Jens-Frederik Nielsenip suliffeqanngitsunut tapiissutit annikillisinniarai: Assagut atorlugit sulissaagut

Jens-Frederik Nielsenip naalakkersuisunut maanna ullut 100-ngajaat siulittaasuusup sulisinnaagaluarlutik suliffeqanngitsunut tapiissutit apparniarai.

Taassuma tamanna KNR-imit pingasunngornermi unnukkut apersorneqarnermi oqaatigaa.

- Nappaateqarnak allatigulluunniit nalunaarsorneqaruit sulisinnaasutut taava tassa sulisariaqarnermut eqqarsarpugut. Taamaammat pisartagarineqartartut taakkununnga apparneqarnissaannik siunniussaqarpugut.

- Siunniussaq taavalu oqariartuut taanna tunniukkusutarput naalakkersuisuninngaanniit unaavoq: pilersueqataaneq pisussaaffiuvoq, pingaartumik peqqikkaanni sulisinnaallunilu, taava sulisussaavugut, taanna oqarpoq.

Ajornartorsiut marlunnik sammivilik

Nunatsinni Naatsorsueqqissaartarfik naapertorlugu inuit 1.637-it maanna suliffeqanngillat. Taakkunannga qanoq amerlatigisut sulisinnaanersut pisortanit naatsorsorneqarsimanngilaq, tamannali naalakkersuisut siulittaasuannut pingaarnerpaanngilaq.

- Inuiaqatigiinni aningaasaqarnikkut massakkut inissisimanerput qiviarutsigu, taava tassa iliuuseqartariaqarpugut, tamatta. Taannalu siunniulluinnarlugu sulivugut.

- Suliffissaqarpat tigusariaqarpaat. Suliffissaqanngippat uagut (naalakkersuisut aaqq.) akisussaaqataavugut, uagut sinaakkusiuttariaqarparput taanna immikkoortumik, allaffimmik imaluunniit illoqarfigisami suliffissaqarnissaat.

Sulisinnaasummi nunatsinni tamarmi siaruarsimasut, Jens-Frederik Nielsen nassuiaavoq.

- Taamaammat marloqiusaavoq, unali periarfissaassanngilaq suliffissaqaraluarluni angerlarsimaannarneq, siulittaasoq oqarpoq.

Aningaasanut inatsit periarfissaasinnaasoq

Inuillu sulilersinnissaat pisortani ataatsimoorutigineqassasoq, Jens-Frederik Nielsen isumaqarpoq.

- Nalunaarsuineq kommuniniittoq ilisimavarput, [...] taamaammat oqaloqatigiissutigilluartariaqarparput soorunami, taanna oqarpoq.

Jens-Frederik Nielsenip sulisinnaasut suliffeqanngitsulli qaqugu tapiissuteqarfiginikinnerulernissartik naatsorsuutigissaneraat akissuteqarfigisinnaanngilaa, inatsisinimmi suliaqarneq sivisusinnaallunilu tamanna Inatsisartunit aamma aalajangerneqartussaasoq, taassuma pingasunngornermi unnukkut erseqqissaatigaa.

- Kisianni aqqutit allat atorlugit ujartuivugut qanoq taannarpiaq aaqqinneqarsinnaanersoq, takorloorneqarsinnaavoq immaqa aningaasanut inatsit aqqutigalugu ingerlanneqarsinnaassasoq, taanna oqarpoq.

Jens-Frederik Nielsenip apersorneqarnera tamaat uani isiginnaarsinnaavat.