Nuuk Imeq piginnittunut millioninik nutaanik sinneqartoortitsisoq

Nuummi meqiterivimmi immiaaqqat, imeq, sodavandillu illoqarfiit pingaarnersaannut nunallu sinneranut tunineqartarput, tunisaqarnerunerlu suliffeqarfimmut siuariartitsivoq.

Nuuk Imeq 2020-mi 49,5 millionit koruuninik sinneqartooruteqarpoq. Tamanna ukiup siuliani sinneqartoorutinut 31,1 millionit koruuninut sanilliullugu 15 millionit koruunit sinnerlugit siuariarneruvoq.

- Ukiumi angusat inerneri akileraartinnani missingersuutinit 11.589 t.kr-nit annertunerupput, tamanna pingaartumik isertitaqarnerunermik pissuteqarluni, siulersuisut, pisortaanermit, Bernhard Christensenimit siulersorneqartut allapput.

Nuuk Imermit immiaaqqap, imeq, sodavandillu nioqqutissiarineqartut 2020-mi 2,4 procentimik annertusineqarput, siulersuisut paasissutissiipput.

Angusalli kisimik annertusinngillat. Nuuk Imermit tunisat 2019-imut sanilliullugit 209,7 millionit koruuninngorlutik 8,3 millionit koruuninik annertunerulerput.

Naak coronaqaraluartoq pitsanngoriartortoqartoq

Naak 2020-mi coronamik nunarsuaq tamakkerlugu tunillaassuuttoqaraluartoq nunatsinnilu matoqqasoqaraluartoq siuariartoqarpoq. Assersuutigalugu siorna aasaanerani takornariartukinnerujussuuvoq.

- Corona pissutigalugu 2020-mi pissutsit amerlasuut nalinginnaasumik angalaffigalugulu takornariarfigisagaanni tunisakinerusoqarnera qularnanngilaq, ”nunallu iluani angalasoqarnerani” nunatta iluani tunisaqarnerusoqarneranik kinguneqarnersut qularnaannerulluni, naatsorsuutini allassimavoq.

Maqiterivik Nuummiittoq Kommuneqarfik Sermersuumit, Royal Unibrewimit, Carlsbergimit Coca-Colamiillu pigineqarpoq. Suliffeqarfiup immiaaqqat, imeq, sodavandillu maqitertarpai nunatsinnilu pisiniarfinnut neriniartarfinnullu tunisarlugit.

Kommuneqarfik Sermersuumut 19 millionit koruuningajaat

Kommuneqarfik Sermersooq piginneqataassutsiminit 36,28 procentimit 18,9 millionit koruuninik iluanaaruteqarpoq. Tamanna 2019-imut sanilliullugu 1,8 millionit koruuninik qaffariarneruvoq.

Nuuk Imeq iluanaarutinut, akitsuutinut akileraarutinullu 174,1 millionit koruuninik tunniussaqarpoq. Matumani immiaaqqanut akitsuutit 108,5 millionit koruuniullutik.

Naak Nuuk Imeq 2020-mi nalinginnaasumik siuariaraluartoq ukioq manna ilunersunarnerussasoq, siulersuisut naliliipput. Tamanna maqiterivik naapertorlugu kulsyrenik akulinnik nakkutiginninnerup ajornarneranik ilaatigut pissuteqarpoq.

- Nuuk Imerup tunisassiai imeruersaatinit kulsyretalinnit, inertequtaanerat apeqqutaatinnagu akornuteqanngitsumik eqqussuunneqarlutillu tuniniarneqartunit, oqartusssaasunit nakkutigineqanngilluinnarpasittuunit, suli unammillerneqassapput, ingerlatseqatigiifiup aqutsisui allapput inerniliillutillu:

- Tamanna avaqqunneqarsinnaanngitsumik Nuuk Imiup sodavandinik nioqquteqarneranut sunniuteqassaaq.

Siulersuisut akileraarneq sioqqullugu 42 millionit koruuninik naammassisaqassallutik naatsorsuutigaat, taakkua 2020-mi inernerusumut akileraarneq sioqqullugu 5´2.2 millionit koruuninut sanulliussassaallutik.