Umiarsuaq ilisimatusaat nutaaq nunatsinnut siunissami iluaqutaassasoq

Umiarsuaq 61,4 meterinik takussuseqartoq 16 meterinillu silissuseqartoq Nuummi umiarsualivimmut talippat takunngitsoorneqarsinnaanavianngilaq.

Umiarsuaq Tarajumik ateqartoq nunatta imaani ilisimatusarnermi umiarsuartaaraa.

AAMMA ATUARUK Nunatta ilisimatuussutsikkut umiarsuassaa Spaniami singinneqartoq

Tarajoq Pinngortitaleriffimmit ingerlanneqanneqassaaq umiarsuartullu ilisimatusaatitut nunatta imartaani raajaqassuseq aalisagaqassuserlu pingaarnertut nakkutigissavai.

Tamanna Pinngortitaleriffiup pisortaata, Klaus Nygaardip KNR-imut oqaatigaa.

- Umiarsuup uumassuseqassutsit misissortassavai, assersuutigalugu raajat, qalerallit saarulliillu amerlassusaat uuttortartassavai. Imaanit isumalluutinik piujuaannartitsisumik atorluaasinnaanerup ilisimatuussutsikkut tunngavilernissaa pingaarnertut siunertaavoq.

Piujuaannartitsisumik assersuutigalugu saarullinnik, ammassannik raajanillu aalisarneq Klaus Nygaardip oqarnera naapertorlugu pingaaruteqarpoq, aalisarnermi nunatta aningaasaqarneranut pingaaruteqarluinnarmat.

Aalisagaqanngippammi aningaasanik aamma isertitassaqarnavianngilaq.

AAMMA ATUARUK Umiarsuarmut misissuummut nutaamut 200 millioninik aningaasaliisoqalersoq

Paasissutissat Tarajumit raajat aalisakkallu qanoq issusaannut tunngasut katersorneqartussat nunatsinni aalisakkanik raajanillu aalisarnermut MSC-mik meqqimik pissarnissamut aamma atorneqassapput.

Pisaammi MSC-mik meqqeqarunik taakku akisunerusumik tunineqarsinnaassapput, tamannalu aalisartunut nunattalu aningaasaqarneranut iluaqutaassalluni.

Aalisakkanut kisimi atorneqarnavianngitsoq

Aalisagaqassutsip nakkutiginerata saniatigut Tarajoq silap pissusia opillugu ilisimatusarnermik sulianut aamma nunatta imartaata naqqata uuttortarneranut atorneqassaaq.

Tarajoq aqqaneq marlunnik inuttaqarsinnaallunilu ilisimatuut 20-t ilaasorisinnaavai. Taamaammat umiarsuaq assersuutigalugu imarsiornermik ilinniarfimmeersunit angalalluni aamma ilinniarfiutigissaaq.

- Ilinniartunut ilaatigut maskinmesterinngorniartunut aquttunngorniartunullu inissaqarpoq. Taamaammat umiarsuaq nutaaq inuiaqatigiinnut arlalinnik iluaqutissartaqarpoq, Klaus Nygaard oqarpoq.

Tarajoq Namminersorlutik Oqartussanit aningaasalerneqarpoq, taannalu Aage V. Jensenip Aningaasaateqarfianit taperneqarluni. Namminersorlutik Oqartussat 220 millionit koruuninik aningaasaliissuteqartut Aage V. Jensenip Aningaasaateqarfia 15 millionit koruuninik tapiivoq.

Umiarsuup maajip aallartinnerani atserneqarnissaa pilersaarutaavoq, tassanilu innuttaasut umiarsuarmut takornariarsinnaanissaat aamma neriuutaalluni.