaqatigiinnermulli pisortap mittarfiup atlantikoq qulaallugu Nuummiit Nuummullu timmisartuussinerit pilersaarut malillugu ukioq manna novembarip 28-anni aallartinnissaannut piareersimanissaa naatsorsuutigaa.

- Mittarfimmik nutaamik ammaaniarnermi suliaq assigiinngitsorpassuarnik suliassartaqarpoq. Ammarniarnerani aqqummi aporfeqartassaaq. Novembarilli 28-anut piareernissarput qularutiginngilarput, Greenland Airportsimit Mikkel Bjarnø Lund oqarpoq.