Peqqinnissaqarfimmi sulisunit tamanut nalunaarut: - Kiap paarivaatigut?
Nuummi akerliussutsimik takutitsisut, SANA-miit Inatsisartunut pisuinnaat aqqutaatigut quasattukkut, sisamanngornermi ualikkut ingerlaaqatigiipput. Allagartarsuit anorimit erfalalaartut ilaat ima allaqqapput: “Uagut paarivassi – uagulli kiap paarivaatigut?”
Maajip aallaqqaataanut – sulisartut ulluanni – atatillugu nunatsinni peqqissaasut peqqinnissaqarfimmilu sulisut pakatsisimasut ingerlaaqatigiipput. Peqqinnissaqarfimmi sulisunut ukioq ataaseq sinnerlugu isumaqatigiissuteqartoqarsimanngilaq, massa peqqinnissaqarfimmi atugassarititaasut ajorsiartortut.
Ilutigalugu sivikitsumik paarlattaasartunut – “taartaagallartutut tikisitanik” taaneqartartut – aningaasartuutit ukiumut 60 millionit koruunit sinnerlugit qaffannikuupput, massa atorfilinnik orniginarsaaneq aalajangersimasumillu atorfeqartitsiniarneq ajornarneruleqqasoq. Taamak Peqqissutsimut naalakkersuisoqarfimmi naatsorsuinerup takutippaa.
SANA-miit Inatsisartunut
Akerliussutsimik takutitsisut ilagaat Berit Byg 57-inik ukiulik, Narsamiit illoqarfiit pingaarnersaannut peqataajartorluni tikittoq.
Isumaqatigiissusiortoqarsimannginnerata pingaartumik sineriak eqqoraa uparuarpaa:
- Inupparpassuarnik amigaateqarpugut. Sulinermi atugassarititaasut ajunnginnerusuuppata, suleqatinik ajornannginnerusumik kajumissaarisinnaassagaluarpugut, Narsami peqqissaasutut atorfilik Berit Byg oqarpoq.
Nutaamik isumaqatigiissusiortoqarnissaanut utaqqineq, sulisunut napparsimasunullu kinguneqarujussuartoq Berit Byg isumaqarpoq. Taamaammat akerliussutsimik takutitsineq politikerinik isumaqatiginninniartoqalersinnaanissaa neriuutigaa.
- Ataatsimummi isigalugu napparsimasunik sumiginnaaneruvoq, taakkumi passulluannginneqakulapput, suleqatimmi tungaatigut ilungersuanerput peqqutaalluni, uanga kissaatigisattut passussinnaaneq ajorpakka, taanna oqarpoq.
Akerliussutsimik takutitsineq politikerinik nukingilersitsissasoq, peqqinnissamut tunngasunut siunnersorti Maanguaq Pedersen aamma neriuuteqarpoq.
- Nutaamik isumaqatigiissusiorusuppugut. Isumaqatiginninniarnerillu ullumimiit nukingisaarutilissagaat neriuppunga, taanna oqarpoq.
Inatsisartut saavanni oqalugiartut
Peqqinnissaqarfimmi sulisut tusarnaarniarlugit politikerit arlallit Inatsisartut silataanukarput.
Akuersaarneqarsinnaanngilarmi, peqqinnissamut naalakkersuisup Anna Wangenheimip (D) nassuerutigaa.
- Sulilersitsiniarnermi suleqatitsinnillu attassinissamut ajorluinnartumik kinguneqapoq, taamaammat akuersaarneqarsinnaanngilaq, taanna oqarpoq.
Isumaqatiginninniarnerup nutarternissaata naammassileruttornera, maajillu arfineq-pingajuanni suliareqqitassanngortinneqarnissaa, taassuma erseqqissaatigaa.
Suliap sivisuneranut peqqutaa, Anna Wangenheimip ima nassuiarpaa:
- Isumaqatiginninniarnermut ataatsimiititaliamik pilersitsisoqarnikuuvoq, taakkualu tassunga tunngatillugu suliamik aaqqissuusseqqittoqarnissaa innersuussutigaat. Illuatungeriit isumaqatigiissimapput, taamaammat isumaqatiginninniarnerit sivisusinnaanerannut paaseqatigiittoqarpoq.
Kisianni isumaqatigiissutip qaqugorpiaq inissinnissaa ersarissumik akisinnaanngilaa.
Oqaatigineqartut iliuuseqarfigineqarnissaat
Oqalugiaat naammassimmat katersuussimasut ersaartaapput. Peqqinnissaqarfimmi sulisut arlallit Anna Wangenheimip takkunnera ajornartorsiummullu nassuernera iluarisimaarpaat – oqariartuutaalli ersarippoq: Maannakkut allanngortoqartariaqarpoq.
– Akissutaa ajunngilaq, kisianni sivisuumik utaqqereerpugut. Maannakkut isumaqatigiissuisortoqarnissaa neriuutigaarput, peqqissaasoq akerliussutsimullu aaqqissueqataasoq Ivalu Steenholdt Høy oqarpoq
Suleqataa, Marie Didriksen isumaqataavoq.
– Taassuma (Anna Wangenheim, aaqq.) eqqortut oqaatigai. Kisianni oqaatigineqartut iliuuseqarfigineqarumaarnersut takujumaarparput.
