Nuummiit nunanut tamalaanut timmisartuussisalernissaq kinguarteqqinneqartoq
![](/sites/default/files/styles/image_934x467/public/2024-04/%C3%85benhus_Ny_Lufthavn.jpg?itok=A9IKnQta)
Trafikstyrelsip nunanut tamalaanut timmisartuussinernut piumasaqaatai Nuummi mittarfimmit nutaamit naammassineqanngimmata mittarfimmit aggustip 14-ianili nunanut tamalaanut toqqaannartumik timmisartuussisoqarsinnaajunnaarpoq.
Tamaammat Nuummiit nunanut tamalaanut timmisartuussinissat tamarmik unitsinneqarallarput. Tassa imaappoq Canadami Iqalunnut aamma Islandimi Keflavikkimut timmisartuussinissat.
Nunanut tamalaanut timmisartuussinerit unitsinneqaqqanerat Trafikstyrelsip oktobarip aallartinneranut nakkutilliiartoqqinnissaata sivitsorneqartut Greenland Airports Facebookimi allappoq.
- Ajoraluartumik trafikstyrelsenip kukkunernut nassaarisimasaannut tunngatillugu sukumiisortai tamakkerlugit angummatsinnissaat iluatsinngilaq. Tamanna soorunami uggorisorujussuuarput, Greenland Airportsimi CEO, Jens Lauridsen oqarpoq.
Nunatsinni timmisartuussinerit sunnerneqanngillat.
Sillimaniarneq appasippallaartoq
Nuummiit nunanut tamalaanut toqqaannartumik angalasussat assersuutigalugu kangerlussuarmut Kulusummulluunniit aqqusaaqqaarlutik isumannaallisaavikkooqqaarlutillu angalanissaannik tamanna isumaqarpoq.
- Nunanut allanut timmisartuussinerit ingerlaqqilernissaannut kingulliit aaqqitassat aaqqinnissaat ulapputigivagut, tamatumalu sullitatsinnut ilaasunullu akornusiinernik malitseqarnera ajuusaarutigeqqipparput, Jens Lauridsen oqarpoq.
Nunanut tamalaanut timmisartuussisalernissanik kinguartitsineq Greenland Airportsip mittarfimmik ingerlatsisup "nunanit allanit timmisartuussinerit isumannaatsuunissaat pisariaqartumik isumagisinnaanngikkai" aggustip qiteqqunnerani paasineqarmat aallartippoq.
Greenland Airportsip tusagassiuutinut nalunaarummi siusinnerusukkut "matut parnaaqqanngitsut taamaalillunilu akuersissuteqanngitsut iserfigeqqusaanngitsunut isernissaat periarfissaanerat" kukkunertut pineqartunut assersuutigai.
Nunanit tamalaanit mittarfimmut mittoqarsinnaavoq.