Najummassimaarneq danskit peqqissaasuinik tikikkumajunnaartitsisoq
Danskit peqqissaasut ilaat Nunatsinnut suliartorusukkaluarlutik uniinnartarput.
Peqqissaasut Kattuffianni siulittaasoq Navarana Johansen taama oqarpoq.
- Danmarkimi peqqissaasunik maanga suliartortussaagaluanik suliartorumajunnaarsimasunik arlalinnik tusagaqarpugut, taanna KNR-imut oqarpoq.
Peqqissaasut suliartorumajunnaartut qanoq amerlatigeqqissaarneri taassuma ilisimanngilaa. KNR-ip Peqqinnissaqarfimmiit kisitsisit pissarsiariniarsarai.
Sulisussarsiorneq ajornakusooreertoq
Taakkuali Navarana Johansenip Kattuffimmi siulittaasutut tusartarpai – Amerikap præsidentia sioorasaarutaalu pillugit inuit tikikkumajunnaartikkai paasisinnaalluarpaa.
- Nunatsinnut suliartortussaagaluanik suliartorumajunnaarsimasunik arlalinnik tusagaqarpunga, nunatta tiguarneqaratarnissaanut sorsuttoqaratarnissaanullu ernumaneq pissutigalugu. Nunarsuarmi politikikkut pissutsit Kalaallit Nunaannilu ukkatarineqarnerujussuisa ernumalersitsisinnaanera paasisinnaavara, taanna oqarpoq.
Naak suliartortussaagaluit immaqa amerlanngikkaluartut ajornartorsiutaavoq. Nunatsinnimi Peqqinnissaqarfiup nunatta avataaniit sulisussarsiortarneq pinngitsoorsinnaanngilaa, aamma peqqissutsimik suliaqartunik pisariaqartunik sulisussarsiortarneq ajornartorsiutaareerpoq. Nunatsinni Peqqinnissaqarfiup qullersaqarfiani nunap ilaanut pisortap tullersortaa Ella Skifte KNR-imut siorna oqarpoq:
- Inuttalersuiniarnikkut ajornartorsiuteqarpugut. Nunatsinnukartunik paarlatserpassuaqarpoq taakualu ilai sivikitsuinnarmik paarlattaasarput. Tamannalu aalakkaasumik suleqateqarnissatsinnut ajornartorsiulersitsisinnaavoq.
Navarana Johansenip oqarnera naapertorlugu, naak sulilernissaminnut piareersimagaluarlutik arlallit suliartorumajunnaassappata kinguneqartussaavoq:
- Ajornerpaaq pisinnaasoq tassaavoq, nunatsinni peqqissaasut atorfillit suliaqarnerulissapput. Danmarkimeersunik peqqissaasunik pisariaqartitsingaatsiarpugut, Danmarkimiillu suleqatitaanngikkutta atorfilittagut ulapinnerungaatsiartussaapput, taanna oqarpoq.
- Danmarkimiit peqqissaasut pilersaarutigereeraluarlugu tikinngiinnassappata, peqqissaasunut maanna atorfilinnut paarlattaasunullu sulinerannut atugassarititaasut ajorseriaateqapallassinnaapput.
Uivertoqarnissaanut pissutissaqanngitsoq nalunaarutigineqartoq
Tamannalu naggaterpiaani nunatsinni napparsimasunut kingunerluuteqarsinnaasoq, peqqissaasut siulittaasuat naliliivoq:
- Atorfilinnut paarlatsinullu suliffimmi atugassarititaasut ajorseriaateqassappata aamma napparsimasunut isumannaallisaaneq ajorseriaateqassaaq. Tamannalu naggaterpiaani innuttaasunut kingunerluuteqassaaq.
Taamaattumik suliartorusunnerlutik imaluunniit uniinnassanerlutik eqqarsaatersuuteqartunut, uivernissaq pissutissaqanngitsoq nalunaarfigissallugit tassunga pingaaruteqarpoq:
- Innuttaasoqarpoq peqqissartinnissamik suli pisariaqartitsisunik, pisarnitsitullu sulivugut. Naak pisut pillugit ernumagaluarluta sulisarluta ulluinnagut atorpagut, suliassavullu suliarisarpagut. Suna tamarmi - isaasalerlugu – pisarnertut ingerlavoq. Peqqinnissaqarfik, aamma Peqqissutsimut Inunnullu Innarluutilinnut Naalakkersuisoqarfik upalungaarsimanermut pilersaarutinut tunngatillugu attaveqaqatigaara. Pisoq qanimut malinnaavigaarput, peqqissaasullu nunatsinnukarlutik suleqatiginnikkiartornissaat ernumanaateqanngilaq, Navarana Johansen oqarpoq.
Peqqissutsimut Naalakkersuisoq Anna Wangenheimip (D) oqarnera naapertorlugu, peqqissaasut Nunatsinnut suliartunngiinnassallutik aalajangerneri ajornartorsiuterujussuunngilaq, taamaakkaluartoq:
- Paasissutissat amigaataapput, ajornartorsiulli tusareernikuuarput. Maannakkorpiarli ima annertutiginngilaq peqqinnissaqarfimmik ajornartorsiortitsisinnaalluni. Peqqinnissaqarfiilli pisortaat kattuffiillu oqaloqatigaagut pissutsillu malinnaaffigalugit, Anna Wangenheim oqarpoq.
