Ulloq unnuarlu angerlarsimaffinni unammilligassarpassuit
Ulloq unnuarlu paaqqinnittarfiit aamma Ulloq unnuarlu neqeroorutit Ukiumoortumik nalunaarutaat 2024 Naalakkersuisunit saqqummiunneqaqqammerpoq.
Nalunaarummi meeqqanut inuusuttunullu ulloq unnuarlu paaqqinnittarfinni kiisalu inunnut innarluutilinnut ulloq unnuarlu neqeroorutini unammillernartut erseqqissarneqarput.
Sumiiffinni arlallinni sulisussaaleqineq, aningaasaliissutit amigaataasut kiisalu meeqqat inuusuttullu immikkut pisariaqartitsisut ikiorsinnaanerannut periarfissat annikitsuaaranerat, nalunaarusiami oqaatigineqarpoq.
Ilinniarsimasunik sulisussanik amigaateqarneq
Ilinniarsimasunik sulisunik amigaateqarneq ajornartorsiutini annerpaajuvoq.
Meeqqanut inuusuttunullu sullissivinni najugaqartartut ilaasa pisariaqartitaat sakkortusarput, tamanna sulisunut aaqqiissuteqarniarnermut ajornartorsiutaalersarpoq.
– Meeqqat ilaat sakkortuunik arlalinnik misigisaqarsimasarput, taamaattumillu immikkut katsorsarneqartariaqarlutik – soorlu nakorsamit eqqarsarsinnaanerup iluani katsorsarneqartariaqartartut aamma tarnip nakorsaanit ikiorsiiffigineqartariaqartartut, nalunaarusiami allassimavoq.
Taamatuttaaq kommuninik suleqatigiissinnaanerup kinguarsarfeqarnera, aamma suliamik ingerlatsisartut taarseraattuartarnerat nalunaarusiornerni kinguarsaataallunilu paatsiveerusimaarutaasartoq, nalunaarusiami oqaatigineqarpoq.
Inissaq annikippallaaqaaq – najugaqartullu amerlavallaarput
Nunatsinni ulloq unnuarlu angerlarsimaffiit 354-nik inissaateqarput, ulloq unnuarlu neqeroorutini 140-nik inissaateqarput.
Taakkua naammanngillat.
Ulloq unnuarlu angerlarsimaffiit arlallit akuerisamik piumasaqaatinut naapertuuttuunngitsut – taamatuttaaq angerlarsimaffinni arlalinni, najugaqartut inissaqartitsinermut sanilliullugit meeqqat inuusuttullu inoqutigiit amerlavallaartut, ornigulluni takusaasimanerit nalunaarusiami ersersippaat.
Sulissivinni aningaasaliissutit killeqarmata, taamaattumillu ikiorsiissutit ataasiakkaat amerlanerusut akornanni agguaanneqartariaqartarput - taamaalilluni sullissisut innuttaasullu pitsaanerpaamik ikiorserneqarnissaat suli ajornarnerulersarpoq.
Malinnaaviginninnissamik periarfissaqannginneq
Meeqqanut inuusuttunullu ulloq unnuarlu najugaqarfinni najugaqarsimasut najugaqarnertik naammassigunikku, pisariaqartitaannik ikiorserneqarnerat unitsinneqartariaqanngitsoq, nalunaarusiami innersuussutigineqarpoq.
Amerlanerit ukiuni arlalinni ulloq unnuarlu angerlarsimaffimmi najugaqarsimasarput, tassanilu attaveqarfigisartakkattik pingaarnerpaat najugaqarfigisaminnut attuumassuteqarfigilertarpaat.
–sivisuumik ulloq unnuarlu najungaqarfimmi najugaqarneq, angerlarsimaffippalaartumut attaveqarnerulersitsisinnaassasoq, nalunaarusiami allassimavoq.
Inuusuttut 18-inik ukioqalerunik nammineertariaqalertarput. Sullissivinni tamani malinnaaviginninnissamik neqerooruteqanngilaq – aningaasaliissutit inissaqartitaanerlu amigaatigineqarput.
Malinnaaviginninneq innuttaasut neqeroorutaasumiit namminiilernissamut ikaarsaarnissaannut patajaallisaanissamut pingaaruteqarpoq – maannali inuusuttut ikiorneqaratik kisimik ingerlariaqqittariaqartartut nalunaarusiami allassimavoq.
Nalunaarusiaq juunip ulluisa 30-ianni 2025-mi saqqummerpoq, tassanilu 2024-mi nunatsinni ulloq unnuarlu paaqqinnittarfiit aamma ulloq unnuarlu neqeroorutinit paasissutissat, apeqqusiorfigineqarsimasut kiisalu ornigulluni alakkarterinerit tunngavigineqarput.
