Peqqinnissaqarfimmi ajornakusoorneq: Innuttaasut kaffisoqatigiilluni oqaloqatigiinnissamut qaaqquneqartut

Naalakkersuisup nuummiut peqqinnissaqarfimmut ilungersuasumut oqariartuutaat tusarusuppaat, oqariartuutillu politikkikkut suliaqarnermi atussagitsik neriorsuutigalugu.

Allattoq Markus Valentin

juunip 26-at 2025 11:36

Nutserisoq Connie Fontain

Peqqinnissaqarfik uteriaqqiffissaarutilerpoq.

Peqqissutsimut inunnullu innarluutilinnut naalakkersuisoq, Anna Wangenheim KNR-imit qaammammi matumani siusinnerusukkut apersorneqarnermini annilaarnartumik taama oqariartuuteqarpoq.

Taassuma nuummiut Nuummi Katersortarfimmi sisamanngornermi 16.30-p 18.30-llu akornanni kaffisoqatigiilluni oqaloqatigiinnissamut maanna qaaqquai. Taassuma innuttaasut peqqinnissaqarfiup qanoq ingerlaneranut atatillugu isumaat paaserusuppai.

Naalakkersuisut tusagassiuutinut nalunaarummi allapput.

- Peqqinnissaqarfimmik inuit pisariaqartitaannik naapertuisumik pilersitsissagutta, innuttaasut oqariartuutaat pinngitsoorneqarsinnaanngillat. Tusarnaarnissannut, ilinniarnissannut oqallisiginninnissamullu qilanaarpunga – neriuppungalu amerlasuut ornigullutik oqaloqatigiinnermut peqataassasut, naalakkersuisoq tusagassiuutinut nalunaarummi allappoq.

Ataatsimeeriaaseq nutaaq

Ataatsimiititsinikkut peqataatitsineq allaanerutinneqarpoq. Innutaasunummi ataatsimiititsineq nalinginnaasoq atorneqarani innuttaasut toqqaannarnerusumik peqataatinneqarnissaat pissutigalugu ataatsimiinneq 'open space'-imik taaneqartartoq atorneqarpoq.

Ataatsimiinnermi oqariartuutigineqartut aaqqissuisut politikikkut suliaqarnermi sunniuteqartumik atoriarpaat, tamannalu peqqinnissaq pillugu isumaqatigiissutip annertusarneqarneranut ilusilersueqataasinnaavoq.

Open space qanorpiaq aaqqissuunneqarnersoq paasissutissiissutigineqanngilaq.

Innuttaasulli immikkoortunut sisamanut oqariartuuteqartinneqassasut tusagassiuutinut nalunaarummi allassimavoq:

Naalakkersuisumut politikkikkullu aqutsisunut naatsorsuutit, Nuummi nakorsamit aamma ajoqusersimasunut nakorsiartarfimmi sullinneqarneq, peqqinnissaqarfiup utoqqarnik inunnilluy timikkut tarnikkullu innarluutilinnik sullissinera, peqqinnissaqarfiup meeqqanut inuusuttunullu sullissinera aamma inersimasutut inuunermut ikaarsaariarneq.

Ataatsimiinneq kalaallisut qallunaatullu aaqqissuunneqassaaq, peqataasunullu kaffi, tii imerlu sassaalliutigineqassalluni.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.