Wangenheim peqqinnissaqarfik pillugu: Uteriaqqiffigisinnaajunnaalerparput
- Eqqarsaatigisimasannit ilungersunarnerungaatsiarpoq.
Peqqissutsimut inunnullu innarluutilinnut naalakkersuisoq, Anna Wangenheim (D) Nuuk Centerip qulaani quleriiaat sisamaanni allaffittaamini issiavoq.
Naalakkersuisoqatigiit oqaluttuarisaanermi pingaaruteqartumik qinersisoqarneratut nunarsuarmi taagorneqartumik, Inatsisartunut qinersisoqarneranit sapaatit akunneri marluk qaangiuttut, marsip 28-anni pilersinneqarneranit taanna issivittaaraa.
Tamatumalu kingorna suna tamarmi sukkaannaavik ingerlalertorpoq, akisussaaffigileqqissimasanilu pillugu tusagassiortunik oqaloqateqarnissamut aamma piffissaqarpallaarsimanani.
Anna Wangenheim Demokraatit siulittaasuannut aamma tullersortaasoq kingullermik 2020-mi peqqissutsimut naalakkersuisuuvoq.
- Siullermik peqqissutsimut naalakkersuisuuninnut sanilliullugu maannakkut allaanerujussuuvoq. Taamani coronap nalaaniippoq, ajornartoornermillu suliaqarnermut tunngasorujussuulluni, taanna oqarpoq.
Maannakkut suliaqarneq allaavoq, ajornartoornerlu allaanerusoq taassuma naalakkersuisoqarfiatalu suliassaraa.
Sineriammi ernisarfiit matusut nakorsiarnissamullu piffissaqarpianngitsoq imaluunniit piffissamik pissarsiffiusinnaanngitsoq sulisoqarniarnermilu pissutsit piumasaqaatinik naammassinninngitsut.
Ajornartorsiutit taakku tamarmik ajornartorsiutaasup pingaarnerusup kingunererpasippai: Sulisussarsiorneq sulisunillu attassiniarneq.
- Piffissami uteriarfigeqqissinnaanngisamiililerpugut, Anna Wangenheim oqarpoq.
- Ima ilungersunartigaaq allaat nammineq piginnaasagut ineriartortillugillu maannakkut aningaasaliissuteqanngikkutta suut kingunerluutaasinnaanissaat ernumassutigingaatsiarsinnaavakka.
Peqqissaasut nakorsatut suliaqartut
Nunatsinni suliatigut piginnaasanik amigaateqarnerup kingunerisai takusinnaalereerigut, Anna Wangenheim erseqqissaavoq.
- Ukiorpassuarni sulisussarsiniarnerup ajornartorsiutaanera tusartuarparput. Tamanna nalinginnaasunngorsimarpasippoq, taanna oqarpoq.
Qineqqusaarnermi matumani peqqinnissaqarnermi ilungersunartut aamma sammineqarput.
Narsami aalajangersimasumik atorfeqartuni peqqissaasutuaq, Berit Byg amerlanerusunik suleqatissarsiortoq KNR-imit ilaatigut oqaluttuaraarput.
Taassuma suleqatinilu arfinillit ulluinnarni sulisarnertik nassuiaatigaa.
- Ikiortit pigaartuuffissaat aamma suliffigisariaqartarpavut tamatumalu saniatigut nakorsaqartinnata suliassat allat isumagisariaqartarpavut, Berit Byg oqarpoq.
- Sulianut tunngatillugu pisinnaasakka ilisimaarilluarpakka killissakkalumi aamma, nakorsaanngilangami, taanna oqarpoq.
Ernisussiortut amigaataanerat ukiorpassuarni aamma ajornartorsiutaavoq. 2002-mi ernisarfiit 17-iupput. Qaqortumi Sisimiunilu ernisarfiit ukioq manna matugallarneqarput, taamaalilluni ernisarfiit maannakkut pingasuinnaagallalerlutik.
