Tusagassiuutit: Nuummiit EU-mut angalasussat marloriarlutik nassataminnik tunniussisassasut
Qaammatit sisamat qaangiuppata – tassa novembarip 28-anni – atlantikoq qulaallugu timmisartumik Nuummut siullermeertumik tikittoqarlunilu aallartoqassaaq.
Pisussarlu pingaaruteqarpoq. Illoqarfiimmi pingaarnersaannit Kangerlussuaq Narsarsuarluunniit aqqusaaqqaarnagu toqqaannartumik Danmarkimukariarluni nunarsuup sinneranut angalasoqarsinnaassaaq.
Ataaserli novembarip 28-anni piareersimassanngilaq – tassa One Stop Securitymik taaneqartartoq. Tamanna pissutigalugu Danmarkimut tikinnermi mittarfimmut allamut Danmarkimiittumut EU-miittumulluunniit ingerlaqqissaguit nammineerlutik nassatannik tunniussiartoqqissaatit.
Sermitsiaq.AG taama allaaserisaqarpoq.
Misissuisoqarnissaa kinguartinneqartoq
Nuummi Atlantikoq qulaallugu mittarfimmi nutaami isumannaallisaanikkut atortorissaarutit atulerneranni kinguaattoorutit, Nuummi mittarfiup EU-mik misissorneqarnissanut piareersimannginnera kinguneraa, tamanna septembarip aallartinnerani pisussatut pilersaarutigineqaraluarpoq. Danmarkimi Angallannermut Aqutsisoqarfiup mittarfiup misissorneqarnissaata kinguartinneqarnissaa EU-Kommissionimut innersuussutigisimallugu Sermitsiamut uppernarsarpaa.
– Misissuinissaq maannakkuugallartoq kinguartinneqassasoq EU-Kommissionimut inassutigaarput, siunissamilu EU-p misissuinera aatsaat 28. november kingorna pisinnaasoq ilimagaarput, Angallannermut aqutsisoqarfik Sermitsiamut paasissutissiivoq.
Aallariartortarfiup ammarnissaa kinguaattoortoq
Naak atlantikoq qulaallugu timmisartut Nuummi mittarfimmut suli minngikkaluartut mittarfiup aallariartortarfia nutaaq juunip 24-ani ammarpoq. Aallartussat aallariartortarfikkut nutaarsunnitsukkut qalipaatersunnitsukkullu sapaatip akunnera ataaseq sioqqullugu tassa juunip 17-ianni aallariartortalereertussaagaluarput.
Ammarnissaata kinguaattoornera qatsisartut ammaannginnermi aaqqiivigineqaqqaartussanik sanaartukkamut nalunaaruteqarnerannik pissuteqarpoq.
Mittarfimmi nutaami nakkutilliivik Angallannermut aqutsisoqarfimmit juunimi akuersissutigineqarpoq. Utaqqisarfinnut isersinnaasunik nakkutilliineq isumannaallisaanermilu periutsit nakkutilliivimmi sulisut malittarisassat malillugit malitassaat assersuutigalugu ilaasussanik misissuinerit nassatanik isumaallisaaneq pillugit misissuineq akuerineqarput.
One Stop Securityli EU-mut angalanissamut ajornaannerulersitsisussaq novembarip 28-at nallertinnagu piareernavianngitsoq, Sermitsiaq.AG-p allaaseraa.
