Ilisimatusartut saqqumiillaqqinneqqusaallutik unammilersut

Ilisimatusarluni misissuinernut pingaarutilinnut tunngasut atuarlugit soqutiginarpiaratillu paasiuminaassinnaasarput.

Tamannalu pissutigalugu Arctic Hub aamma Ilisimatusarfik ilisimatusarluni misissuinerit pillugit saqqummiillaqqinneqqusaatitillutik aaqqissuussipput, taallugu Paasisavut. Ph.d-nngorniartut toqqakkat nunatsinni eqqaanilu ilisimatusarlutik misissuisut qanoq nassuiaallaqqitsiginerminnik takutitsinissaminnut uani periarfissinneqarput.

- Unammisitsinermik Paasisavutut ilusilimmik Kalaallit Nunaanni siullermeerluni ingerlatsisoqalerpoq, Arctic Hubip allattoqarfiani pisortaq Anna-Sofie Skjervedal tusagassiuutinut nalunaarummi taama oqarpoq.

Ilisimatusartut tallimat ajugaaniuteqataasussat aaqqissuisunit toqqarneqarput. Taakku ilisimatusarlutik misissukkatik katillugit minutsini tallimani soqutiginartumik paasiuminartumillu taamatullu ilisimatusarnermi oqariartuutinik allanngortitsinatik saqqumiissapput.  

- Taakkua tamarmik ilisimatusarfigisaminnik saqqummiussillaqqilluinnartuunertik assigiissutigaat, Arctic Hub tusagassiuutinut nalunaarummi allappoq.

Ilisimatusartut saqqummiillaqqinneqqusaannissaat

Saqqummiillaqqinneqqusaattussat Nuummi kulturip illorsuani Katuami toqqaannartumik aallakaatitsinermi marsip aallaqqaataani imminnut unammissapput.  

Ajugaaniuttussallu arlallit ilisimatusarlutik misissuinerminni oqariartuutinik siammarterinissamut periarfissinneqarnertik nuannaarutigaat.

Taakku ilagaat kalaallit meerartaasa isigiarsunnerannik misissuisoq Nick Duelund:

- Ilisimatusarnitsinni oqariartuutitsinnik siammarterinissamut periarfissinneqarpugut, taamaalilluni misissuilluta suliniuteqarnitsinni sulerinersugut inuiaqatigiit aamma paasissavaat, taanna oqarpoq.

Naja Carina Steenholdt pitsaasumik inuuneqarnerup kalaallinut qanoq paasisariaqarneranik misissuivoq, paasisanilu pillugit inuiaqatigiinnik avitseqateqarsinnaanini aamma nuannaarutigaa:

- Ilisimatusarlunga misissuininni paasisakka pingaartilluinnarpakka, taamaattumik paasisama inuiaqatigiinnut minnerunngitsumillu misissuininni qitiulluinnartunut, tassa apersorsimasannut paasissutissiissutigineqarnissaat pissusissamisoorpoq, taanna oqarpoq.

Ilisimatusartoq saqqumiilluarnerpaaq Brugsenimiit 25.000 koruuninik aningaasartalimmik akissarsitinneqassasoq Arctic Hub paasissutissiivoq. Ilisimatusartut saqqumiillaqqinneqqusaallutik ajugaaniunnissaat KNR-ikkut aamma toqqaannartumik aallakaatinneqassaaq.

Ajugaaniuttussat tassaapput:

• Ulunnguaq Markussen (Ilisimatusarfik), Tasiilap illoqarfianik ineriartortitsinermik aamma nunatsinni illoqarfiit nunaqarfiillu pitsaanerpaamik ineriartortinneqarnissaasa qanoq qulakkeerneqassaneranik ilisimatusartoq.
• Nick Duelund (Ilisimatusarfik), kalaallit meerartaasa isiarsuttarnerannik aamma meeqqat isigisaannik misissuisarnissaq kingornalu isigisaqarsinnaaqqilernissamut pisariaqartunik iluaqutissinneqarnissaat Kalaallit Nunaata qanoq qulakkeerinninnissaanik misissuisoq.
• Naja Carina Steenholdt (Ilisimatusarfik aamma Aalborg Universitet) Kalaallit Nunanni pitsaasumik inuuneqarnermik misissuisoq. Aamma statistikkit naapertorlugit Kalaallit Nunaani inuunermik tujominartumik takutitsigaluartut kalaalerpassuit inuunerminnik naammagisimaarinninnerarnerannut qanoq naapertuutsigineranik misissuisoq.   
• Laura Helene Rasmussen (Københavns Universitet) Kalaallit Nunaata masarsuini kvælstoffinik aamma Kalaallit Nunaata kissatsikkiartuinnarnerata qanoq sunniuteqarneranik misissuisoq.
• Liz Cooper (Copenhagen Business School) Kalaallit Nunaanni takornariartaatinik nungusaataanngitsumik takornariartitsisarneq aamma nungusaataanngitsumik qanoq ineriartortinneqarnissaanik misissuisoq.