Tuluit umiarsuat ilisimatusaat Nuummiittoq: ”Maanimiut naapinnissaannut periarfissatsialak”
![](/sites/default/files/styles/image_934x467/public/2024-08/Forskningsskib.jpg?h=4233ef75&itok=18Mkg5gw)
Umiarsuaq ilisimatusaat RRS James Cook tuluit erfalasuaraannik pinnersarneqarsimasoq meeqqat inersimasullu 160-it sinnerlugit pingasunngornermi pulaarlugu alakkarpaat.
Taannami tuluit umiarsuat ilisimatusaat 90 meterisut takitigisoq Labradorip imartaanut ingerlaalertigani Nuummiitsiarmat soqutiginnittunit tamanit alakkarneqarsinnaavoq.
Umiarsuup naalagaa ukiuni qulingiluani sulereersoq, James Gwinnell, naapinneqarsinnaasut ilagaat. Taassuma tikitamini innuttaasunik naapitsisarnissi pingaartitaraa.
- Innuttaasut umiarsuamukarlutik apeqquteqarsinnaanerannut periarfissatsialaavoq, uagullu aamma innuttaasunik naapitsinissatsinnut tikitarpullu pillugu paasisaqarnissatsinnut periarfissatsialaalluni, James Gwinnell oqarpoq.
Umiarsuaq ulluni kingullerni Nuummiittoq ingerlaqqilluni nunatta Canadallu akornanni Labradorip imartaanukassaaq. Ilisimatusartummi immap nunarsuatsinni silaannarmut sunniutai pillugit ukioq ataaseq ilisimatusassapput.
Labradorip imartaanukartut
Issittummi imartaa Europami nunarsuarmilu allani imartanut sunniuteqaqaaq – tamannami maanna ilisimatusarluni suliniummi ilaatigut misissorneqassaaq.
Ilisimatusarnermi suleqataasoq, Joanne Hopkins, UK National Oceanography Centreimi Arctic Sciencemi (Issittoq pillugu ilisimatusarfik, aaqq.) pisortaq taama oqaluttuarpoq.
- Immap silap pissusianut sunniutai misissorpavut. Immap inuit inuussutissaannut pilersuinermut soorlu nerisassaannut sunniutai. Aamma silaannaap pissusiata allanngoraluttuinnartup inuit aarleqqutigisariaqagaannut naleqqussaarfigisariaqagaannullu sunniutai misissuiffigaagut, taanna oqarpoq.
![](/sites/default/files/styles/image_934x467/public/2024-08/Forsker.jpg?h=4233ef75&itok=gzL2wP_b)
CO2 silaannarmit immamut pigaangat susoqartarnera ilisimatusartut misissuiffigissavaat.
- CO2 silaannarmit immamut akuliukkaangat immap sunniutai misissuiffiginiarlugit Labradorip imartaanukassaagut. Naasummi CO2-mik milluaasarput, kingornalu CO2-taqarlutik immamut itisuumut pisinnaasarput.
- Tassalu pisartut tamakkua nunarsuarput imartaqanngikkaluarpat silaannatta nammineq CO2-viarneranut qanoq sunniuteqarnersoq paasiniarsaraarput, Joanne Hopkins.
Issittumi ilisimatusarneq suleqatigiiffiusariaqartoq
Maanna misissuineq ilisimatusarnermik suliniummut UK-Greenland Science Bursaries Programmimut ilaavoq, taanna suliniut tuluit Københavnimi aallartitaqarfiata, Arctic Hubip aamma Tuluit Nunaanni The NERC Arctic Officep suleqatigiiffigaat.
Taanna kalaallit tuluillu ilisimatusartut akornanni ilisimatusarluni suliniutinik aallartitsisarnissaat siunertaralugu pilersitaavoq.
Issittumimi pisut silallu pissusiata allanngoriartorneranut sunniutai paasisaqarfigissagaanni nunanik tamalaanik suleqateqarnissaq pisariaqarpoq.
- Ilisimatusarnermi suliat annertuut pingaartumik Issittumut tunngasut nunap ataasiinnaap akisinnaanngilai. Nunami ataatsimi ilisimasat piginnaasallunniit kisimik naammanngillat.
- Taamaammat ilisimatusarnerput qanoq iliornikkut ataatsimoorfiutinniarlugu pissarsiffiunerutinniarlugulu maani najugalinnik suleqateqarusuttorujussuuvugut, Joanne Hopkins oqarpoq.
RRS James Cook ulluni 13-ini Labradorip imartaaniissaaq, taassumalu kingorna Reykjavikkimukassaaq, ilisimatusartullu allat umiarsuarmut ikissapput.