Pisortaaneq: Pinngitsaaliissutaanngilaq, kajumissisitsiniarneruna
SIK-mi siulittaasup Jess G. Berthelsenip suliffissaaleqisunut ikiorsiissutinik appaanissamut siunnersuut sapaatip-akunnerata aallartinnerani isornartorsioraa, Sulisitsisuni pisortaanerup Christian Keldsenip suliaq allatut isigaa. Allannguut amerlanerusunut suliffittaarnissamut kajumissisitsissasoq, taanna isumaqarpoq.
Maanna suliffissaaleqisut amerlanngitsut ikiorsiisstutit taamaatsillugit -suliffissarsiornermi ikiorsiissutiut taaneqartartuttaaq - naak pisinnaallutik suliffissarsiornissaannut naammattumik kajumilersinneqarneq ajorput.
–Jess G. Berthelsen isumaqatigaara, ataatsimummi suna tamaat isigineqartariaqarpoq. Inuussutissarsiornermi inerisaaneq, ineqarnermut politikki, suliffeqarfinnut tunngassuteqartunut periarfissat ujartussavagut, taanna oqarpoq nangillunilu:
– Kisianni siunnersuut itigartinneqaannarnissaa isumaqatiginngilara. Ullutsinni ikiorseeriaaseq qiviassavarput. Inuiaqatigiinnut iluaqutaanersoq misissussavarput. Tassa inunnik suliffeqartitserusulersitsisuunersoq.
Imminut isumagineq pilerinartuuli
Christian Keldsen naapertorlugu suliffissaaleqisunut ikiorsiissutit aamma ilinniartitaaneq, pikkorissarnerit ineqarnerlu isiginiarneqartariaqarput. Arlaannaaluunnit arlaannut mattussisariaqassanngilaq.
– Inuit suliffimmut qanoq kajumilersinneqarsinnaanersut paasiniaasariaqarpugut. Ilinniartitaaneq, pikkorissaaneq, tapersersuineq aamma ineqarnermut politikki oqaluuserisariaqarpavut. Inuiaqatigiit aaqqissugaanerat ikiorseeriaaserlu aamma oqaluuserisariaqarpavut, taanna oqarpoq.
Taanna naapertorlugu, inunnut ikiorsiissuteqalereersimasunut suliffimmut uteqqinnissaat ajornakusoorsinnaavoq. Suliffissarsiornissamiit ikiorsiissutinut assersuutigalugu qitornaqaraanni pisortaniit tapiissutaasartut ikiorsiissuteqaannarnissamut orniginarnerulersitsiinnarsinnaasut, taassuma tikkuarpai.
- Piffimmiilinngisaannassaagut apeqqummiilerluta: ikiorsiissuteqaannassaanga imaluunniit suliffittaassaanga. Imminut isumagineq pilerinartuusariaqarpoq.
Tapiissutit eqqortumik atussapput
Inuuniarnikkut atugarliortut annikinnerusumik tapissuteqartinneqarnissaat pineqanngitsoq Christian Keldsenip oqaatigaa. Ikiorsiissutilli nalilersoqqinnerisigut pisariaqartitsisut ikiorneqarsinnaasut, taanna isumaqarpoq.
– Aaqqissuussineq inuit pisariaqartitsisut tapersersorneqarnissaat siunertaralugu pilersinneqarpoq. Atugarliortut atukkatigut appasinnerpaamik inissinneqarnissaat siunertarineqanngilaq. Illuatungaanut saatillugu oqarsinnaavutit, aningaasat unitsitaagaluartut atorsinnaanngortikkutsigit pisariaqartitsisunut ikiorsiissutaasinnaagaluartut.
Taassuma ilanngullugu erseqqissarpaa, ikiorsiissutit ikilisinnissaat pineqanngitsoq kisianni aaqqissuussaanerup siunertaq malillugu atuutsinneqarnersoq qulakkeerneqarnissaa pineqartoq.
- Ikilisaaniarneq pineqartoq oqarusunngilanga. Aaqqissugaanerup qiviarnissaa, misissornissaa nalilersornissaalu pineqarput, taanna oqarpoq.
Naallu massakkut suliffissaaleqisut amerlarujussuanngitsut pineqaraluartut, massakkut iliuuseqanngikkutta siunissami amerlanerulersinnaaneri Christian Keldsenip aarlerisaarutigaa.
– Piffissamut ungasinnerusumut aaqqissuussinissamik pisariaqartitsivugut. Tassa inuit suliffeqarlutillu ilinniagaqalernissaat qulakkeersinnaallutigu. Maanna suliffissaaleqisut kisimik pineqanngillat. Siunissamili aaqqissuussaanermi suliffissaaleqileratarsinnaasut aamma pineqarput.
Kikkut tamarmik taperseeqataassapput
Christian Keldsenip imminut akerlerisutut taavaa, ullumikkut suliffissat amerlaqisut inuttaqanngimmata, naak nunatsinni suliffissaaleqisoqartoq. Allannguisoqanngippat nunanit allanit sulisussarsiornissamut pisariaqartitsineq alligaluttuinnassasoq, taassuma aarlerisaarutigaa.
- Sulisunik avataaneersunik sulilertitsinermik pisariaqartitsineq annertusigaluttuinnartoq takusinnaavarput. Suliffinnut taakkununnga inuiaqatigiinni sulilersinnaasuuteqarluta, avataaniit sulisoqarnissamik isumalluuteqartuarnissaq kajungerinngilarput, taanna oqarpoq.
Naak maanna nunatsinni avataaneersunik sulisunik pisariaqartitsineq ernumanartumik pisoqarfiunngikkaluartoq, ilaatigut ikiorsiissutinik nalilersueqqinnikkut amerlanerusunut suliffisarsiornissamik kajumissisitsissasoq taassuma neriuutigaa. Taanna naapertorlugu Nunatta karsiata amigartooruteqarujussuarneranut pisinnaasut tamarmik ataatsimooornermut tapersiinissaat pisariaqartoq.
- Maanna inuiattut amerlassuserput appariartuinnarfianiippugut. Siunissami pisinnaasutut aarlerissutigisimasavut maanna atuupput. Pinngitsaaliiineq pineqanngilaq, kajumissisitsiniarneruna pineqartoq, taanna oqarpoq.
