Nunarput Nunat Avannarliit Siunnersuisoqatigiivini siulittaasumut tullersortaaffeqalersoq
Danmark, Kalaallit Nunaat Savalimmiullu nunat avannarliit inatsisartuisa akornanni pisortatigoortumik suleqatigiiffiusumi Nunat Avannarliit Siunnersuisoqatigiivini 2027-mit siulittaasuuffeqalissapput.
Folketingi tusagassiuutinut nalunaarummi paasissutissiivoq.
Folketingimut ilaasortaq, Liberal Alliancemeersoq, Lars-Christian Brask Nunat Avannarliit Siunnersuisoqatigiivini siulittaasunngorpoq.
Taanna siulittaasutut Nunat Avannarliit Siunnersuisoqatigiivisa Finlandip illoqarfiisa pingaarnersaanni, Helsinkimi, Finlandip siulittaasuuffimmik tunniussiffigisaani sisamanngornermi ataatsimiinnermi, toqqarneqarpoq.
Danmark 2027 tamakkerlugu siulittaasuuffeqassaaq. Siulittaasuuffik nunani avannarlerni nunat tallimat akornanni paarlakaajaanneqartarpoq.
Lars-Christian Brask danskit Nunat Avannarliit Siunnersuisoqatigiivini sinniisuinut 2023-mili siulittaasuulerpoq, taamaammallu Danmarkip Nunat Avannarliit Siunnersuisoqatigiivini siulittaasuuffeqalernerani maanna siulittaasunngorluni.
Taassuma siulittaasutut "Nunani Avannarlerni inatsisartunut tunngasut aqunneqartartut" nassuiaatigaa.
- Folketingimisulli taasissutigineqartussanik siunnersuusiorsinnaavugut, taakkulu Ministerit Siunnersuisoqatigiivinut atuutsitsilertussanut ingerlateqqinneqartarlutik, Lars-Christian Brask Ritzau-imut oqarpoq.
Nunat Avannarliit Siunnersuisoqatigiivi taamaammat EU-mi Europa-Parlamentimut assingusutut nassuiaatigineqarsinnaavoq.
Kalaallit Nunaat Savalimmiullu Kunngeqarfik Danmarkimut ilaasutut præsidentimut tullersortaaffik ukiup tulliani avissavaat.
Justus Hansen Demokraatineersoq ukiup affaani siullermi siulittasumut tullersortaassaaq, Savalimmiormiulu Sunnvá Dahl Høgfeldt Sambandsflokkurinimeersoq ukiup affaata tulliani tullersortaassalluni.
Nunat Avannarliit Siunnersuisoqatigiivi nunanit avannarlernit inatsisartunik katillugu 87-inik ilaasortaqarput.
/ Ritzau
