Timersorneq

AWG-mut peqataasinnaajunnaartoqarnera Timersoqatigiit Kattuffiata uggoraa

Kalaallit Nunaata ujaminnassinnaanerunissaa inuusuttullu nerrivimmi arsaarartartut, volleyballertartut futsalertartullu (arsaattartut) misigisassarujussuugaluat pinngitsuussaaq, taama Timersoqatigiit Kattuffiata siulittaasua isumaqarpoq.

Allattoq Thor Bill

januaarip 23-at 2024 07:48

Nutserisoq Najâraq Egede

Inuusuttut volleyballertartut, nerrivimmi arsaarartartut futsalertartullu arlaannaalluunniit Issittormiut unammiuaarnerannut ukioq manna peqataassanngilaq.

Timersoqatigiit taakku AWG-mut Alaskami marsimi pisussamut peqataaniarnatik nalunaarput. De tre specialforbund har nemlig alle meldt afbud til dette års Arctic Winter Games.

Timersoqatigiit Kattuffiani siulittaasup, Claus Nielsenip tamanna uggoraa.

- Uggornaraluaqaaq. Uggoraara kisianni tassa aningaasat soorunami apeqqutaagamik massakkut aamma akitsoraluttuinnarami peqataanissaq nunanut allanut aamma AWG-mut. Tapeeriaaseq ukiut pingasut sisamat qaangiupput specialforbundinut allanngortinneqarmat. Tassani specialforbundit namminneq akiligassaat amerligamik. Massakkut taamatut naleqarallarpoq. Ikiliartorput peqataasut, oqarpoq.

Volleyballertartut, bordtennisertartut, futsalertartullu aningaasassaqannginneq pillugu angalaaqataanianngillat. Assersuutissaavoq nerrivimmi arsaarartartut Greenland Table Tennis Federation (GTTF) AWG-mut siorna peqataanerminnut millionit koruunit affaannik akiliisimagamik. Taama amerlatigisunik aningaasartuuteqarnissartik ukiormanna akissaqartinngilaat.

Arctic Winter Games nanginginnaasumik ukioq allortarlugu pisaraluarpoq, coronali pillugu 2020-mi 2022-milu pinngitsoormat siorna ukiormannalu Issittormiut Unammiuaartinneqassasut aalajangerneqarpoq.

Ujaminnattaassat ikinnerit

Kalaallit nerrivimmi arsaarartartut siorna AWG-mi peqataanermikkut 12-inik kuultinnapput pingasunillu sølvinnallutik.

Kalaallit Nunaata ujamminnattarisinnaasaannut, timersoqatigiit pingasut peqataasinnaannginnerat, sunniuteqassaaq, Claus Nielsenip nassuerutigaa.

- Tassami malunnaqutaassapput taakkua specialforbundit medaljenik AWG-eeqataanerit tamaasa angerlaassaqataasaramik. Ingammik nerrivimmi arsaarartartut, assut taakkua pikkorikkamik. Kisianni aamma pitsaanerulernikuuvoq soorunami – russit ilaajunnaaramik taakkununnga oqinnerulernikuuvoq. Russit assut unammillertartorujussuunikuugamikkit. Taava isikkamik arsartut aamma taakkua nalinginnaasoq qullersat ilagisaramikkut AWG-mi. Soorunami uggorissavarput taakkua tamarmik peqataannginnamik. Kisianni tassa taammattussaasimagami.

Ujaminnaattalli qassiunissaat siulittaasumut pingaarnerpaanngillat.

- Massakkut isumalluutigisaqanngilanga arlaatigut medaljet qanoq amerlatigissanerannik. Una neriuutigivara, inuusuttut nuannersumik angalaarsinnaallutik taavalu pissarsiaqarlutik aamma angerlarunik inuusuttut allat timersornermik peqatigiiffinnut ilaasortanngornissaannik soqutiginnilersissagaat. Taava taamaalilluni aamma peqataasartut amerlanerulernissaat neriuutigivara.

Inuusuttut misigisaqarnissaat pingaarnerpaatippaa. Nerrivimmi arsaarartartut, voleyballertartut futsalertartullu inuusuttaasa ukiormanna angalaqataaniannginnerat taamaammat uggoraa.

- Soorunami uggorissavarput AWG-mi aamma tassaagami kulturikkut naapinneq – timersornerinnaannginnami – aamma timersortartorpassuit ataatsimoornermi sapaatit akunneranni pissarsiaqartarnerat, angerlaassisarnerat – aamma siunissami utersinnaanerannik kinguneqartarami. Taanna uggornartuussaaq.

ARCTIC WINTER GAMES 2024

Arctic Winter Games 2024 USA-mi Alaskap ilaani Mat-Su-mi marsip qulinganiit 16-iat ilanngullugu ingerlanneqassaaq.

Timersortartut nunatsinneersut 48-it ukioq manna unammiartussapput, timersuutillu Arctic Sports, sulorarneq, ujakkaarneq, Dene Games aamma Snowboard peqataaffigineqassapput.

Taassuma saniatigut nunatta kulturikkut takutitassaanut inuusuttut arfinillit peqataatinneqassapput.

Nunatta peqataanerata saniatigut allat peqataatitaqartussat tassaapput Alaska, Albertha North, Northwest Territories, Nunavik-Quebec, Nunavut, Sápmi aamma Yukon.

Nunarput 2023-mi unammiuaartoqarnerani katillugit 85-inik ujaminnappoq. Guldit 38-t, sølvit 23-t bronzellu 24-t.

Allisiguk

Ajornakusooqaaq, kisianni Air Greenlandimit akikinneroqaaq

Angalatitseqatigiiffik Air Greenland Kalaallit Nunaata Issittormiut Unammiuaarnerat Canadami siorna pimmat aningaasaliisuunerpaavoq. Timersortartut, sungiusaasut aallartitallu Kangerlussuarmiit toqqaannartumik Canadaliaanneranik isumaginnittuuvoq.

Naallu nutaamik ukioq manna isumaqatigiissusiorfigineqanngikkaluartoq, angalanermut aningaasartuutit amerlanerunavianngitsut, Claus Nielsen nassuiaavoq. Ajornakusoorneruvorli.

Air Greenlandip timmisartuanik toqqaannaq Alaskaliarnani, nalinginnaasumik Kangerlussuarmiit Islandiliartartumut timmisartussapput, tassanngaanniit Seattle-mut, Seattlemiillu Alaskami Anchoragemut.

Ingerlaarfissaat ajornakusoornerugaluartoq Air Greenlandip akigitinniagaanit akikinnerussaaq, Claus Nielsen oqaluttuarpoq.

- Air Greenlandimut isumaqatigiinnerit ukioq manna pinngitsoorput - oqinnerunavianngilaq soorunami. Kangerlussuarliarluta charterimik ikaaginnarluta pisinnaanngilagut. Nalinginnaasumik angallassinerit Islandikkooriarluta timmisartumik Seattlemukariarluta Anchoragemut, aqqutaani unnuisarluta. Kisianni akikinnerussaaq. Air Greenlandip neqeroorutaaninngaanniit akikinnerugami.

Air Greenlandimeersumik oqaqaseqartitsiniarluta KNR-imiit sulissutigaarput.