NunaMineralsip akiliisinnaajunnaarnera aatsitassarsiornermut allanik suliassaqartitsilersinnaasoq
- Akiliisinnaajunnaarnermik taama nalunaartoqarmat soorunami ajuusaarnarpoq, Múte Borup Egede oqarpoq.
NunaMineralsilli akiliisinnaajunnaarnerata kingorna misissuinissamik akuersissutai ingerlatseqatigiiffiup nalorninartorsiornerani uninngasut soqutiginnittunit allanit tiguneqarsinnaanngorput.
- NunaMinerlasip suliaanut tunngasut piffissami sivisujaarujussuarmi unittooqqasoqarsimavoq, misissueqqissaarnermut tunngasut akuersissuteqarfiusut uninngasimasut tamatta nalunngilarput. Ajuusaarnaraluartoq taamaalilluni immaqa nutaamut massakkut aallarteqqissinnaanermut periarfissaq aallarteqqilermat taanna pitsaasutut isigineqarsinnaavoq, Múte Borup Egede oqarpoq.
Aamma atuaruk GMM-p pilersaarutaa iluatsingitsoq
TNGG aamma akiliisinnaajunnaartoq
Aamma Aappaluttumi rubinisiorfik, True North Gems Greenland, nalorninartorsioreerluni septembarimi akiliisinnaajunnaarpoq. Ingerlatseqatigiiffiit aatsitassat pillugit suliallit marluk piffissap sivikitsup iluani tassa akiliisinnaajunnaarput.
Nunattali aatsitassarsiorfittut nunanit allanit tusaamaneqarnerata innarlerneqarnissaa Múte Borup Egedep ernumaginngilaa.
- Taamatut akiliisinnaajunnaarnerit pisimapput, kisiannili Nunatsinnut aatsitassarsiornissamut soqutiginninneq suli piuvoq, annertullunilu. Taamaammat aatsitassarsiornermi ineriartornissarput Naalakkersuisuni suli neriuuteqarluarfigaarput, aatsitassanut naalakkersuisoq, Múte Borup Egede oqarpoq.
Aamma atuaruk NunaMinerals akiliisinnaajunnaaqqittoq
NunaMinerals Nunatta Eqqartuussisuuneqarfiata aalajangigaata suliassanngorteqqinnissaanut suli periarfissaqarpoq.
KNR-illi tusarfiisa nalilerpaat taamatut pisoqarnissaa ilimanaateqarpallaanngitsiq, kingullermik suliassanngortitseqqittoqarmat akiligassaqarfinnut tunngatillugu aaqqiissuteqarnissamut ingerlatseqatigiiffiup piffissaqartinnissaa tunngaviummat. Tamannali tassa iluatsinneqarsinnaasimanngilaq.
PISUT EQIKKARLUGIT
Novembarip 16-iani 2017
NunaMinerals akiliisinnaajunnaartutut Nunatta Eqqartuussisuuneqarfianit kingumut nalunaarutigineqarpoq.
Juulip aallaqqaataa 2016
NunaMinerals akiliisinnaajunnaartutut Nunatta Eqqartuussisuuneqarfianit nalunaarutigineqarpoq. NunaMinerals ingerlatseqatigiiffiup ukiuni arlalinni pisortarisimasaanit Ole Christiansenimit akiliisinnaajunnaartutut nalunaarutigineqarpoq. Akiliisinnaajunnaarnerup kingunerisaanik millionilikkuutaanik pissaqartinneqarnini annaassavaa. KNR-ip paasissutissaatai naapertorlugit aningaasat 2 millionit koruunit sinnerlugit pineqarput. Ingerlatseqatigiiffiup aalajangiineq suliassanngorteqqippaa.
Aamma atuaruk Nunaminerals akiliisinnaajunnaartutut nalunaarutigineqartoq
Juunip 14-iani 2016
Akiliisinnaajunnaartoqarneranik nalunaarutiginninnerit marluk Pigisanik agguaassisarnermut eqqartuussivimmi suliarineqartussaagaluarput, ingerlatseqatigiiffilli piffissaq kingulleq annaanneqarpoq. Akiliisinnaajunnaartoqarneranik nalunaarutiginninnerit marluusut sulisunit ingerlatseqatigiiffimmit akiligassaqarfigineqartuneersuupput. Aningaasalli pissarsiarinissaat ingerlatseqatigiiffiup iluatsippaa, nalunaarutiginninnerillu marluusut pinngitsoortinneqarput Pigisanillu agguaassisarnermut eqqartuussivimmi ataatsimiinnissaq taamaatiinnarneqarluni.
Aamma atuaruk NunaMinerals annakkallartoq
Novembarip 26-ani 2015
Namminersorlutik Oqartussat NunaMineralsimik ukiorpassuarni piginneqataanertik taamaatippaat. Tuluit suliffeqarfiutaata Greenland Mining Managementip, GMM, Namminersorlutik Oqartussat NunaMineralsimut 4,5 millionit koruuninik taarsigassarsiarititaat aktianillu piginneqataassutaat tiguaat. NunaMineralsip annaanniarnissaanut pilersaarut GMM-ip saqqummiussaa Namminersorlutik Oqartussanit taamaalillutik akueraat.
Aamma atuaruk NunaMinerals nunanit allamiunit pigineqalerpoq
Maajip 15-iani 2015
NunaMineralsip Greenland Mining Managementillu, GMM oqaloqatigiinnerat ima ingerlalluartigaaq ingerlatseqatigiiffiup akiliisinnaajunnartutut nalunaarnini utertillugu. NunaMinerals tamatumunnga taarsiullugu akilersuinerminik unitsitsivoq.
Aamma atuaruk NunaMineralsip annaanneqarnera nuannaarutigaat
Apriilip 19-aini 2015
NunaMineralsimi siulersuisut sukumiisumik isumaliuteqareerlutik akiliisinnaajunnaartutut nalunaarput, ingerlatseqatigiiffiup annaanniarnissaanut aaqqiissutissamik nassaartoqarsinnaanngimmat.
Aamma atuaruk NunaMineralsip akiliisinnaajunaarnini pisortatigoortumik nalunaarutigaa
Februaarip 22-ani 2015
Ingerlatseqatigiiffik nalunaaruteqarluni allappoq aningaasatigut ajornartorsiortupilussuulluni. Ingerlatseqatigiiffiup ingerlaannarnissaanut aaqqiissutissamik attanneqarsinnaasumik nassaartoqarsinnaanera siulersuisut qularaat.
Aamma atuaruk NunaMinerals akiliisinnaajunnaaratarsinnaavoq
Februaarip aappaani 2015
NunaMinerals A/S-imi pisortaaneq, Ole Christiansen, atorfimminit soraarpoq.
Aamma atuaruk NunaMineralsip pisortaanera atorfimminit tunuarniuteqarpoq
Januaarip 29-ani 2015
Aatsitassarsiornermik suliffeqarfik ingerlanerliorluni matoqqajaasoq immikkut ittumik ataatsimeersuartitsivoq. Ingerlatseqatigiiffiup siunissaa ullormut oqaluuserineqarpoq.
Aamma atuaruk NunaMinerals A/S-ip siunissaa ullumi aalajangiiffigineqassaaq
