Kreml: Kalaallit Nunaat isumannaallisaanikkut pilersaarusiornermut pingaaruteqarpoq
USA-p qaartartunut ungasissumiit igeriuttakkanut illersuusiaminut atortussaminik Golden Domemik ineriartortitsinera – aamma Kalaallit Nunaannut tunngatillugu - Ruslandip sakkutuuisa malinnaavigilluinnarpaat.
Nutaarsiassaqartitsivik Reuters naapertorlugu Ruslandip præsidentiata oqaaseqartartua, Dmitry Peskov, Ruslandimi tv-kkut aallakaatitassiamit apersorneqarnermini taama oqarpoq.
- Pilersaarutinik taakkuninnga sakkutuutta nakkutiginninnissaat misissueqqissaarnissaallu qularinngivippara, taanna oqarpoq.
Kalaallit Nunaat "patajaassutsimut isumannaallisaanermullu tunngatillugu pilersaarusiornermut" pingaaruteqartoq, Ruslandip nutaarsiassaqartitsivia TASS naapertorlugu Peskov apersorneqarnermini oqarpoq.
Kalaallit Nunaata isumannaallisaanermut tunngatillugu sooq pingaaruteqarneranik Peskov isumaqarnersoq, aamma qanoq pingaaruteqartiginersoq kikkullu iluaqutigissaneraat, Tass-ip Reuters-illuunniit sukumiisumik oqaatiginngilaat.
USA-p præsidentiata Donald Trumpip silaannakkut illersornissamut atortorissaarutitaaq angingaartoq, Golden Dome, pilersaarutigaa.
Kalaallit Nunaat qallunaat naalagaaffianniittoq
Trump naapertorlugu illersornissamut atortorissaarut taanna USA-p sakkunut assigiinngitsorpassuarnut - ilaatigut qaartartunut ungasissumiit igeriuttakkanut assigiinngitsunut dronenullu illersornissaanut naammassaaq.
Atortorissaarut tamakkiisumik atorneqarsinnaassappat Kalaallit Nunaat peqataatinneqartariaqartoq, Trump siusinnerusukkut oqarpoq.
Qeqertaq Issittumi inissisimammat Kinap Ruslandillu USA-mut qaartartunut ungasissumiit igeriuttakkanut aallartitsinissaannut aqqutaaniittoq, siusinnerusukkut AP nassuiaavoq.
Kalaallit Nunaata qallunaat naalagaaffiannut ilaanera, qanittukkut Ruslandip oqaatigaa.
Trumpip qeqertaq Danmarkip Kunngeqarfianut ilaasoq pigilerusullugu oqareerneranut atatillugu piffissami kingullermi nunanit tamalaanit Kalaallit Nunaata soqutigineqalernerata kingorna, sapaatip-akunnerata siuliani Peskov taama oqarpoq.
Kalaallit Nunaata isumannaallisaanikkut inissisimaffia nunarsuarmi tamarmi inatsisit eqqarsaatigalugit "immikkut ittutut" Ruslandip isigigaa, aamma allassimavoq.
- Nunarsuarmiut allat assigalugit Kalaallit Nunaanni pissutsit malinnaaffigilluinnarpavut. Pissutsit assortuulluinnartuusut takuneqarsinnaapput. Isumaqarpugut Kalaallit Nunaat qallunaat naalagaaffianniittoq, Tass naapertorlugu Peskov oqarpoq.
/Ritzau/
