Aarlerisaarutit uteqqittut – meeqqanulli inuusuttunullu sanngiinnerpaanut iliuuseqartoqanngitsoq

Naalakkersuisut ulloq unnuarlu paaqqinnittarfiit aamma ulloq unnuarlu neqeroorutit pillugit ukiumoortumik nalunaarutaat qaammatip siuliani saqqummermat ukiut siuliini inerniliissutaanerpaasartut uteqqinneqarput.

Ajornartorsiutit taakkuuginnarput – ukiuni arlalinni oqaatigineqartaraluarlutik suli aaqqiivigineqanngillat.

Ilisimatusarfimmi CARE-imi aqutsisup, lektorip, Bonnie Jensenip ukiumoortumik nalunaarusiat ukiuni kingullerni assinguneruleriartortut, nalunaarusianilu tamani quppernerpassuit siulliit ulloq unnuarlu paaqqinniffiit suliamilu sammisat pillugit paasissutissat atoqqitaaginnartartut maluginiarpaa.

- Nalunaarusiat ukiut tamaasa uteqqiinerusarput, tamannalu ajornartorsiutaavoq. Aaqqiissutissatullu siunnersuuteqartoqanngilaq, taanna oqarpoq.

Naak periusissianik innersuussutinillu amerlasuunik piareersimasoqarluartoq iliuuseqartoqanngitsoq, Bonnie Jensen erseqqissaavoq.

Assersuutigalugu malitseqartitsinermut tunngasoq nalunaarusiarpassuarni allani misissuiffigeqqissaarneqareersimavoq.

Isumaginninnermut Naalakkersuisoqarfik 2020-mi periusissiatut pilersaarusiorpoq, tassani malitseqartitsinerunissaq innersuussutigineqarpoq. Isumaginninnermut Aqutsisoqarfik 2017-imi 2019-imilu aamma taamaaliorpoq. Tamatuma saniatigut siunnersuinermik suliffeqarfinnit arlalinnit innersuussuteqarpoq.

- Tamanna pillugu nalunaarusiornermut nukissanik atuinnginnerulluta pigeriikkatta atuutsilernissaannut nukissanik atuisariartugut eqqarsaatigilerpara, taanna oqarpoq.

Iliuusissamut pilersaarutit iliuuseqarfigineqanngitsut

Naalli iliuusissatut pilersaarusiaqaraluartoq taakku ukiumoortumik nalunaarutini ersarinngillat.

Angajoqqaat meeqqanik sumiginnaasarnerat akiorniarlugu nuna tamakkerlugu iliuusissanut pilersaarut 2020-2030-mi meeqqanut inuusuttunullu kannguttaatsuliornermik pissusilersortartunut iliuuseqartoqassasoq ilaatigut allassimavoq.

- Taakkununngali ulloq unnuarlu paaqqinniffeqareersoq nalunaarusiami allassimanngilaq, Bonnie Jensen oqarpoq.

Nalunaarusialli suliassaqarfimmut tassunga ”malittarisassat amigaataasut” eqqaavaa – naak taakku pillugit iliuusissatut pilersaaruteqartoqareeraluartoq.

Periusissiaqareerpoq. Ulloq unnuarlu paaqqinniffinnut annerusumik minnerusumilluunniit tunngasunik nalunaarusiarpassuaqareerpoq, Bonnie Jensen oqarpoq. Taakkuli arlannut atorneqarpat? Tamanna taassuma takusinnaavallaanngilaa.

Malitseqartitsineq amigaataasoq – inuusuttullu susarnersut arlaannit ilisimaneqanngitsoq

Ukiumoortumik nalunaarusiami ajornartorsiutaasoq alla malunnartoq inuusuttunut 18-iliisunut paaqqinnittarfinniikkunnaartunut malitseqartitsisarnerup amigaataaneranut tunngavoq.

Inuusuttunut paaqqinniffinni ukiuni arlalinni najugaqarsimasunut paaqqinniffik attaveqaataani pingaarnerpaavoq. Taamaammat paaqqinniffimmiikkunnaaraangamik kisimiikkajuttarput.

Inatsisip kommunit malitseqartitsinissamut neqerooruteqarsinnaatippai, tamannali qaqutiguinnaq pisarpoq.

- Ph.d-liannut malitseqartitsinermik suliaqarama meeqqat apersorsimasakka pissarsiariniarsaraakka, taakkunanngali amerlasuut tammarsimapput.

- Taakkulu pissarsiarisinnaannginneranut soorunami pissuterpassuaqarsinnaavoq. Aqqusinermut pisinneqarsimasinnaapput, Danmarkimukarsimasinnaapput imaluunniit toqusimasinnaallutik, Bonnie Jensen oqarpoq.

Tamannali paasineqarsinnaanngilaq. Kommunimmi inuusuttut inissiisarfimmiikkunnaaraangamik qanoq ingerlalluartiginerat pillugu nalunaarusiortussaatitaanngillat.

Eqimattat sanngiinnerpaat ilaat taamaalillutik aaqqissuussaasumik malinnaavigineqarneq ajorput – susimanerallu pillugu erseqqissumik takussutissaqarani.

"Sooq suliassamut pingaarnerpaamut akileerusunngilagut?"

Sulisut piginnaasallit uteqqiasumik sammineqarpoq – tamannalu siullerpaamik 2001-mi ukiumoortumik nalunaarusiortoqarneraniilli eqqaaneqartarpoq.

-  Suliassani pingaarpaat ilagigaat oqaatigineqaannavippoq, meeqqallu siunissaraagut. KIsianni perorsaasut suliaqartussat akilerusunneqanngillat, Bonnie Jensen oqarpoq.

Perorsaasut suliffimmiiginnarnissaat pillugu akissarsiatigut atugassarititat pitsanngorsarneqarnissaat, Pinaveersaartitsinermut Siunnersuisoqatigiit 1996-imili innersuussutiginikuugaluarpaat.

Naalli ukiup aallartinnerani perorsaasut akissarsiaqarneruleraluartut sulisussanut pilerinarsaanissamut attassiniarnermullu suli appasippallaarput.

- Perorsaasut akissarsiatigut atuarfimmi ilinniartitsisunit inunnillu isumaginnittunit akissarsialunnerujuaannartutut isigaakka. Suliffiit nikinganerat ilanngukkaanni sooq perorsaasussaaleqinersugut nassuiaatissartaqangaatsiarpoq, taanna oqarpoq.

Bonnie Jensenip suliassaqarfimmi allannguisoqarnissaa neriuutigaa – ajornartorsiutilli taakkuujuaannartut aamma erseqqissaatigalugu.

Naalli aaqqiissutissatut siunnersuuteqartoqareeraluartoq taakku iliuuseqarfigineqarnerannut ersarissumik suli takussutissaqanngilaq.