Piffissaq ungasinnerusoq eqqarsaatigineqartariaqartoq
- Naalakkersuisoqatigiinnikuusimasut sinnerlugit soorunami oqaasissaqanngilanga, Anna Wangenheim (D) nunatta pissutsini maannakkut inissisimalerneranut arlalinnik eqqoriiaasinnaasoq, oqarpoq.
Taassuma inutit amerlanerusut illoqarfinnit minnerusunit nunaqarfinniillu illoqarfinnut annerusunut nutserneranni atugarissaarnermi suliassat sumiiffimmi ajornakusoornerulersimasut eqqaavaa.
Aamma ilinnialerlaat suliffimmiilersut siusinnerusumit allaanerusunik piumasaqaateqartalersimasut eqqaamavai.
- Piviusorli nutaaq peqqinnissaqarfimmi aamma nassuerutigisariaqarparput. Tassa siusinnerusumik iliuuserisartakkatsinnit allaanerusumik ineriartortitsivugut, taanna erseqqissaavoq.
Anna Wangenheimip tamatuma saniatigut naalakkersuisut nikerartarnerat aamma pissaaneqarnermi nikittoqarnerata tamaasa politikikkut suliniutinik nutaanik malunnartitsiniartarnerat peqqinnissaq pillugu politikkip piffissamut sivikippallaamut isiginniffiusarneranik kinguneqarsimasoraa.
Tamannalu naalakkersuisoqatigiit maanna siammasinneranni allanngortinneqarsinnaanissaa peqqinnissarlu pillugu isumaqatigiissutip annertusineqarsinnaanissaa neriuutigaa.
- Tarnikkut nappaatillit, utoqqaat inuit innarluutillit aamma pisinnaasakinnerulersimasullu inissaqarnerulissapput, taamaalilluta ineriartornermi pitsaasunik sinaakkuteqalissalluta, taanna oqarpoq, nangillunilu:
- Aamma qinigaaffiit nikittarneranni sangujoraartumik ingerlatsineq pinaveersaartinneqalissalluni.
Filippinerinik sulisussarsiorneq
Peqqinnissaqarnerup 1992-imi oqartussaaffigineqalerneranit Peqqinnissamut Inunnullu Innarluutilinnut Naalakkersuisoqarfik inunnit assigiinngitsunit 17-init akisussaaffigineqarpoq.
Qinersisartut pissutsit maanna allaanerunissaat sooq upperissaneraat KNR-ip Anna Wangenheimimut apeqqutigaa, taannalu ima akissuteqarpoq:
- Nunarsuaq tamakkerlugu peqqinnissaqarnermi ajornartoortoqarnera aamma nunanit allanit sulisussarsiornerunissarput pisariaqartikkipput nassuerutiginerusariaqaratsigu.
Taassumalu Danmarkimit sulisussarsiornissaq eqqarsaatiginngilaa, nunamiilli allamit, kalaallisut danskisullu oqaaseqarfiunngitsumit.
- Danmarkimit sulisussarsiornissaq pisariaqartittorujussuuarput. Ukiorpassuarni nunanit allaneersunik pisariaqartitsisugut arlaleriarlunga oqaatiginikuuara, taanna oqarpoq, nangillunilu:
- Taamaammat nuna alla Danmarkip aamma sulisussarsiorfigisaa misissuiffigaarput – filippinerit peqqissaasut assersuutigalugit.
Siunnersuut taanna Anna Wangenheimip Tv-kkut radiokkullu qineqqusaartitsisoqarnerani aamma oqaatigaa.
Naalakkersuisunngoqqammersumilli ataaseq ersarippoq. Nutaamik isumatusaartumillu peqqinnissaqarfiup ajalusuunnginnissaanut iliuuseqarnissamut piffissanngorpoq.
Meerartaartartunut suliaqarneq aaqqissuuteqqinneqassasoq Nuummilu Universitetshospitalimik pilersitsoqassasoq taassuma eqqaavaa.
- Sulisarnitsinnik allanngortitsisariaqarpugut, taamaaliornissamullu piffissanngorpoq.
