Nunatta ilisimatuussutsikkut umiarsuassaa Spaniami singinneqartoq
Nunatta ilisimatuussutsikkut umiarsuassaa Spaniami singinneqarpoq.
Umiarsuaq Tarajumik ateqartoq taannalu tallimanngormat singinneqartoq, Pinngortitaleriffik ilisimatitsivoq.
Ilisimatuussutsikkut umiarsuassaq Spaniami inaarlugu sananeqassaaq upernaarulu tunniunneqassalluni. Umiarsuaq Nuummut tikinnermini pisortatigoortumik atserneqassaaq.
Ilisimatuussutsikkut umiarsuaq nunatta ilisimatuussutsimut aningaasaliiffiisa annersarileraat, Pinngortitaleriffik allappoq.
AAMMA ATUARUK Umiarsuaq ilisimatuussutsikkut misissuutissaq Spaniami sananeqassasoq
Ilisimatuussutsikkut umiarsuaq 61 meterinik takissuseqartoq sikisiutitut sananeqarpoq.
Umiarsuaq 235 millionit koruuninik akeqartussatut missiliugaavoq. Namminersorlutik Oqartussat aningaasaqarfimmit Aage V. Jensens Fondimit taperneqarlutik akilerpaat.
Umiarsuaq Paamiut kingoraassagaa
Nunatta ilisimatuussutsikkut umiarsuassaata umiarsuaq ”Paamiut” kingoraassavaa.
Umiarsuatoqaq Paamiut ukiunik 50-inik pisoqaassusilik ilisimatuussutsikkut umiarsuatut atuutiinnassappat akisoorujussuarmik nutarterujussuarneqartariaqartoq, ukialuit matuma siorna misissorneqarnerani erserpoq.
Tamannalu imminut akilersinnaanngitsoq, Pinngortitaleriffiup taamani nalilepaa.
Tarajormili ilisimatuussutsikkut avatangiisinullu tunngatillugu suliarineqarsinnaasut amerlanerujussuussapput.
Umiarsuup atissaanik ukiup massuma aallartinnerani unammisitsisoqarpoq. Siunnersuutit 600-nit amerlerupput, ”Tarajoq”-li ajugaasutut toqqarneqarluni.
AAMMA ATUARUK Pâmiut ukiut 50-t umiartoreerluni atorunnaartussanngortoq
Tarajoq immamut qanga taaguutaasimavoq. Canadami Alaskamilu immamut suli taaguutaavoq, imarli immamut nunatsinni atorneqalersimalluni. Oqaaserlu "Taratsut" nerisassiornermut akuutissanut atorneqarnerulersimalluni.
Kalaallit oqariaasitoqaasa ilagaat: okalûsai tarajuligssugput, tassa kimittuumik oqaluttoqartillugu atorneqartarsimalluni.
Naggueqatigiit inuit nunarsuaq pingasunut ukununnga immikkoortittarsimavaat: Nuna, tarajoq aamma sila.
