Nunatsinni Savalimmiunilu inuussutissarsiutinik ilinniarfiit suleqatigiinnerat aningaasaqarnermik suliaqartussanik pitsaanerusunik ilinniartitsissaaq

Nunatsinni Savalimmiunilu inuussutissarsiutinik ilinniarfiit akornanni suleqatigiinneq nutaaq ataqatigiilersitsillunilu aningaasaqarnermik suliaqartussanik pitsaanerusunik ilinniartitsissaaq, taakku qeqertat namminersortut marlunni Atlantikup avannarpasissuaniittuni pissutsinut aalajangersimalluinnartunut piareersimanerusussanik ilinniartitsissapput.

Taama Troels Friis, Niuernermik Ilinniarfimmi ilinniartitaanermut pisortaq, oqaluttuarpoq:

- Kalaallit Nunaata Savalimmiullu imminnut attaveqalernissaat siunertarineqarpoq. Ilinniartut naapitsillugit. Piorsarsimassuseq akornatsinniittoq ilisaritillugu. Akornatsinni tikikkuminaatsut ammaanneqarnissaat siunertarineqarpoq, taanna oqarpoq.

Ilisimasanik avitseqatigiinneq, suliffimmik misiliinerit aamma ataatsimoorussatut ilinniartitsinerit suleqatigiinnermi ilaassapput - taakku ilaatigut sapaatip akunnerata siuliani ingerlanneqarput.

Klassit annerit ilikkagaqartitsinerusarput

Savalimmiuniit nunatsinnilu ilinniartut aningaasaqarnermik suliaqartussat taakkunannga ilinniarfinni marlunneersut maani Nuummi Niuernermik Ilinniarfimmi sapaatip akunneranik ataatsimik sivisussusilimmik ingerlanneqartumut ataatsimoortippai. Ilinniartut tunniusimalluartut katillugit 14-t ataatsimoortinneqarput, ineqarnermullu tunngasunut taarsigassarsiat, tuniniakkanik nalilersuineq aamma illumi pigisanik sillimmatit sammineqarput.

Ilinniartut ilagaat kalaaleq Pilo Harbroe:

- Unammillernarlunilu nuannerpoq. Klassitsinni arfineq-marluinnaavugut. Taakkua arfineq-marluupput. Ilikkagaqarfiulluarpoq. Allamiunik attaveqateqarneq ilikkagaqarfigaara, taanna oqarpoq.

Klassi anginerugaangat nunat taakku namminersortut marluk aningaasaqarnermillu suliaqartussaat akornamminni qanoq ilikkagaqarfigisinnaatiginerat tupinnarpoq. Aammattaarli ilinniartitsisut ilikkagaqarfigisinnaavaat, tamannalu ilinniagaqarnermik kivitsisuuvoq, Troels Friis oqaluttuarpoq.

- Peqatigiinnermimmi allaannerulluinnartumik pilersitsisarpoq. Klassit minnerit aamma pikkunaalaartaramik, klassini anginerusunittuulli unammillernartortaqarpiaratillu assinganik periarfissaqartitsinnginnamik.

Ilinniartut 14-it Savalimmiuneersut nunatsinneersullu sapaatip akunnerani kingullermi eqimattat pingasunut avillutik illuuteqarnermi niuerneq, aningaaseriviit sillimmasiinerillu pillugit projektiliorput.

Tamassuma saniatigut assut ilikkagaqarnarpoq, Pilo Harbroe isumaqarpoq. Ilisimasat pingaarutillit aamma ilinniartutut naammassereernermi pingaaruteqarumaartut:

- Ilinniakkamiinnaanngitsoq. Siunissami aamma. Immitsinnummi naleqqiussinnaavugut. Innuttaasut ikittuuvugut naalagaaffeqatigiillutalu, taanna oqarpoq.

Ilinniartut kalaallit ukiaru Savalimmiuni inuussutissarsiutinik ilinniarfik, Glasir Tórshavn College, tikeraassavaat.

Taassuma pinissaata tungaanut ilinniarfiit taakku marluk akornanni arlalinnik interneti aqqutigalugu ilinniartitsisoqassaaq.