Arctic Hub pisortartaartoq
Arctic Hubermiut pisortassarsioreerlutik suleqatertik, Jula Maegaard-Hoffmann, pisortartaarivaat.
Arctic Hub tusagassiorfinnut taama nalunaarpoq.
Jula Maegaard-Hoffmann Arctic Hub pilersinneqarmalli allattoqarfiani atorfeqarpoq, taassumalu Anna-Sofie Skjervedal ukiarmi pisortaajunnaarmat paarlallugu pisortanngorallarpoq.
- Kalaallit Nunaanni ilisimatusarneq aatsaat taama soqutigineqartigaaq, ukiunilu takkuttuni soqutigineqarneruleraluttuinnartussaavoq.
- Suliniutivut pingaarnerit siulliit aallartereernikuuavut, allattoqarfimmilu pisortatut Arctic Hubimi siunissami suliassatsinnik sammiviilinissara qilanaaraara, Jula Maegaard-Hoffmann tusagassiorfinnut nalunaarummi oqarpoq.
Unamminartunik suliassaqartoq
Unamminartunik suliassaqarluni nalunngikkini, Jula Maegaard-Hoffmann tusagassiorfinnut nalunaarummi aamma oqarpoq.
- Arctic Hubip ullumikkut peqatigiiffittut pingaaruteqalernissaa Anna-Sofiep sulissutigingaatsiarsimavaa. Qujamasuppugut Arctic Hub peqatigiiffittut nutaajugaluartoq ilisimatusarnermik sulialinnit tikilluaqquneqarluarmat.
- Tunngaviliilluartoqareerpoq, suliarlu tamanna ingerlateqqissavarput Kalaallit Nunaanni ullut tamaasa ilisimatusarfigineqartartorpassuit soqutiginaqisut nunatsinni nunanilu tamalaani suli iluaqutigineqarnerulerniassammata, taanna oqarpoq.
Julia Maegaard-Hoffmann Arctic Hubip allattoqarfiata pisortaatut 2024-mi januaarip aallaqqaataani atorfinippoq.
