Nuuk Imermi pisortaq: Nuuk imeq matorataannaavoq

Nunatsinni immiaaqqanik sodavandinillu maqitsiviup, Nuuk Imerup siunissaa nalorninartumik inissisimavoq.

Nuuk Imermi pisortaq, Bernhard Christensen taama oqarpoq.

- Nalorninartorujussuarmik inissisimavoq. Inatsisartut immiaaqqat sodavandillu puui pillugit inatsisiliornerisa, utertitseriaatsillu allanngortinnerata kingunersaanik, nunanit allaniit puunik allaanerusunik eqqussisoqartalertussaavoq. Tamanna Nuuk Imermut annertuumik kinguneqartussaavoq, pisortaq oqarpoq nangillunilu:

- Tamanna Nuuk Imermut kingunerlutsitsisussaavoq, ullumikkutut maqitsisarnermiit annikinnerulersitsissaaq. Tamannalu Nuuk Imerup matuneranik kinguneqaratarsinnaavoq.

AAMMA ATUARUK Nuuk Imerup Brugsenillu sodavandinik unioqqutitsisumik tuniniaasoqartarneraraat

Tamanna Nuuk Imermi maqitsisarnermut kingunerlutsitsisinnaavoq.

- Maqittakkagut ikiliartussappata, suliffeqarfissuarlu taama angitigisoq, taava taakku imminnut ataqatigiinngillat. Maqitsinerit tunisinnaasallu ataqatigiinnavianngillat, Bernhard Christensen oqarpoq.

Suliffeqarfik maanna ilungersunartumik inissisimasoq taassuma ilanngullugu oqaatigaa, Nuuk Imeq matoratarsinnaammat.

Nunatsinnit nunatta avataanilluunniit maqitanik tuniniaaneq 

Inatsit nutaaq Nuuk Imermut kingunerluuteqarsinnaagaluartoq, Nuuk Imeq maanna suli ajunngitsumik ingerlavoq.

Inatsisip nutaap atuutilernerata kingorna Nuuk Imeq maqitsinikkut allatulluunniit iluaqutaasinnaassasoq, Bernhard Christensen neriuuteqarpoq.

- Inatsit nutaaq atuutilerpat qanoq iluaqutaasinnaasumik arlaannik ujartuiumaarpugut. Kisianni utertitseriaatsit qanoq ittut atorneqassanersut naluarput, utertitsisarnermut aningaasartuutit qanoq atorneqassanersulluunnit. Taamaammat tamanna uatsinnut nalorninartorujussuuvoq, taanna oqarpoq.

Nuuk Imeq nunanit allaneersunik unammillerteqalissappat, Nuuk Imerup maqittagaanik tuniniaasinnaaneq unammillernarsinnaanissaa, Bernhard Christensenip naqissuserpaa.

- Nunarput mikisuaraavoq, taamaammat tunisassiarisinnaasatta annertussusaasa aalajaannissaat pisariaqarpoq. Suliffeqarfik ingerlaannassappat pisisartullu 50.000-iullutik taava pisisartut taakku tamaasa atorfissaqartippagut.

- Ersarissunik sinaakkutissanik aaqqiisoqanngippat taava nunatta iluani maqitanik tunisassiorsinnaaneq ingerlanneqarsinnaanngilaq, Bernhard Christensen oqarpoq.