Kalaallit Nunaannut ministeriusimasup Tom Høyemip Múte B. Egede eqqunngitsumik pasilliinermut aamma mamarliinermut eqqartuutitinniarlugu sioorasaarpaa.

Taama tusagassiorfik Politiken allappoq.

Tom Høyem 1982-imiit 1987 ilanngullugu Kalaallit Nunaannut ministeriusimavoq. Akisussaasuunerani spiralilersuineq pisimavoq.

Politikeriusimasoq spiralinut tunngatillugu nammineq ilisimasaqarfiginagit arlaleriarluni KNR-imut oqarpoq.

Kalaallit Nunaannut miniseriaqarfimmi ukiut ingerlanerini sulisimasorpassuit illersornissaat pisussaaffittut isigaa. Tamanna Kalaallit Nunaannut ministeriusimasuni kingullersaanera pissuteqarpoq.

Múte B. Egedemut toqqaannartumik allassimalluni, taanna Politikenimut oqarpoq. Taanna imaluunniit ministeriami sulisuusimasut inuiannik nungusaasimaneraanera tunngavissaqanngitsoq, taanna isumaqarpoq.

Taanali naapertorlugu, Múte B. Egedep saaffiginnissut akisimanngilaa.

- Inuiannik nungusaanermik oqaaseqaatini eqqarsaatigilluagaasimannginnerarpagu akuerissavara. Taamaanngippat Múte B. Egede eqqunngitsumik pasilliinermut suliassanngortitsiniarlunga ilumoorullugu eqqarsaatersuutigaara. Tamatumunnga siulikka, suleqatit uangalumi sinnerlugit pisussaasutut isumaqarnarsinnaangajappoq, Tom Høyem Politikenimut oqarpoq.

Tysklandimi eqqartuussisutigut suliassaq

Danskit naalagaaffiat inuiannik nungusaasimasutut taassallugu tunngavissaqartoq isumaqarluni, Múte B. Egede DR2-mi aallakaatitassiamut Deadlinemut siorna decembarimi oqarpoq.

Naalakkersuisut inuiannik nungusaaneq pineqarsimanersoq pillugu spiralilersuisimanermut qulaajaanermik aallartitsinikuupput. Tamatuma januaarimi naammassineqarnissaa naatsorsuutigineqarpoq.

Kalaallit Nunaanni Naalagaaffiup sinniisorisimasaa Gunnar Martens septembarip naanerani Weekendavisenimut oqaaseqaateqarpoq, taassuma isumaa naapertorlugu inuiannik nungusaasimaneragaanera pillugu spiralilersuisimanermik qulaajaanerup Danmarki pinngitsuutissagaa.

Taamaammat unnerluussutigineqartut pillugit Kalaallit Nunaanniit utoqqatsertoqarnissaanik piumasaqaateqarpoq. 

Eqqartuussinissaq piviusunngussappat Múte B. Egede inuiannik nungusaasimanermut uppernarsaataatiminik tyskit eqqartuussiveqarfiannut saqqummiissaaq.

Tom Høyem aamma Tysklandimi innuttaaneranik Tysklandillu kujasissuani Karlsruhemi najugaqarnera tamatumunnga pissuteqarpoq.

Inuttut pisinnaatitaaffinnik illersuisoq

Politiken naapertorlugu, politikeriusimasoq illersuisumik inuttut pisinnaatitaaffiit pillugit sulianut misilittagartuumik peqateqarpoq. 

Illersuisoq Poltikenimut oqarpoq sullitami eqqunngitsuliorfigineqartutut misigisimanera paasisinnaalluarlugu aamma pisuutitaajunnaarsinneqarusunnera ukuninnga pinngitsoortitserusulluni:

- Meeqqami ernuttamilu aatamik inuiannik nungusaasimasutut pinerluuteqarsimasutut pasillerneqarnera pillugu inuuneranniittussanngornissaa.