Nuuk Imeq ullumikkut matuvissorpoq
Ullumikkut ulloq Nuuk Imermi sulisunut immikkuullarippoq, tunisassiorfimmi ullumikut matussooq taamaattumillu sulisut suleqqissanngillat.
Imeruersaatissanik ukiuni aqqanilinni maqitsisartuusoq, Nuka Enoksen, ullumikkut naggammik sulivoq.
- Eqqumiilaarpoq, kingullermik maqitsinitsinninngaanniit allaannerummat, taanna oqarpoq.
- Artornalaarpoq, uku suleqatit maqaasinassapput. Ilaqutariiarannguatut taamannak ataatsimooqatigiittarnerput maqaasinassaaq aamma immitsinnut ilisarisimanerput.
- Kalaallit Airportsimut januaarip aallaqaataani suliartussaanga, arlaliulluta tamattaanngitsorli, Nuka Enoksen oqarpoq.
- Ilanngui suli suliffissarsinnginnamik, Nuka Enoksen nangippoq.
Nuuk imermi sulisuusut Kalaallit Airportsimit mittarfittaassarsuarmi ukiup tulliani novembarimi ammartussami sulerusunnersut saaffigineqarnikuupput. Nuka Enoksenillu sulilernissani qilanaaraa.
- Misigisassaq nutaaq uannga naleqqiullugu allaanerummat qilanaartorujussuuvunga, maqitsisartoq 55-inik ukiulik oqarpoq.
Tunniutiinnartut
Nuuk Imerup matuneranut poortuutissat pillugit inatsit januaarip allaqqaattani atuutilersussaq peqqutaavoq. Inatsisitaassap kingunerisssavaa, poortuutissanik nunani allaneersunik nunatsinnut eqqussuisoqalissasoq, taamaammallu tunisassiuinnarnissaq imminut akilersinnaanavianngitsoq, Nuuk Imeq isumaqarpoq. Piginneqatigiiffiullu qillertuusaanut puiaasaaqqanullu Danmarkimeeersunut unammillernani tunniutiinnarpoq.
- Sulisunik ataatsimiisitsigatta oqarpunga, aatsaat taama ajuusaarnartigisumik pikkunaatsigisumillu misigisaqarlunga siulersuisuni arlariinni sulisarninni, Kuupik Kleist KNR-imut apriilimi oqarpoq.
Nuuk Imermilu sulisut 50-it missaanniittut taamaalillutik suliffisarsiortussanngorput. Sulisullu ilaat suliffittaareerput, 39-inik ukiulik, Ria Hansen, Nuuk Imermi truckertutut ukiuni 18-ingajanni sulisimasoq, suliffissarsisimasunut ilaavoq.
- Ukiorpassuit sungiusimallugu toqqissisimaffigalugu qimalerlugu artornarpoq - annernarpoq, taanna oqarpoq.
Ria Hansen suleqatimi ilaattulli Kalaallit Airports-imi sulilersussaangaluarpoq, Nuussuulli atuarfiani sulilissalluni aalajangerpoq.
-Ukiorpassuit inulerinikuunnginnama pissangavunga. Allagartara atorlugu sulilertussaangama pissangavunga, Ria Hansen, isumaginninnermi ikiortitut ilinniarsimasoq, oqarpoq.
Iggavimmiuunermiit isumannaallisaasunngulersoq
Taakkua suleqataat, 46-nik ukiulik Maren Blytmann ukiuni aqqaneq marlunni iggavimmi sulisimavoq. Mittarfissarsuarmili ukiortaamiit isumannaallisaasunngussaaq.
Ullumikkut Nuuk Imermi naggammik sulivutit, qanoq misigivit?
- Qanoq nassuiassanerpara, qanoq oqassanerpunga. Misigissutsit tamaasa pigaakka. Nuannaarlungalu ungallugalu matulernera pissutigalugu. Ajoraluaq taamatut qimaleripput.
Nuuk Imeq immiaaqqanik imeruersaatinillu allanik 1989-imiilli maqitsiffiusarpoq. Imeruersaatit puiaasaaqqanut, atoqqitassaasunut, maqinneqartarput. Atortorissaarutilli puiaasaaqqanik utertitsiviit puiaasaaqqanut qillertuusanullu, Danmarkimi niuertarfinni atugaasunut, naleqqukkunnaarput.
Sulisulli ilaanut suli ammassaaq
Nuuk Imermi maqitsineq kingulleq decembarip aallaqqaataani pivoq, tamanna peqqutigalugu karsit, simiit, sodavandillu puukui atoqqinneqartussaanngimmata maanna sequtserneqarput. Taakkulu naammassineqarpata maskiinat maqitsissutaasartut piiarneqassapput. Aasamut sulisuerunnissaa naatsorsuutigineqarpoq.
