Nunatsinni ilisimatusarnerit tamakkiisumik ilisimasaqarfigineqanngillat – tamanna nutaamik inatsisiliornikkut allanngussaaq

Nunatsinni ilisimatuussutsikkut misissuisoqartuarpoq. Ilisimatusartulli qassit nunatsinni misissuinersut, ilisimatuussutsikkut misissuinerit suut suliarineqartarnersut maannakkut tamakkiisumik ilisimaneqanngilaq.

Tamannali allanngoriaannaavoq. Naalakkersuisummi ilisimatusarnermut inatsisiliorusupput. Tamaammat ilisimatusarnermik suliaqartut inatsisissamut ilanngussassaqqissunik saqqummiiniassammata oqaloqatigiinnissamut qaaqqusaapput.

- Tamanna ajunngilluinnarpoq, ilisimatusarnermi pillugu inatsisiliornissaq piffissanngorpoq. Kikkut nunatsinni ilisimatuussutsikkut misissuisinnaanersut maanna inatsiseqanngilaq, Nunatsinni Ilisimatusarnermik siunnersuisoqatigiit siulittaasuat Mitdlaraq Lennert oqarpoq nangillunilu.

- Ilisimatuussutsikkut suliaqartorpassuit nunarsuarmit tamaneersut nunatsinnukartarput, uagullu nunatsinniit kikkut sumilu ilisimatuussutikut suliaqarnersut aqussinnaanngilagut, Mitdlaraq Lennert oqarpoq.

Taamaattumik nunatsinni qanoq amerlatigisut ilisimatuussutsikkut ukiut tamaasa suliaqartarnersut, Nunatsinni Ilisimatusarnermik siunnersuisoqatigiit akisinnaanngilaat.

Tassanngaanniilli siorna kisitsisit taakutippaat, USA-miiginnaq ilisimatusartut 300-t ukiut tamaasa nunatsinnukartartut.

Ileqqorissaarnissamut malittarisassat amigaaatasut

Arctic Hub ilisimatuussutsikkut misissuinermit suliat nunatsinni innuttaasunut iluaqutaanissaat qulakkeerniarlugu pilersitaavoq.

Kisianni tassanngaanniit aamma nunatsinni qanoq amerlatigisut ilisimatuussutsikkut ukiut tamaasa suliaqartarnersut tamakkiisumik ilisimanngilaat.

- Ilisimatuussutsikkut misissuinerit pillugit ileqqorissaarnissamut malittarisassaqannginnera ajornartorsiutini annerpaavoq. Peqqissutsimik qanoq ilisimatusartarnermi malittarisassaqarpoq, kisianni inuit, uumaasut pinngortitarlu pineqartillugit taama ittunik amigaateqarpugut, Jula Maegaard-Hoffmann, Arctic Hubip allaffiani pisortaasoq, oqarpoq.

Aammali ilisimatuussutsikkut suliaqartoqartarnerujussua innutaasunut ilungersunartorsiortitsivoq.

Inuimmi aalajangersimasut ilisimatuussutsikkut misissuisunit apersorneqarajuttarput. Inuit taakku aalajangersimasunik immikkut ilisimasaqartuusinnaapput imaluunniit inunnik apersugassakittuusuni nunaqarfimmiuusinnaapput.

- Ilisimatuussutsikkut misissuisut suliatik ajunngilluinnartuutikkusuppaat, Kalaallit Nunaannili eqqortumik iliornissamut malittarisassaqanngillat, Jula Maegaard-Hoffmann oqarpoq.

Taamaattumik ilisimatuussutsikkut misissuisut apersugassaminnik qanoq pissuseqartarnissaasa oqallisiginissaa immikkut pingaaruteqartoq, taanna isumaqarpoq.

- Assersuutitut immikkut taaneqarsinnaavoq, ilisimatuussutsikkut misissuinermi apersorneqartoq akilerneqartassanersoq. Assersuutigalugu piniartut piniarianngitsoornerminni isertitassamisut annaasaannik taarsiiffigineqartassappat, imaluunniit apersorneqartussat ilisimasaminnik saqqummiussinissaat naatsorsuutigineqartassava, arlaannik aalajangersimasumik oqaaseqarnerminnut akilerneqaratik, Jula Maegaard-Hoffmann.oqarpoq.

Innuttaasut tusarneqartariaqarput

Innuttaasut ilisimatuussutsikkut misissuisarnernik qatsussineragaanerat Mitdlarak Lennertip ilisarisinnaanerarpaa.

Silap pissusaata allanngoriartornera pillugu ingammik avanaani kujataanilu innuttaasut apersorneqarajupput. Aammali illoqarfiit avataanni sermersuarmilu ilisimatuussutsikkut misissuinerpassuit tamakkiisumik ilisimasaqarfigineqanngitsut, Mitdlaraq Lennert oqaluttuarpoq.

Taamaattumik ilisimatusarnermut inatsisissami nuna tamakkerlugu ilisimatuussutsikkut misissuinermi ileqqorissaarnissamut najoqqutassiortoqarnissaa, Nunatsinni Ilisimatusarnermik siunnersuisoqatigiit innersuussutigaat. Taakkua saniatigut sammisani aalajangersimasuni ataasiakkaani ilisimatusarnermi ileqqorissaarneq pillugu komiteliortoqassasoq innersuussutigineqarpoq.

Taamaalippat ilisimattusartut ataatsimiillutik ilisimatusaatissat akuerineqartinnagit nalilertalissavaat.

- Taava aamma nunaqarfimmiut illoqarfimmiulluunniit ilisimatusarfiusussamiittut akuutinneqarnerusassanersut eqqarsaaatigineqarsinnaavoq. Illoqarfik nunaqarfilluunniit ilisimatussartunit ornigarneqarluartuuppat, tassanimiut misissuiartortunit amerlanerusunik tikinneqarusunnerlutik taamaaakkussunnginerlutilluunniit isummerfigisassavaat, Mitdlarak Lennert oqarpoq.

Ilisimatusarnemut inatsisissaq pillugu oqaloqatigiinnerit qaammammi uani siusinnerusukkut pipput. Tullia ukiaru pissaaq. Naalakkeersuisut tusagassiuutinut taama nalunaarput.