Nuummi mittarfissuassap illorsuata ammarnissaa sivikitsumik kinguartinneqartoq

Nuummi mittarfissuassap illorsuata ammarnissaa sivikitsumik kinguartinneqarpoq.

Mittarfeqarfiit Greenland Airports tusagassiorfinnut taama nalunaaruteqarpoq.

- Mittarfissuup illutaanik suliaqarneq ammaaniarnerlu annertuupilussuuvoq sivisullunilu. Oqartussaasuniit illup ingerlanneqarnissaanut arlalinnik malittarisassaqarpoq, assersuutigalugu illup iluata aaqqissuunnera, isumannaallisaaneq, avatangiisit suinermilu atuagssarititaasut. Illup ilua aamma atortorussaarutinik teknikkikkut siuarsakkanik nutaarluinnarnik atortulersugaavoq, taakkulu atorniaraanni aalajangersimasunik piginnaasaqaqqaarluni allagartaqaqqaarluni aamma aknnnerpassuit atorlugit sungiusarneqaqqaartariaqarput, Greenland Airports allappoq, tamakkualu anguneqarsinnaasimanngitsut ajuusaarutigalugu.

Angallannermut Aqutsisoqarfiup terminalimi isumannaallisaavik akueraa, qatserinermulli upalungaarsimasut ataasiakkaanik aaqqitassanik nalunaarsuisimallutik, terminalip atulinnginnerani aaqqeqqaagassat.

- Pilersaarusiaq annertuupilussuuvoq amerlasuunillu suliassarpassuaqarluni, nutaanik unammillernarsinnaasunik ingerlaveqarluni, tamaasalu angoqqaarlugit ammarsinnaalluta. Taakkuupput mittarfeqarfimmik ingerlatsinermi toqqammaviusumik piumasaqaatit, Greenland Airports tusagassiorfinnut nalunaarummi ilaatigut allappoq, nangillunilu:

- Tamanna isumaqarpoq, Nuummi illorsuaq nutaannginneq pisarnermisut angalasunit aallariartorfigalugu aamma tikiffiussasoq, Greenland Airports oqarpoq.

Greenland Airports ammarnissaq pillugu piffissami qaninnermi nutaamik ulluliiumaarpoq.