Mittarfissualiornerup kinguaattoornera avannaanut angallassinermik ukiuni marlunni sivitsuissasoq
- Angalaneq sivitsortussaassaaq.
Air Greenlandip pisortaanera, Jacob Nitter Sørensen oqarpoq.
Ilulissani mittarfissuassaq kinguaattoorluni 2026-ip naalernerani aatsaat ammartussanngormat, Nuummilu mittarfissuassap pilersaarutaareersutut novembarimi ukioq manna ammartussaaneranik nalunaarutaareersorlu, angalanerup sivisunerulernissaa paasinarsivoq.
Nuummi mittarfissuaq ammarpat timmisartorsuaq ´Tuukkaq´ Kangerlussuarmut minnani illoqarfiit pingaarnersaannut mittalissaaq, taamaattumik ilaasut Ilulissiartut avannarpasinnerusumukartullu angalanerat sivitsussasoq, Jacob Nitter Sørensen nassuiaavoq.
- Dash 8-mut ilaalluni Nuummiit Ilulissiartoqartassaaq, ´Tuukkaq´ Kangerlussuarmut mereeraangat ullumikkutut Ilulissanukartarnermit timmisartorneq nalunaaquttap akunnerata affaata missaanik sivitsussaaq, Jacob Nitter Sørensen oqarpoq.
Avannarpasinnerusumukarniaraannilu angalaneq suli sivisunerulissaaq.
Ilaasulli sinerissamut apuunnissaannut timmisartut naammakkumaartut, Air Greenlandip pisortaanerata neriorsuutigaa. Takornarialli Ilulissiarusuttut avannarpasinnerusumukarusuttulluunniit aamma ikilisinnaapput.
- Toqqaannartumik timmisartuussinissat periarfissaagaangata amerlaneranerit angalarusunnerusartut nalunngilarput. Taamaammat Ilulissanukarusuttut amerlassusaat sunnerneqarnerussajunnarsivoq, Jacob Nitter Sørensen oqarpoq.
Pisortaq: Timmisartorsuup Kangerlussuarmukaannartarnissaa periarfissaanngilaq
Ilulissani mittarfissuassap ammarnissaata kinguarnera Air Greenlandip aqutsisuisa tupaallaatiginngilaat. Pilersaarutimmi malillugit sanaartortoqanngitsoq ilimanareersoq, Jacob Nitter Sørensen oqarpoq.
Tamannali timmisartorsuup Kangerlussuarmukartittarallaannarnissaanik timmisartuutileqatigiiffimmut isumaliuuteqalersitsinngilaq. Nunatsinummi angalasut amerlanersaat Nuummukartarput.
- Air Greenlandip Nuummut toqqaannartumik timmisartuussisarnissaa naatsorsuutigineqarpoq, aamma unammilleqatigiinneq eqqarsaatigalugu pissusissamisoorpoq. Nuummut toqqaannartumik timmisartuussisalinngikkutta allat taamaaliornissaat ilimanarluinnarpoq.
Nuummi mittarfissuassap ammarnissaa qularnanngitsoq
Naak Ilulissani mittarfissuassaq ukiumik ataatsimik kinguaraluartoq, Nuummi mittarfissuassamik atoqqaartitsinissaq allannguuteqanngilaq. Mittarfissuup atulernissaanut pilersaarutit malinneqartut, mittarfeqarfinnik ingerlatsisoqatigiiffiup Greenland Airportsip pisortaa, Jens R. Lauridsen neriorsuivoq. Mittarfissuup illorsuartassaa juunip 17-ni ammassaaq, timmisartorsuullu mittarfissaa novembarip 28-ni ammassalluni.
- Pilersaarutit malinneqarput, piffissaq eqqorlugu ammassaagut.
- Timmisartut mittarfissaat novembarip 28-ni ammassasoq pilersaarutaavoq, naammassingajalerporlu. Asfaltilersuingaatsiarnissaq amigaataanerpaavoq, panernarsinissaali aallartinnissatsinnut utaqqivarput, Jens R. Lauritsen itisiliivoq.
Timmisartut Dash 8-t mittarfimmut nutaamut aggustip qiteqqunnerani missinnaaleriissapput, timmisartorsuullu mittarfissaa 2,2 kilometeriusoq novembarip naalernerani piariissaaq.
Taamaammat juunip 17-ianiit aggustip qiteqqunnerata nalaani angalasussat nassataminnik illorsuarmi nutaami tunniussisassapput, mittarfitoqqamiilli aallartassallutik. Bussiunneqartassasullu Jens R. Lauritsen oqarpoq.
- Maanga illorsuarmut nassatanik tunniussisarneq juunip 17-ianiit aallartissaaq kingornalu timmisartut maanna uninngaffigisartagaannut bussiussisoqartassaaq, taanna oqarpoq.
Nuummi sanaartorneq pissusissamisut ingerlasoq, Ilulissani kinguaattoorpoq, Qaqortumilu mittarfiliorneq aamma pilersaarutit malillugit ingerlasoq, Jens R. Lauridsen oqaluttuarpoq. Qaqortumi mittarfik 2026-mi piariissasoq, pisortaaneq oqarpoq.
