Norgemiut ilinniartunut umiarsuaat Nuummut tikissasoq
Ilisimatusartut ilinniartullu 40-ngajaat Nuummut marlunngorpat tikissapput. Norgemiut umiarsuaat S/S Statsraad Lehmkuhl illoqarfiit pingaarnersaannut tikippat taamaattoqassaaq.
Suliniut One Ocean nittartakkamini taama allappoq.
Umiarsuaq Sullorsuakkut angalaffigineqannginnermini Nuummi sapaatit akunnera kisaqqassaaq. Ilinniartut Issittumi Sullorsuakkoornerminni Issittumi allanngorarnernut siulittuuteqarsinnanissaannut sungiusarneqassapput.
Issittumiinnerup saniatigut ilinniartut isummanik assigiinngitsorpassuarnik tusarnaartassapput. Ilinniartummi assigiinngitsorujussuarni peroriartorput.
Amerlanersaat Europap kujasissortaani Portugaliminngaanneerput, kisianni aamma Norgemiut USA-miullu ilaassapput. Aamma ilinniartut nunatsinneersut ilaassapput.
Nittartakkami allaqqasut naapertorlugit, nunanit arlalinnit ilinniartut nunat inoqqaavisa ilisimasaannik paasisaqarnissaat siunertanut ilaavoq. Umiarsuaq Nuummiinnerup saniatigut aamma Canadami Iqaluktuttiamut Alaskamilu Uqsuqtuumut tikissaaq. Sullussuakkoorneq Alaskami sumiiffimmi tassani oktobarip ulluisa sisamaanni naammassissaaq. Tassalu ilinniartut isummanit kulturiniillu assigiinngitsunit pissarsiaqarnissaminnut periarfissaqarluassapput.
- Nunanit assigiinngitsunit ilisimatusartut angalanermi kammagiilissasut ilimagaara. Ilinniartut uku nunarpassuarneersut assigiinngitsunillu kultureqarlutik peroriartortut silap pissusaanut immamullu ilisimatusartuni kinguaarinni tulliupput. Ilisimatusaatinillu assigiinngitsunik suliallit nunaniillu assigiinngitsuneersut ikioqatigiissinnaanissaat matumani angusassatsinni pingaaruteqarluinnarpoq, Bergen Universitetimi professori Kerim Nisancioglu nittartakkamut oqarpoq.
Angalanerli ilinniartunuunnaanngilaq. Imaq ilisimatusarfigineqartupilussooreeraluartoq ilisimasagut suli amigartorujussuit ilisimatusartut allapput. Statsraad Lehmkuhlilu ilisimatuut umiarsuaannit allanit tikiffigineqarpiarneq ajortunut angalasarpoq.
Umiarsuaq ilisimatusarnermut atortorissaarutinik nutaaliaasunik atortulersorneqareerpoq, taakkulu atorlugit, ilisimatusartut ilaatigut uumassusillit assigiinngisitaarnerannik, immami avatangiisinik inuillu immamut suniutaannik misissuissapput.
Sullorsuakkoorneq suliniummut annerujussuarmut ilaavoq. Statsraad Lehmkuhl nunavissuarni pingasuni umiarsualivinnut 27-nut 2025-p 2026-llu ingerlanerini tikissaaq.
Kaffillissasut
Umiarsuaq Nuummiittunut pingasunngorpat juulip ulluisa 30-anni nalunaaqutaq 14:00-imit 17:00-imut ammassaaq.
Taavalu Kunngeqarfiup Danmarkip Issittumi Siunnersuisoqatigiinnut Siulittaasuuffia umiarsuarmi aggustip ulluisa sisamaanni ullaakkut nalunaaqutaq qulingiluanit unnukkut arfineq-marluk tungaanut kaffillertoqarpoq. Tassani ilaatigut Kommuneqarfik Sermersuup borgmesteria, Avaaraq Olsen,peqataassaaq. Kaffillernermi susoqassanersoq uani takusinnaavat.
