Arctic Hub: Sumi ilisimatusartoqarnersoq nunatta assingani elektroniskiusumi takuneqarsinnaalerpoq

- Nunarput qanoq ilisimatusarfigineqartiginersoq misissoriaannaasarnikuunngilarput, Arctic Hubip allattoqarfiata pisortaa Jula Maegaard-Hoffmann oqarpoq. 

Nunatta qanoq ilisimatusarfigineqartiginerata misissoriaannaasannginnera ajornartorsiutigineqartarpoq. Tamannarpiarmi Nunatsinni Ilisimatusarnermik Siunnersuisoqatigiit siulittaasuata, Josephine Nymandip, siorna aamma uparuarpaa. 

- Nunanit allaneersunik uagut suliatsinnut assingusunik suliaqarnissamik ilisimateqqaarnata ilisimatusartoqartoq nalaatsornerinnarmik paasikkajupparput. Nunatsinni ilisimatusartuulluni tamanna uuminartaqaaq, Josephine Nymand taamanikkut oqarpoq.  

Ilisimatusartunik ataqatigiilersitsiviusoq, Arctic Hub, tamannarpiaq allanngortinniarlugu ilisimatusartunik nunanit tamalaaneersunik nittartakkakkut attaveqaatikkut workshoppertitsivoq.

Tamanna nunatta assinganik elektroniskiusumik pilersitsineranik kinguneqarpoq, nunatsinnilu sumi ilisimatusartoqarnersoq nunatta assingani tassani takuneqarsinnavoq.

- Paasissutissarpassuit ilisimatusarnernit assigiinngitsorpassuarneersut workshoppertitsinitsinni katersorpavut, taakkualu nittartakkatsinni nunatta assinganut elektroniskiusumut nalunaarsorpavut. Nunatsinni sumi ilisimatusartoqarnersoq nunatta assingani tassani misissorneqarsinnaavoq, Jula Maegaard-Hoffmann oqarpoq.

Tassa nunatsinni 2024-imi sumi ilisimatusartoqarnersoq, nunatta assingani tassani takuneqarsinnaavoq. Ilisimatusarnerit pillugit paasissutissat assigiinngitsut nunatta assingani tassani misissuataarneqarsinnaapput. 

Tamanut atugassiaasoq

- Nunatta assinga taanna tamat iluaqutigissagaat neriuutigaarput, Arctic Hubip allattoqarfiata pisortaa oqarpoq.

Tassa nunatta assinga taanna ilisimatusartunuinnaanngitsoq aammali innuttaasunut, aalaajangiisartunut soqutiginnittunullu allanut atugassiaavoq.

Nunatsinni qanoq ilisimatusartoqartiginerata misissorneqariaannaasimannginnera nunatta inuinit iluaagineqartarsimavoq. llaammi ilisimatusarnermik suliani assiginngitsuni amerlasuuni peqataalertarsimapput.  

- Apersorneqarsimasorpaat ilaat ilisimatusartunik oqaloqateqarnermi assigiiaamik apersorneqartarnerminnik qatsussilluinnarpasipput, Jula Maegaard-Hoffmann oqarpoq.

Nunarput ilisimatusarfigiumaneqarluartoq

Ilisimatusartut nunatsinni sumi misissuinermik nalunaarsuinissaat massakkorpiaq piumasaqaataanngilaq, taamaammat ilisimatusarluni misissuinissanik ataqatigiissaariniapiloornarpoq. 

Tamanna ajornartorsiutaajunnaaqqullugu ilisimatusartut suleqatigiilluarnerulertariaqarput, tamannalu ilaatigut paasissutissanik nunatta assinganut elektroniskiusumut avitseqatigiisittalernerisigut qularnaarneqarsinnaavoq. 

- Nunarput ilisimatusarfigiumaneqaqisoq nalunngilarput, nunarpulli tamatumani suleqataanerusariaqarpoq. Nutaanillu suliniuteqarnikkut paasissutissanillu avitseqatigiissitsinikkut taamaaliorpoq, Arctic Hubip allattoqarfiata pisortaa oqarpoq.

Arctic Hub Arctic Hub Connectimik taasamik pingajussaaneertumk februaarip ulluisa arfineq-aappaanniit workshoppertitsivoq. Ilisimatusartut 72-it nunanit tamalaaneersut tamarmik immikkut assigiinngitsunik misissugallit ukioq manna peqataammata workshoppertitsisarnerannut soqutiginnittut amerliartuinnartut, Arctic Hubimeersut maluginiarpaat. 

Soorlu nunasiaataajunnaarnermik, silap pissusianik, perorsaanermik peqqissutsimilluunniit ilisimatusartut nunatsinneersut, Danmarkimeersut, USA-meersut Canadameersullu peqataasunut ilaapput.