Nunatsinni syfilisimik nappaatillit amerliartortut
Nunatsinni nappaatinut tunillaassortunut akiuiniarnerit angusaqarfiulluaraluartut nappaatinik tunillaassuuttoqartoq suli suliniartoqarnerusariaqartorlu, Peqqissutsimut Siunnersuisoqatigiit 2026-mi ukiumoortumik nalunaarusiaminni allapput.
Nunatsinni kinguaassiutitigut nappaateqartut ukiuni qulini kingullerni amerliartuinnarput.
Inuusuttummi kinguaassiutitigut soorlu syfilisimik nappaateqalersartut aamma amerlapput.
Nunatsinni syfilis 1990-imit 2000-mut nungutinneqangajavippoq, inuusuttut akornanni ernumanartumik maanna tuniluulluni.
Syfilisertummi ukiuni kingullerni qulini amerliartuinnarput. 2015-imut sanilliukkaanni inuit tusindiugaangata ataaseq tunillatsissimasarpoq, inuit tusindiugaangata sisamat maanna tunillatsissimasarlutik.
- Nuna tamakkerlugu ullumikkut syfilisertoqarpoq, pingaartumik inuusuttut akornanni ernumanartumik tamanna tuniluuppoq, nalunaarusiortut allapput.
Syfilisimik nappaateqartut amerleriarnerat eqqarsaatigalugu nalunaartarnerup aallunneqarnerulernera aamma qanoq amerlatigisut tunillatsissimanerannik ilisimasaqannginneq tamatumani pissutaasinnaapput.
Nappaalli tunillaassuuttoq taannaannaanngilaq.
Sakialluttut aalaakkaakannersumik amerlassuseqartut
Sakiallullutik tassa tuberkuloserlutik napparsimasut aalaakkaakannersumik amerlassuseqarput.
Nunatsinni sakialluttut 1980-ikkunniit 2010-imut amerliartorput. Sakialluttut 2010-miamerlanerpaapput tassani 115-iummata.
Maannali ikileriagaatsiarsimapput, ukiunilu arlalinni ukiumut 55-init 85-inut amerlassuseqartarlutik.
- Kalaallit Nunaat tamakkerlugu sakialluttoqarpoq, kisianni Kujataani Tunumilu amerlanerpaapput, nalunaarusiortut allapput.
Sakiallunneq inuit inuuniarnikkut ajornartorsiuteqarnerusut akornanni takussaanerpaavoq.
Sakialluuteqalertarneq meeraanermi akiuussuserneqarsimannginnermit aamma aallaaveqartarpoq.
Nunatsinnimi meeqqanik akiuussusersuisarnermi najoqqutassiamik tunngaveqartumik akiuussuserneqartut akiuussuserneqarsinnaasut ilaannaraat.
Hebatitissimut sakialluummullu inunngornermiit qaammatip ataatsip qaangiunnerani akiuussuserneqartut 2017-imi 84 procentiupput.
Nappaatit tunillaassuuttut akiorniarlugit nuna tamakkerlugu akiuussutissalersuinermi akisussaasuusoqalernissaa Peqqissutsimut Siunnersuisoqatigiit ilaatigut innersuussutigaat.
