SIK-p siulittaasua: Pinngitsaaliinikkut sulisitsilersinnaaneq upperinngilara

- Upperaara inuk sulisussanngorlugu pinngortinneqartoq. Taamaammat inuk peqqissoq piaaraluni suliffissaaleqinavianngilaq, Sulinermik Inuussutissarsiuteqartut Kattuffianni (SIK) siulittaasoq, Jess G. Berthelsen tusagassiuutinut nalunaarummi oqarpoq.

Naalakkersuisut siulittaasuata, Jens-Frederik Nielsenip innuttaasunut suliffeqanngitsunut sulisinnaasunulli ikiorsiissutit appartinneqarnissaannik siunnersuuteqarnerata kingunerisaanik taanna taama oqaaseqarpoq.

Siunnersuulli tamanna SIK-p siulittaasuata isumaqatiginngilaa.

- Inatsisartunut uunnga piffissamik atuiniarnerat paasisinnaanngilara. Ajornartorsiuteqangaatsiarpugut. Nunatta karsia amigartooruteqarpoq, ajorneruliinnarsinnaavorlu. Nutaanik isertitsivissarsiortariaqarpugut. Tamanna ukkatarineqartariaqarpoq, taanna oqarpoq.

Eqiasunnatik suliffissaaleqisut

Jens-Frederik Nielsenip oqarnera naapertorlugu siunnersuutip amerlanerusunik sulilersitsinissaq siunertaraa. Naatsorsueqqissaartarfiup kisitsisaatai naapertorlugu suliffeqanngitsut 1.600-t missaanniipput. Taassumalu KNR-imit siusinnerusukkut apersorneqarnermini oqaatigaa:

- Assaat sulisinnaasut sulinissaat oqariartuummi pingaarnerpaavoq. Sulisinnaasut Inuiaqatigiinni aningaasaqarnikkut massakkut inissisimanerput qiviarutsigu, taava tassa iliuuseqartariaqarpugut.

Jess G. Berthelsenilli suliffissaaleqisut suliniannginnersut – imaluunniit suliffissaaleqivinnersut kisitsisinit ersinneqarnersut qularutiginngilaa.

- Kujataani aammalu Tasiilami suliffissaaleqisoqavissortoq naluneqanngilaq, tassami suliffissat naammanngimmata, taanna oqarpoq.

Taassumalu illoqarfinnut allanut sulisussaaleqiffiusunut nuunnissamut unammillernartoqarnera aamma erseqqissaatigaa.

- Illoqarfinnut sulisussaaleqiffiusunut nuunnissaannik neqeroorfigisinnaavagut, kisianni sumi najugaqassappat? Nuummut Ilulissanulluunniit nukkaluarunik - najugassaqanngillat.

Pillarneqaratik ikiorneqartariaqartut

Suliffissaaleqisut pillarneqaratik suleqatigalugit – taakkununnga naleqquttumik suliffissarsiuunneqartariaqartut erseqqissaatigaa.

- Pinngitsaaliinikkut sulisitsilersinnaaneq upperinngilara. Sulisitsisup aammalu sulisartup tamarmik iluaqutiginavianngilaat imminut tulluutinngitsumik suliffimmut pinngitsaalillugu sulisinneqalersinnaanera, taanna allappoq.

Taanna suliffik ataasiakkaat pisinnaasaannik aallaaveqartariaqarsorai - suliffiit ilaat inummut ataatsimut naleqqunnerulluni allanut naleqqutinnginnerusinnaavoq. Taamaammat ataasiakkaanut ilitsersuineq ineriartortitsinerlu ukkatarineqarnerusariaqarpoq.

Taassumalu suliffissarsisinnaanngitsunut pillaasoqarani - siunnersuineq, ilinniartitsineq, akissarsianik qaffaaneq, inissianullu akit apparneqarnissaat sulissutigineqartariaqartut siunnersuutigaa.

- Sulisussanik amigaateqartugut isumaqatigilluinnarpara. Sulisinnaasut sulissapput. Periuserineqarniartorli isumaqatiginngilluinnarpara. Siunnersuut inunnut kukkusunut eqquissaaq, taanna oqarpoq.

Jess G. Berthelsenip naalakkersuisut siulittaasuata siunnersuutaa nangeqattaartumut sunniutaasumut tassa amerlanerusut nunatsinnit aallarnerannut innuttaasullu ikiliartuinnarnerannut ajornarulersitsisinnaanissaa ernumassutigaa.

- Amerlasuut Danmarkimut nuuttarput, amerlanerusullu nuunniarnissaat ernumassutigaara. 2049-mi innuttaaasut 39.000-iinnanngornissarput ajornartorsiutaangaatsiarpoq. Malitsilersuisuuvoq. Ikilinerugutta sulu sukkanerusumik ikiliartussaagut Taamaammat suliffissaaleqisunut pissutsit ajornerulersinneqarnissaat SIK-p isumaqatiginngilaa, taanna naggasiivoq.