Nuuk Imeq matulerpoq: Aatsaat taama ajuusaarnartigisumik misigisaqarpunga
Nuuk Imerup 2024-mi januaarip aallaqqaataani matuneqarnissaa piginnittut isumaqatigiissuteqarfiusumik akuersissutigaat.
Puiaasaat pillugit inatsit nutaaq atuutilerpat maqiterivik akilersinnaajunnaassoq taakku nalilerpaat.
Aalajangiinerlu tamanna siulersuisut siulittaasuannut, Kuupik Kleistimut alianarluinnarpoq.
- Tassa ullaaq manna nipaattorujorujussuuvoq aamma ilimangaara amerlanerit ilimatsaassimagaat sumut ingerlanersugut, Kuupik Kleist oqarpoq, nangillunilu:
- Sulisunik ataatsimiisitsigatta oqarpunga, aatsaat taama ajuusaarnartigisumik pikkunaatsigisumillu misigisaqarlunga siulersuisuni arlariinni sulisarninni.
Akilersinnaanngitsoq
Naalakkersuisut puiaasat pillugit inatsisaat nutaaq 2024-mi januaarip aallaqqaataani atuutilertussaq matusisoqarnissaanut pingaarnertut pissutaavoq.
Inatsisip nutaap kingunerisaanik puiaasat allat nunanit allanit eqqussorneqarsinnaalissapput, taamaammat suliffeqarfiup ingerlatiinnarnissaa akilersinnaanavianngitsoq Nuuk Imeq isumaqarpoq.
- Nalunngisarput unaavoq aammaanneqarniartut suulluunniit qanorluunniit poortuutillit, taamaalillutalu ilimagilluinnarlutigu uagut tunisinnaasagut appariassasut avataaninngaanniik eqqussuunneqartut eqqarsaatigalugit, taamaattumillu piginnittut taamatut aalajangertariaqalersimallutik, Kuupik Kleist KNR-imut oqarpoq.
Kuupik Kleistip siulersuisullu sinnerisa sulisut 50-it missaanniittut siunissami ingerlaqqinnissaat qulakkeernissaat maanna pingaarnertut sulissutigisussanngorpaat.
- Tassa ullumimiik aallartittumik pisortaanerup sulisut ataasiakkaarlugit oqaloqatigisussaavai siunissaq pillugu. Aamma ukiup sinnerani sapinngisamik ataannarnissaat qulakkeerumallugu, qulakkeernikuuarput aningaasarsiaqassasut suliffeqarsinnaasut, siulersuisut siulittaasuat oqarpoq.
Carsbergip nioqqutaatitik 2024-mi januaarip aallaqqaataata kingorna tunisassiariinnarniluarlugit nalunaarutiginikuuaa.
Assigiinngissutaanilli malunnarnerpaasussaq tassaavoq taakku nunatsinni utertittakkanik pooqarunnaarlutik qillertuusanik puiaasanillu danskit niuertarfiini utertinneqarsinnaasunik pooqartalissammata.
