Peqqinnissaqarfimmut isumaqatigiissutissaq annertusisaq 2026-nngortinnagu piareersimassasoq

Peqqinnissaq pillugu isumaqatigiissummik nutaamik pilersitsinissamut alloriarnerit siulliit aallartereerput.

Peqqissutsimut Innarluutilinnutlu Naalakkersuisoqarfik tusagassiuutinut nalunaarummi sapaatip-akunnerani kingullermi taama allappoq.

- Partiinik eqqartueqateqarneq maanna aallartissimavoq aamma taakku politikkikkut atituumik isumaqatigiissummut tunngavigineqarumaarlutik, taanna pilersaarut malillugu ukioq naatinnagu naammassineqarsimassaaq, sammivissaq imaalu isumaqatigiissutaasinnaappata, taakku allapput.

'Nutaamik aamma annertusisamik' peqqissutsimut isumaqatigiissummik, 'pilersaarusiornikkut, siunissaq ungasinnerusoq eqqarsaatigalugu pisariaqartunik allannguutissanut' aqqutissiuisussamik pilersitsinissaq anguniagaasoq, naalakkersuisoqarfik allappoq.

- Innuttaasut ineriartornerat, sulisussarsiornermi unammillikkat, peqqissarnissamut neqeroorutini assigiinngissutsit aamma napparsimasunut tunniunneqarsinnaasut aningaasaqarnikkullu qaffakkiartortumik tatineqarnerup peqqissutsimut politikkikkut nutaamik isiginnissinnaalerneq pisariaqartilerpaa, tusagassiuutinut nalunaarummi allaqqavoq.

Peqqinnissaqarfik nutaaliaq

Peqqissutsimut innarluutilinnullu naalakkersuisup Anna Wangenheimip (D) Aasaanerani sulinngiffeqannginnerup nalaani peqqinnissaqarfimmut tunngatillugu anguniakkani oqaatigai – ilaatigut peqqinnissaqarfimmi isumaqatigiissutip annertusarneqarnissaa.

- Sulisarnitsinnik allanngortitsisariaqarpugut, taamaaliornissamullu piffissanngorpoq, taanna junimi oqarpoq.

Sapaatip-akunnerata siuliani suliap aallartinneqarnera pillugu tusagassiuutinut nalunaarummi oqaatsit taakku atorpai. Peqqinnissaqarfik inuiaqatigiinni "pingaarutilittut inissisimasuuvoq", Anna Wangenheim tassani oqaatigaa.

- Qanga aaqqissugaaneq kisiat tunngavigalugu siunissaq pilersissinnaannginnatsigu nassuerutigisariaqarparput. Maanna aalajangiinerit ajornakusoortut pisariaqartinneqartulli aalajangiunnissaannut piffissanngorpoq, ataatsimoorlutalu taamaaliussaagut. Partiit innuttaasullu peqatigalugit peqqinnissaqarfik naapertuilluarnerusoq, piujuartitsinerusoq aamma nutaaliaasoq pilersissavarput, taanna oqarpoq. 

Politikkikkut ataatsimoorussamik isumaqatigiissutip ukiup naanerani saqqummiussinnaanissaa, naalakkersuisut naatsorsuutigaat.