Vivian Motzfeldt inatsisiliorusuppoq: - Nunarput maanna killeqanngitsumik ilisimatusarfigineqarpoq

Nunarput ilisimatusartut soqutigilluinnarpaat, pingaartumik silap pissusaata allanngoriartornera sermersuarlu eqqarsaatigalugit. Ilisimatusartut nunatsinnukarlutik ukiut tamaasa sulianik nutaanik aallartitsiartortarput.

Suliat ukiut tamaasa qanoq amerlatigisut aallartinneqartarneri tamakkiisumik ilisimaneqanngilaq. Ilisimatusarnermi pillugu ullumi inatsiseqanngilaq.

Tamanna naalagaaffinngornissamut nunanullu allanut naalakkersuisup Vivian Motzfeldtip (Siumut) allanngortikkusuppaa.

- Iluaqutaasumik ilisimatusarnikkut ingerlatsinerit pissarsiffigisassagutsigit taava pisariaqarluinnarpoq ersarissunik inatsiseqarnissaq sinaakkuteqarnissarlu. Ullumikkut ilisimatusarnerup iluani nunarput killeqanngitsumik piumasaqaatitaqanngitsumillu ingerlanneqarpoq, taanna oqarpoq. 

- Tassanilu uagut ersarissumik sinaakkuteqannginnitta inatsiseqannginnittalu malitsigisaanik ilisimatusarnikkut nunatsinni ingerlatat amerlasoorpassuit nunatsinnut tunniussiffiuallaanngitsumik ilisimatuussutsikkut annissuiffigineqarluni.

Tamaammat taanna ilisimatusarnermik suliaqartut inatsisissamut ilanngussassaqqissunik saqqummiiniassammata oqaloqatigiinnissamut juunimi qaaqqusivoq. Ukiarulu taama aaqqissuisoqaqqissaaq.

- Massakkut qinersivik naajartuaarpoq, taamaammallu angumerisinnaasagut inatsisivimmik suliaqarnissatsinnut killeqartorujussuupput. Massakkulli suliaq aallartipparput uninnani ingerlaniassammat aamma piffissaq immaqa qinersiviusoq nikiffiugaluartoq suliat ingerlaannarsinnaaniassammata, taanna oqarpoq.

Uatsinnut iluaqutaassaaq

Nunatsinni Ilisimatusarnermik Siunnersuisoqatigiit aamma Arctic Hub nunatsinnut ilisimatusariartortunik suleqateqartarput, taakkulu ilisimatusarnermut tunngasumik maanna inatsiseqannginnerata kingunerisai siornatigut uparuarpaat.   

Nunatsinni ilisimatusarnermik suliallit qanoq amerlatiginerisa tamakkiisumik ilisimaneqannginnerisa saniatigut sammisaq ataaseq pillugu inuiaqatigiinnik ilisimatusarluni apersuiuartarnerit inuit ilaannik ”qasutitsisinnaapput”.  

Tamannalu naalakkersuisup nutaamik inatsisiliornikkut allanngortikkusuppaa.

- Suliaminnik ingerlataqareersunut piffissaq ilaatigut annertooq avataaninngaanniit tikittunut atortarpaat pissarsiffiginagu.

- Ilisimatusarneq Issittumi annertoorujussuarmik nunarsuup sinnerani iluaqutaalluni inissisimavoq. Taamatulli inissisimaneq nunatta iluaqutigisariaqarpaa pingaarnerpaatut paasisat inuiaqatigiinnut aamma pitsaasumik atorneqarnissaannik siunertaqartariaqarneri, Vivian Motzfeldt.   

Aalajangiiffigisasstut siunnersuut ukiaru ataatsimiinnissamut piariissasoq pilersaarutaavoq.