Nuuk Imerup Brugsenillu sodavandinik unioqqutitsisumik tuniniaasoqartarneraraat
Sumiiffinni assigiinngitsuni sodavandit qillertuusaniittut unioqqutitsisumik tunineqarneqartarput. Taakku pisiniarfiit peqqumaasiviiniit, kioskit aamma niuertut minnerusut ilitsiviiniit nittartakkatigullu tuniniarneqartarput. Nunatsinni sodavandit tunisat 5 procentii tikillugit inatsisaatsuliornikkut tunisaasartut Nuuk Imiup nalilerpaa.
Nuuk Imermi pisortaq, Barnhard Christensen taama oqarpoq, taassuma unioqqutitsisumik tuniniaaneq aallaqqaammut Nuummiinnaanerugaluartoq oqaatigaa.
- Taama nioqquteqarneq kioskinit pisiniarfinniillu minnerusunit takussaavoq, aamma sinerissami ukiut ingerlanerini sodavandinik qillertuusanik tuniniaaneq annertuneruleriartortoq takuarput, pisortaq oqarpoq.
Politiit nunatsinnilu politikerit ajornartorsiutaasumut tamatumunnga iliuuseqarnissaat tulluassaaq", Brugsenip aningaasaqarnermut pisortaa Jes Nyborg oqarpoq.
Taassuma ukiorpassuarni iluatsittumik unitsinneqarnani unioqqutitsisumik nioqquteqartoqartarnera tunngaviusumik ajornartorsiutaasoraa.
- Saqqumisumik unioqqutitsisoqarpoq. Isornartorsioraangatsigu, politiinut unnerluutigigaangatsigu kommunimullu paasissutissiissutigigaangatsigu iliuuseqartoqarpallaarneq ajorpoq, taanna oqarpoq.
Puiaasanik utertitsisarnermut ajornartorsiutaasoq
Bernhard Christensenip sodavandit pineqartut utertitsisarnermut ilaatinneqalersinnaagaluarpata tuniniarneqarnissaa ajornartussaqartinngilaa. Tamannali periarfissaanngitsoq naliliivoq.
Taanna nassuiaavoq, Pepsimeesut, assersuutigalugu Spritet puiaasamiittut, tuniniarneqaqkkajunnertut, Nuuk Imerli taakkua tuniniarnissaannut akuersissutisisinnanngilaq.
Nuuk Imeq sodavandinillu tuniniaaneq
- Nunatsinni kommunini nakkutilliisussaatitaasuusut nunatsinni puiaasut pillugu nalunaarummi allassimavoq.
- Nuuk Imeq taamani Namminersornerullutik Oqartussat sodavandinit immiaaqqanillu igalaaminernik qillertuusanillu mingutsitsineq aqussinnaalerumallugu utertitsisarnermillu pilersitsiumallutik 1989-imi pilersippaat,
- Naak immiorfiit unammisut marluk angisuut Carlsberg aamma Royal Unibrew akerliungaatsiaraluartoq Namminersornerullutik Oqartussat taakku akisussaaffimmik tigusitillugillu Nuuk Imermut piginneqataaleqquai. Meqiterivik Carlsbergimit Royal Unibrewimillu nioqqutissanik tunisassiorsinnaanissamut akuersissuteqarfigineqarpoq.
- Nuuk Imiup naak sodavandinik qillertuusanik tuniniaanermut atatillugu unammillernartorsioraluarluni 2020-mi 49,5 millionit koruuninik sinneqartooruteqarnini saqqummiuppaa.
Tamatuma saniatigut Nuuk Imeq utertitsitsisarnermi qillertuusanik utertitsisoqarnissaanut atortorissaaruteqarnanilu periarfissaqanngilaq.
- Qillertuusat Europamiit tikisinneqarlutik maani immerneqartassagaluarput, akisuallaarporli. Taamaammat sodavandit nassiunneqannginnerini qillertuusaniilereersinneqarsinnaapput, nunatsinnummi nassiussineq aningaasartuutaanerpaasarpoq, pisortaq nassuiaavoq.
Immiaaqqanik nioqquteqarneq maqiteriviup 1989-imi sananeqarneraneraniit apparnikuuvoq. Immiaaqqanillu nioqquteqarneq annikillereernikuusoq sodavandinik nioqquteqarnerup eqqugaannginnissaa pingaaruteqartoq, Nuuk Imermi pisortaq ilanngullugu oqarpoq.
Sodavandinik nunatsinnut eqqussuisoqartassaguni, taava tamanna sodavandinik nioqquteqarnerup ataatsimoortup ilarujussuanik inangiisasoq taanna naliliivoq.
Brugsenip politikkikkut iliuuseqartoqarnissaa kissaatigigaa
KNR-ip nunatsinni nioqquteqarfiit annerit pingasut, tassa KNI, Kalaallit Nunaanni Brugseni aamma Pisiffik attaveqarfigai. KNI Pisiffilluunniit sodavandinik qillertuusaniittunik unioqqutitsisumik tuniniaasoqartarneranut ilisimasaqarnerlutik akissuteqarusunngillat.
AAMMA ATUARUK Nuuk Imeq piginnittunut millioninik nutaanik sinneqartoortitsisoq
Kalaallit Nunaanni Brugsenip tuniniaanermut aningaasaqarnermullu pisortaata, Jes Nyborgip mailikkut akissuteqarluni tassunga tunngasumik ajornartorsiuteqartoq uppernarsarpaa.
- Tuniniaavinni assigiinngitsuni sodavandinik qillertuusanik tuniniaasoqartarnera ilisimavara. Tamatuma Brugsenip sodavandinik nalinginnaasunik tuniniaaneranut qanoq sunniuteqartiginera kisitsisinngorlugu uppernarsarsinnaanngilara. Sodavandinilli qillertuusaniittunik tuniniaaneq sodavandinik tuniniaanermut ataatsimoortumut ilaaatigut inangiisimassasoq ilimagaara.
Assi: Bernhard Christensen Nuuk Imermi 2008-mili pisortaalerpoq.
Taanna Nuuk Imermi pisortatulli akisussaasunut ersarissumik kaammattuutissaqarpoq.
- Politiit nunatsinnilu politikerit ajornartorsiutaasumut tamatumunnga takunngitsuusaaginnarnagu ajornartorsiutaasullu qaangiunnissaa neriuutigiinnarnagu iliuuseqarnissaat tulluassaaq, taanna oqarpoq.
Brugsenip sodavandit pineqartut tuniniarneqartarnerat inatsisinillu unioqqutitsisunut kingunerluuteqarujussuartannginnera pissutigalugu tuniniarnissaat eqqarsaatiginikuusimagaa paasissutissiissutigaa.
- Isumaliutiginikuuarput, kisianni nunatsinni inatsisit malittarisassallu malillugit ingerlatserusunneruvugut.
