Illuatungiliuttut USA-mik isumaqatigiissut pillugu isumaqatigiinngitsut
Kalaallit Nunaata, USA-p Danmarkillu nutaatut isumaqatigiissutaat politikkikkut suliarilluakkatut ulluni kingullerni nersualaarneqarpoq.
Naalakkersuisut siulittaasuata Jens-Frederik Nielsenip(D), USA-p præsidentiata Donald Trumpip, Danmarkillu ministeriunerata Mette Frederiksenip(S), isumaqatigiissut Naalagaaffiit Peqatigiit New York Citymi illorsuanni marlunngornermi atsioqatigiissutigaat.
USA isumaqatigiissut aallaavigalugu nunatsinni sakkutuuliinerusinnaassaaq, Kalaallit Nunaallu namminersortuusoq, innuttaasuilu namminneq aalajangiisinnaassuseqarnerat naqissuserneqarluni.
Nunanut allanut naalakkersuisoq Múte B. Egede Jens-Frederik Nielsenilu atsioqatigiittoqarnerani Nuummi mittarfimmut pingasunngornermi taava uterput, ersaartaanneqarlutillu erfalasulisartoqarluni.
Naalakkersuisut marluk taakku attortisimasut, mittarfimmut tikikkamik eqqissiallaqqapput, USA-miillu tatisimaneqarsimanerup qaangerneqarnerani innuttaasut aamma eqqissiallassinnaasut oqaatigalugu.
Illuatungiliuttulli aperigaanni isumaqatigiissutip pitsaassusaa pillugu isumaqatigiinngissuteqarput.
- Naleqartitagut pingaartitagut matumani qulakkeerneqartutut isumaqarfigigatsigit, taamaattumik isumaqatigiissut uagut tungitsinniit iluarisimaarlugu oqariartuutigaarput, Siumup politikkikkut oqaaseqartartua Erik Jensen oqarpoq.
Naleqqap siulittaasua Pele Broberg naapertorlugu USA-mik isumaqatigiissusiortoqarnissaa partiip kaammattuutigiuarsimavaa:
- Isumaqatigiissut ajunngitsorpassuaqarpoq. Tamanna oqaatiginngitsoorumanngilara, tamannami tunngavilersuutigiuarsimavarput, Pele Broberg oqarpoq:
- Isumaqatigiissusiornermili pitsaaqutissaqartoqanngilaq.
Kalaallit Nunaannut iluaqutissarpassuit
USA-mik isumaqatigiissusiortoqarneratigut USA-miit aningaasaliinerusoqannginnera Pele Brobergip pingaarnertut pakatsissutigaa.
- USA isumaqatigiissusiortoqarnissaa pillugu aningaasanik aallaqqaammut neqerooruteqaraluarpoq. Jens-Frederik Nielsenili allalluunniit tamanna peqataaffigiumanngilaat, Pele Broberg oqarpoq:
- Akerlianik aallaqqaammulli oqaatigiuakkatsinnnik imaqartumik isumaqatigiissusiortoqarpoq, aningaasartaqarnanili.
USA-p sakkutooqarfinnik nutaanik pilersitsiniarnermini Kalaallit Nunaanni suliffeqarfinnik pilersitsiniarnermut, ingerlatsinermut, aserfallatsaaliinermut sullissinermullu sapinngisamik atuinissaanut pisussaaffilerneqarnera, Sulisitsisut isumaqatigiissut nersualaarpaat.
Pele Brobergilli tamanna naammaginngilaa:
- Kalaallit Nunaanni inuussutissarsiornermi siuariartortoqarnissaa upperiuarsinnarpaat. Mittarfiliortiternermi taama pisoqanngilaq, illersornissamulli Danmarkimik isumaqatigiissusiornermi aamma taama pisoqarnani, Pele Broberg oqarpoq.
Kalaallit Nunaanni aningaasaliinernut nutaanut Danmarkimi suliffeqarfinnut pitsaaquterpassuaqartoq, nunanut allanut tunngasuni Dansk Industrimi pisortap Sofie Carsten Nielsenip TV 2-mut oqaatigaa.
- Suliffeqarfiit Danmarkimeersut Kalaallit Nunaanni suliassanut qilanaalereersut, Danmarkimi suliffeqarfiit oqaatigisalereerpaat, Pele Broberg oqarpoq.
Amerikamiut Kalaallit Nunaanni sakkutuulersornerat
Isumaqatigiissutip nutaap Kalaallit Nunaata aningaasarsiorneranut kingunerluuteqannginnissaa eqqumaffigineqartariaqartoq Siumut aamma isumaqarpoq:
- Aningaasatigut sunniutissat taakkua ersarissumik allassimanngillat, Erik Jensen oqarpoq, nangipporlu:
- Taamaattumik inatsisartuni massakkut uagut suliassaraarput isumaqatigiissutip atuutsinneqalernerata kingunerisaannik aamma inatsisinik nunatsinnut iluaqutaanerunissaanut qulakkeerinninnissamut suleriaqqinnissaq, Erik Jensen oqarpoq.
USA Narsarsuarmi Mestersvigimilu sakkutooqarfiliorsinnaasoq isumaqatigiissummi aamma allassimavoq. Sakkutooqarfiliornermili pinngitsaaliissummik nuutsitsisoqarnavianngitsoq, Jens-Frederik Nielsenip Múte B. Egedellu isumaqatigiissusiortoqarnerani erseqqissaatigereerpaat.
Innuttaasulli sakkutooqarfiliorniarnerni pilersaarutinut peqataatinneqarnissaat pingaaruteqartoq Siumut isumaqarpoq:
- Minnerunngitsumik soorlu Narsarsuarmi aammalu Ittoqqortoormiini qanittuaniittuni sakkutooqarfiit pisussat. Uagutsinnut ulluinnatsinnullu qanoq sunniuteqassanersut innuttaasut paasisariaqarpaat, Erik Jensen oqarpoq.
USA-p sakkutooqarfiliorniarnera ataatsimut isigalugu ajornaquteqartinnagu Naleraq oqarpoq:
- USA-p Kalaallit Nunaanni sakkutuuliiniarnera ajornartorsiuteqartinnagu, partiit allat assigalugit oqaatigiuarsimavarput, Pele Broberg oqarpoq.
Isumaqatigiissusiarli Inatsisartuni oqaluuserineqalerpat Naleqqamit akuersissutigineqassanersoq, taassuma suli oqaaseqarfigisinnaannginnerarpaa.
