Suliffeqanngitsunut tapiissutit annikillineqarnissaat innuttaasunit taperserneqartoq

- Sulisinnaaguit sulissaatit.

Tamanna Jens-Frederik Nielsenip KNR-imit sapaatip akunnerata siuliani apersorneqarnermi oqariartuutaasa ilagaat.

Naalakkersuisut siulittaasuata suliffeqanngitsunut sulisinnaasunut politikikkut pilersaarutit saqqummiuppai.

Tamannalu illoqarfiit pingaarnersaanni inuit aqqusinermi tallimanngornermi ualikkut naapitatta amerlanerpaartaasa taperserpaat.

Naalakkersuisut siulittaasuata, Jens-Frederik Nielsenip politikerit suliffeqanngitsunut tapiissutit apparusukkaat sapaatip akunnerata siuliani oqaatigaa. Assi © : Rasmus Mads Olsvig / KNR

- Kivitseqataasinnaasut tamarmik qivitseqataasussaapput. Taannaana siunertarigaa. Allatut ajornaqaaq, tamatta kivitseqataasussaavugut Kalaallit Nunaanni. 

- Uagut ukiorpassuarni sulereernikuulluta, nungullarnikuulluta kivitseqataasinnaajunnarnikuugatta, Kristian Johnsen ullumikkut soraarninngorsimasoq oqarpoq. Taamaammallu allat nangitsinissaat pingaaruteqarsoraa.

Tikisitat ikinnerussasut

Alberthine Noahsenip politikerinit pilersaarutit aamma isumaqatigai, allannguisinnaanerlu tamanna amerlanerusunut sulilersitsissasoq neriuutigaa.

Pilersaarut piviusunngunnginnerani tamanna Inatsisartunit akuerineqaqqaassasoq, Jens-Frederik Nielsenip oqaatigaa. Assi © : Rasmus Mads Olsvig / KNR

- Tassa neriuppunga. Immaqa kalaallit amerlasuut kissaatigivarput, sulisut amerlanerussasut, taanna oqarpoq.

Taassuma tamanna inuiaqatigiinnut ataatsimut iluaqutaanissaa qularutiginngilaa – tamannalu ilaatigut avataanit tikisitsinissamik pisariaqartitsinermik annikinnerulersitsissasoq qularinngilaa:

- Tassa ooritigut qaffajallassapput. Kalaallit amerlanerusut sulilissapput, immaqa allamiut ikinnerulissapput. Pisariaqartippagut kalaalerpassuit sulissasut, taanna oqarpoq.

Lene Dalentoftilu aamma taama isumaqarpoq.

Lene Daentoft illoqarfiit pingaarnersaanni aqqusinermi naapitatta ilarpassui assigalugit naalakkersuisunit isumassarsiamut isumaqataavoq. Assi © : Rasmus Mads Olsvig / KNR

- Avataaninngaanniit aggersitsiinnarata. Soorunami pisariaqarpat taamaaliussaagut, kisianni nammineq nunaqavissut tunniussassaat taakkua pingaarutilerujussuupput. Taamaattumik taakkua taaneqarneri aamma iluarivakka, taanna oqarpoq.

Soorli inuit suliffeqanngillat?

Nuummi inuit aqqusinermi naapitatta amerlanerpaartaasa suliffeqanngitsunut sulisinnaasunut ikiorsiissutinik appaaniarneq isumassarsiatsialaasoraat.

Frederik Grønvoldilli sulisinnaagaluartut suliffeqanngitsut ikiorsiissutaannik appaavigineqaratik isumaginnittunit misissuiffigineqartariaqarsorai.

Frederik Grønvold sulisinnaagaluarlutik suliffeqanngitsunut ikiorsiissutinik appaanissamut atatillugu KNR-imit oqaloqatigineqartuni kisiartaalluni tapersiinngilaq. Assi © : Rasmus Mads Olsvig / KNR

- Inuttut isigalugit, ilaa. Inuuniarnerat ajornarninngussaaq. Ukua sulisinnaagaluarlutik sulinngitsut suna peqqutigineraat inunnik isumaginnittoqarfimmiit sulissutiginiarneqartariaqarpoq siunertalerlutik.

- Arsaartuinnarnagit (aningaasanik aaqq.), taanna oqarpoq.

Nunatsinni suliffeqanngitsutut nalunaarsorsimasoq maanna 1.637-upput. Taakkunannga qanoq amerlatigisut sulisinnaanersut pisortatigut kisitsisaatigineqanngilaq.

Ikiorsiissutit annikillineqassanersut Inatsisartut aalajangertussaavaat, tamanna suli aalajangiiffigineqanngilaq. Tamanna politikikkut pilersaarutaasoq, Jens-Frederik Nielsenip KNR-imit sapaatip akunnerata siuliani apersorneqarnermini oqaatigaa.