Nunatsinni Ilisimatusarnermik Siunnersuisoqatigiit: Ilisimatusartut hunnorujulikkaat nakkutigineqaratik nunatsinniipput
Ilisimatusartut nunanit allaneersut nunatsinni avatangiisigut immikkuullarissut misissuiffigiartorlugit ukiorpassuarni tikittarput. Taamaattoqartillugu nunatsinni ilisimatusartut misissuinissaminnut aningaasaliivigineqarnissamullu periafissakillisaramik pakatsisaqaat.
Nunatsinni Ilisimatusarnermik Siunnersuisoqatigiit siulittaasuat, Josephine Nymand taama oqarpoq:
- Nunanit allanneersut ilisimatusartut attaviginata suliatsinnut assingusunik misissuisut paasisarparput. Taamaattoqartillugulu nunatsinni ilisimatusartuulluni pakatsinarnerpaasarpoq, taanna KNR-imut oqarpoq.
Ilisimatusartut nunarput pillugu paasisimasaqarnerulerniarlutik tikittartut ukiuni kingullerni amerligaluttuinnarput – aammali nunarsuatta qanoq inissisimanera paasiniarlugu nunatsinni misissuisarlutik.
Silap pissusiata allanngoriartornera Ukrainemilu sorsunneq peqqutaallutik nunarput kisiartaalluni issittumi nunarsuarmilu silaannaap kissatsikkiartornerata sunniutaanik ilisimatusarfiusinnaasutuanngoriataarpoq, sorunnermi pissutigalugu Rusland ilisimatusarnerni, kulturimut tunngasuni politikkimilu suleqatigiumaneeruppoq.
Ilisimatusartut amerligaluttuinnartut pakatsisitsisartut
Ilisimatusartut nunatsinnut tikittartut amerlipput, qanorli amerlatigineri ilisimaneqanngilaq:
- Ilisimatusartut nunanit allaneersut nunatsinnut misissuiartortartut qanoq amerlatiginersut tamakkiisumik ilisimaneqanngilaq. Amerikamiulli ilisimatusartut 300-t tungaanut amerlatigisartut nalunngilarput. Taakku sermersuarmiittarput, umiarsuarni allanilu. Inuiaqatigiilli allat qanoq amerlatigisut maaniittarnersut naluarput, Josephine Nymand oqarpoq.
Ilisimatusartulli nunanit allanneersut nassuiaateqaratik tikeriarlutik aallaqqipallakkaangata nunatsinni ilisimatusartut kisimik atornerlunneqartutut misigineq ajorput. Innuttaasummi aamma pakatsisartut, Josephine Nymand oqarpoq.
- Tikittut nalituunik tigusisimanersut ilisimaneqarneq ajormat naammagittaalliutigineqartaqaaq. Sulerisimanerminnimmi nassuiaanngippata paasisaqarnavianngilagut, Josephine Nymand oqarpoq nangillunilu:
- Innuttaasut eqqaminni susoqarnersoq nalunngikkusuttarpaat. Ilisimatusartulli nunanit allanneersut innuttaasunut attaveqarniarnerluttarsimapput, taanna oqarpoq.
Ilisimatusartut nassaatik innuttaasunut oqaluttuarisassagaat
Taamaattumik Nunatsinni Ilisimatusarnermik Siunnersuisoqatigiit nunatsinni ilisimatusartoqassatillugu najoqqutassiorlutik aallartipput. Najoqqutassiat ilisimatusartunut nunatsinneersunut nunanilu allaneersunut atuutissapput. Nunani allani amerlanerpaani najoqqutassiaqareerpoq.
Pingaarnerpaarmi tassaavoq ilisimatusartut misissugassaminnik tigusisimatillutik innuttaasunik oqaloqateqartarnissaat, taamaattoqarpat innuttaasut peqataatinneqartutut misigisimassapput.
Ilisimatusarnermik siunnersuisoqatigiit nunanit allaneersunik ilisimatusartunik suleqateqarlutik sharing circlesimik taallugu workshoppertitsillutillu oqalugiartitsereerput, taamaaliornikkut innuttaasut ilisimatusartunut kissatiminnik anngussipput.
- Qanoq peqataatinneqartarnissat utertitsiffigineqartarnissallu naapinnermi oqaloqatigiissutigineqarput. Inuimmi sumiikkaluartulluunniit pissuserissaarfigisussaavagut. Inuit najugaqarfiini ilisimatusartoqartillugu nassuiaateqarnissatsinnik pisussaaffeqarpugut, taanna oqarpoq.
Najoqqutassiorneq aatsaat aallartilaarpoq. Ilisimatusarnermik siunnersuisoqatigiit najoqqussiorlutik aallartikkamik najoqqutassiartik nuannariinnarlugu Grønlandske Metodemik taasimavaat, tassa kalaallit periasiannik nutserneqarsinnaasumik. Najoqqussiornerli asuliinnaassanngitsoq Josephine Nymandip neriutigaa:
- Nunatsinni ilisimatusartussat tamarmik oqaloqatigineqaqqaartartuuppata nuannissagaluarpoq. Ilisimatusaatigineqartussaq ataatsimoorluni nassuiaasiorneqarsinnaavoq naammassinermilu oqaloqatigeeqqittoqarsinnaalluni. Suut paasineqarsimanersut oqaluttuarineqartassapput inuiaqatigiinnullu qanoq iluaqutaasinnaanerat nassuiaatigineqarluni.
