Meerarpassuit suli ilaqutarsiartaartarput
Meeqqat ilaqutariinni ilasianngortinneqartartut suli amerlasut, Kalaallit Nunaanni naatsorsueqqissaartarfiup 2022-mit 2024-mut kisitsisai aallaavigalugit nalunaarusiami nutaami ersersinneqarpoq. Kisitsillu amerlasuut ilaqutariinnut inissiisarnerit siusippallaartumik iliuuserineqartarnerannik takussutissaasut, Ilisimatusarfimmi lektoriullunilu CARE-mi aqutsisoq oqarpoq.
- Ilaqutariinnut inissiinissaq periarfissani kingullerpiaasussaavoq. Tamaanilu ilaqutariinnut ilasiaalertitsisarnernik kisitsisit aallaavigissagaanni taamatut ingerlatsisoqarpasinngilaq.
Tasiilami ilaqutariinnut ilasiat amerlanerpaasut
Meeqqat ilaqutariinnut qitornarsiarineqartut Tasiilami amerlanerpaapput. Decemberimi 2022-mi meeqqat 73-it Tasiilami qitornarsiaapput, 2024-milu 96-iullutik.
Bonnie Jensenillu oqaasii naapertorlugit meeqqat qitornarsianngortartut amerlaneranni ilaqutariinnut qitornarsianngortitsisarnerup avataatigut allamik periarfissaqarpianngilaq. Meeqqanullu inooriaatsip allanngornera tupannarpallaannginnerussammat tunuminngaanniit kitaanut nuutsitsinissaq pinaveersaartinneqartarpoq.
Ilaqutariit ikorfartorneqarnerussasut
Meeqqat ilaquttaminniiginnarnerussammata ujartuisumik sulisoqarlunilu ikiuuttoqarnissaa Bonnie Jensenip kaammattuutigaa, taamaalillunimi qitornarsianngortartut ikiliartornissaat anguneqarsinnaammat.
- Pingaaruteqarpoq qitornarsianngortartut unitsivinnginnissai. Meeraqarpormi qitornarsianngortarialinnik. Allanilli periarfissanik ujartuisariaqarpugut, taanna oqarpoq.
Meeqqat ilaqutaminni qitornarsianngortut ajunngitsumik ingerlanerusarput allarluinnarnut qitornarsianngortartuninngaanniit. Taamaammallu meeqqat ilaqutaannik nalunngisaannik ujartuunneqartarnissaat, meeqqat nalunngisaminniiginnarsinnaanerussammata taamaaliornissamut aqqutissiissuteqartariaqartoq. Bonnie Jensen erseqqissaavoq.
