Kalaallit Savalimmiormiullu ilisimatusartut suleqatigiinnissamik isumaqatigiissuteqartut
Nunatsinni Ilisimatusarnermik Siunnersuisoqatigiit Savalimmiunilu siunnersuisoqatigiit, Granskingarráðið, nunat akornanni ilisimatusartarnissani suleqatigiinnissamik isumaqatigiillutik atsioqatigiissuteqarput.
Nunanilu taakkunani ilisimatusartarnernik ajornannginnerulersitsissasoq Nunatsinni Ilisimatusarnermik Siunnersuisoqatigiit siulittaasuat Josephine Nymand oqarpoq:
- Suleqatigiittareerpugut, sulili suleqatigiinnerorusuppugut, ataatsimooruttami nukittunerusinnaavugut. Nunaavugut inuttunngitsut, taamaattumillu ingiaruminartarluta, taanna oqarpoq.
Nunarput Savalimmiullu pingaartumik ukiuni kingullerni nunanit allanit alaatsinaanneqaqaat. Issittormi nunarsuarmi tamanit soqutigineqartorujussuanngoqqavoq. Avataaniillu soqutiginninnerujussuaq ataatsimoorluni nukittoqatigiiffiusinnaasoq siulittaasoq oqarpoq:
- Issittoq nunarsuarmi nunat tamalaat akornanni soqutigineqartorujussuanngorpoq, aamma nunarput Savalimmiullu. Ilisimatusartut nunanit allaneersut tikillutik qanorsuaq ilimatusarsinnaatitaajuaannarnikuupput. Ilisimatusarfigineqartussalli suut pingaarnerutinneqarnissaannut tikkuusseqataarusuppugut.
Ataatsimoorluni isumassarsinartoq
Suleqatigiilerneq nutaajulluinnarpoq, ilisimatusartulli nunanit marlunneersut ataatsimoorluni isumassarsioqatigiinnerup iluaqutaalereernera misigereersimagitsik Josephine Nymand oqarpoq:
- Ilisimatusartut assigiinngitsut ataatsimut suliaqartillugit naapisereerpavut. Taamaaliornikkut suliniutit nutaat takkussuutipallalereersut takusinnaavarput ilisimatusartullu ataatsimoorlutik aningaasanik qinnuteqaasioreerput, taanna oqarpoq.
Nunallu marluk ataatsimoorlutik ilisimatusarnissanut aningaasaliissutissanut qinnuteqaasioqatigiittarnissat iluaqutigilluarsinnaavaat.
Suleqatigiinneq aningaasaliisarnernut iluaqutaassasoq
Ilisimatusartut nunanit marlunneersut amerlanngimmata ilisimatusarnissanut aningaasanik qinnuteqartarneq ajornakusoorsinnaasarpoq:
- EU aamma USA tassaapput aningaasaliilluarsinnaasut, takkununngalu qinnuteqaasiorneq ajornakusoorlunilu allaffissornertaqangaatsiartorujussuuvoq. Ataatsimoorutta qinnuteqaasiorluarsinnaanerulissaagut nunanullu allanut unammillerluarsinnaanerput takutissinnaassavarput, taanna oqarpoq.
Suleqatigiilerneq aallarterlaajuvoq, ilisimatusarnerillu pingaarutillit ukiorpassuarni tulliuttuni piumaartut Josephine Nymandip neriuutigaa:
- Aatsaat aallartilaaginnarpugut. Ilisimatusartortatta nunatsinni inuiaqatigiinnut pingaarutilinnik ilisimatusarnissaannut ajornannginnerusumik aningaasaliivigineqartarnissaat qulakkiissavarput.