Umiarsuaq ilisimatusaat soqutiginnittut alakkarsinnaagaat
![](/sites/default/files/styles/image_934x467/public/2024-08/JC237-ROV-sky-rep-6.jpg?itok=rwXyKA34)
Aqagu Nuummiikkuit umiarsuaq ilisimatusaat RRS James Cook alakkarsinnaassavat.
Taannami umiarsuaq kikkunnut tamanut ammassaaq, nunattalu imartaani susoqarnera aamma umiarsuarmi ilisimatusaammi inuuneq paasisaqarfigisinnaavatit.
Alakkaasut ilisimatusartunit inuttanillu umiarsuarmi 90 meterisut takitigisumi angallanneqassapput.
RRS James Cookimi naalagaq James Gwinnell tusagassiorfinnut nalunaarummi ima oqarpoq:
- RRS James Cookimi ilisimatusartut inuttallu Nuummiinnitsinni innuttaasunik tikilluaqqusissapput. Umiarsuarmi inuunerup qanoq inneranik paasisaqarnissamut taama periarfissiineq qaqutigoortuuvoq, taanna oqarpoq.
Umiarsuaq CO2 pillugu misissuissasoq
RRS James Cookip Nuummiit Reykjamikkimukarluni ilisimasassarsioriartunnginnerani innuttaasut alakkaanissaannut periarfissinneqarput.
Ilisimatusaatigineqartussarmi tassaavoq Labradorip imartaani kulstoffip ingerlaarnera pillugu ilisimatusarneq.
Taanna kulstoffi immami itisuumi ingerlaartoq annertuumik CO2-taqarpoq, silallu pissusianut iluaqutaasoq ilisimatusartut isumaqarput.
Tamannalu pillugu umiarsuarmi inuttat oqaluttuassasut, umiarsuup naalagaa James Gwinnel oqarpoq:
- Taassuma saniatigut ilisimatusartoqatigiit naapinneqarsinnaassapput suliagullu paasisaqarfigalugit – aamma sooq inuiaqatigiinnut pingaaruteqarnersoq. Kinguaariittaaq tullii immamik ilisimatusarnermik, teknologiimik suliaqarnermik aamma imarsiornermik soqutiginnilernissaat neriuutigaarput.
Tuluit Nunaat suleqatigineqangaatsiartoq
Tuluit nunatsinni aasaq manna ilisimatusartut ulappipput. Umiarsuaq RRS Sir David Attenborough sapaatit-akunnerini arfinilinni ilisimasassarsiorluni nunatta kujataaniippoq, ilisimatusartullu sermip aannera immamut qanoq sunniuteqarnersoq misissorpaat.
Tuluit Nunaata ilisimatusarnermut tunngatillugu nunatsinnik suleqateqarnerunissani anguniagaraa, taamaattumik umiarsuit RRS James Cook aamma RRS Sir David Attenborough maanna nunatsinniillutik.
RRS James Cook alakkarusussagukku aqagu ualikkut nal. pingasuniit tallimat tungaanut periarfissaqarputit, uani Cruise Berth, Aqqusinersuaq 2814, Nuuk.
Talittarfimmi imeruersaatinik sassaalliisoqassaaq.