Kalaallit nipaat Københavnimi Arktisk Festivalimi tusarsaassasut

Nunarsuarmi DNA-ni pisoqaanerpaaq paasisaqarfigerusuppiuk? Kalaallisut taallianik tusarnaarusuppit? Nunarpulluunniit qitiutillugu nunarsuup immikkoortuini pissutsit qanoq innerinik paasisaqarusuppit?

Taamaappat Københavnimi Nordatlantens Bryggemi Arktisk Festivalimukarsinnaavutit, taannalu ileqquusutut oktobarip 31-annit novembarip aallaqqaataata tungaanut pisarpoq. 

Nunarsuup immikkoortuini pissutsit, ilisimatusarnikkut paasisat nutaat, uaajeerneq atuakkialerinerlu ukioq manna sammineqassapput. Tamanna pillugu, Nordatlantens Bryggemi attaveqatigiinnermut suleqataasup Ivalo Olsvigip oqaatigaa. 

- Kalaallit nipaat oqaluttuaallu ukkataraagut pissutigalugu Issittup nunanit tamalaanit oqallisigineqarnerujussua nalunnginnatsigu, oqarpoq nangillunilu: 

- Oqaloqatigineqarnatik tusarnaarneqaratillu oqaluuserineqapallattarput. Taamaattumik kalaallit nipaasa saqqummiunneqarnissaat ukkatarisorujussuuarput aammali Kalaallit Nunaata arlalitsigut, soorlu illersornissamut politikkikkut EU-mulluunniit tunngatillugu saqqummiunneqarnissaa pingaartissimavarput.  

Aaqqissuussinerit kikkulluunniit peqataaffigisinnaasaat

Ivalo Olsvigip Tunumiutut ukioq manna oqalugiartoqarniarnera aamma erseqqissaatigaa. Tamanna festivalimik aaqqissuisut tulluusimaarutigaat. 

- Tunumiumik sapaammi oqalugiartoqarnissaa pingaartumik tulluusimaarutigaarput, taassuma ’Tunumit piniartorsuaq’ oqalugiaatigissavaa. Kalaallit Nunaat angisoorujussuusoq, Kalaallit Nunaatalu immikkoortuini assigiinngitsuni pissutsit assigiinngitsut tusarnissaat pineqarpoq. Tunumiullu oqaluttuaasa aamma sammineqarnissaat pineqarluni, taanna oqarpoq oqalugiarnerlu danskisut nutserneqassasoq oqaatigalugu. 

Arlallit siorna oqalugiarneranni inissat ulikkaartarsimapput. Assi © : Alda Mohr Eyðunardóttir / Nordatlantens Brygge

Taamaattumik aaqqissuisut, festivalimut peqataaniaraanni, piffissaq sioqqullugu takkunnissaq kajumissaarutigaat. 

Siorna festivalimut inuit 4.000-t missaanniittut peqataapput taamaammallu isertarfimmi ilaatigut tunuleriaattoqarpoq. 

Taamaattumik ukioq manna festivalimi pisussat Nordatlantens Bryggemi, Islandip Aallartitaqarfiani, Kalaallit Nunaata sinniisuutitaqarfiani Broens Gadekøkkenimilu agguataarneqarput.

- Meeqqat ilaqutariillu ukioq manna ukkatarineruagut, paasigatsigu amerlasuut meeqqatik ilagisaraat. Pisarnertut Islandiminngaanneersunik arfininngornermi hiistit sapaammilu qimmit qimuttut sammineqassapput. 

- Saniatigut uaajeertut sammineqarneranni qalipatsitoqarsinnaavoq, inuit pinnguaataat pinnguarineqarsinnaapput Sassuma Arnaalu pillugu oqaluttuartoqassalluni, Ivalo Olsvig oqarpoq. 

Festivalimut peqataaneq akeqanngilaq pisussallu ugguuna takuneqarsinnaapput.